Kawkhansa, Jehová Diosar serviñatakejj jankʼakïpjjtwa

UKAJJ 1949 maranwa pasäna, 60 jila maranak nayra, ukampis sarnaqäwijajj jukʼampi nayraw qalltawayi. Awkijajj Hendrik satänwa, jupajj zapatero ukat jardinerjamaw Donderen markan irnaqäna, uka markajj Drenthe markat alay toqenkiwa (Países Bajos). Uka markanwa 1927 maran nasiwayta, ukat paqallqo wawanakapat pusirïkis ukätwa. Mä jiskʼa markanwa jakapjjayäta ukat utajajj laqʼa thaki jakʼankänwa. Utaj jakʼankirinakat jila partejj granjan irnaqapjjäna, ukajj nayatakejj wali askïnwa. Ukat 1947 maranjja, 19 maranïkayäta ukhaw mä vecinojajj Bibliat parlitu, jupajj Theunis Been satänwa. Qalltan jikisipkta ukhajja, janiw jupamp parlañ munirïkti, ukampis Payïr Jachʼa Chʼajjwäwi qhepatjja, Jehová Diosan Qhanañchiripäjjänwa. Ukat janiw nayrjamäjjänti, wali suma jaqëjjänwa. Uk uñjasajja, kunapachatï jupajj Diosajj aka Oraq mä paraíso tukuyani siskitäna ukhajj istʼjjayätwa. Ukat jankʼakiw uka cheqa yatichäwinakar iyawsayäta, ukat wali suma amigöjjapjjayätwa.a

Mayo 1948 maranwa yatiyañ qalltawayta, ukat Utrecht markanwa junio 20 urun mä jachʼa tantachäwin bautisasiwayta. Ukat enero 1, 1949 maranwa precursor regularjam irnaqañ qalltawayta, ukat Borculo markaruw khitapjjetu, Países Bajos marka Inti jalsu toqena. Ukanjja, mä jiskʼa tamaw utjäna. Ukar puriñatakejj 130 kilometronakwa sarañajäna, ukatwa bicicletat sarañ amtta. Sojjta horanakanwa purï sasaw amuyayäta, ukampis wal jalluntäna ukat thayas thaytʼanirakïna, ukat qhepat 90 kilometronaksa trenat sarkchiyätjja, 12 horanakatwa purta. Wali arumapuniw qorpachasiñajäkän ukar purta, jilat kullakanakasat mä familian utaparu, ukanwa precursorjam uka markan loqtkasajj qheparayäta.

Jachʼa chʼajjwäwi qhepatjja, jaqenakajj pobrekiw jakasipjjäna. Nayan mä jachʼa ternompi ukat mä jiskʼa pantalonampikiw utjitäna. Ukat kunjamtï qalltan siskayätjja. Borculo markankañajj wali chʼamänwa, ukampis Jehová Diosajj Bibliat walja yateqerinakampiw bendiciwayitu. Ukat llätunka phajjsitjja Ámsterdam markaruw khitjjapjjetu.

PATATJJA JACHʼA MARKARUW KHITJJAPJJETU

Nayajj pata markanwa jilsuwayta, jichhajj Ámsterdam (Países Bajos) jachʼa markan jikjjatasiyäta. Ukan yatiyañajj wali sumänwa. Llätunka phajjsinak yaqha cheqan irnaqtʼawayta ukat sipansa, aka markanjja nayrïr phajjsejj Bibliat apstʼat walja qellqatanakwa jaqenakar jaytawayta. Ukat jankʼakirakiw kimsaqallqonir Bibliat yatichayäta. Ukatjja, tamankir irpir chuymaninakan pʼeqtʼiripjamwa uttʼayapjjetu (jichhajj irpir chuymaninakat sarayiri sas uñtʼatäjjewa). Ukat taqenitak arstʼäwi arstʼañatakiw churapjjetu, janiw may kutis ukham arstʼkayätti, ukatwa wal ajjsarayasiyäta. Ukat arstʼañajatak uru janïr purinkipan yaqha tamar khitjjapjjetu ukhajj chuymas chuymaw jikjjatasiyäta. Walja maranak qhepatjja 5.000 jila arstʼäwinakwa arstʼawayta, ¡janipuniw ukham arstʼañaj amuykayätti!

Mayo 1950 maranjja, Haarlem markaruw khitapjjetu. Ukat tamanak tumptʼirïñatak invittʼapjjetu ukhajja, kimsa uruw jan sum ikkti. Ukat sucursalan irnaqtʼir Robert Winkler jilatampiw uka toqet parlta, janiw uk phoqhañatak wakichatäkti sistwa, ukampis jupajj akham situwa: “Uka papelanakar phoqhantaskakim. Yateqaskätawa” sasa. Ukat mä qawqha tiempotjja, tamanak tumptʼirïñatakejj mä phajjsiw wakichtʼapjjetu ukat jankʼakiw ukham irnaqtʼañ qalltawayta. Ukat mä tamar tumptʼkasaw Janny Taatgen kullakar uñtʼta, jupajj wali kusisita precursoränwa, Jehová Diosarus wal munasirakïna ukat janiw munañanakapak thaqkänti. Ukat 1955 maranwa jaqechasipjjta. Ukampis janïr sarnaqäwijat jukʼamp qhanañchkasajja, warmijaw kunjamsa jupajj precursorjam irnaqtʼañ qalltawayi ukat chacha warmjam servipjjta uk qhanañchtʼani.

DIOSAR CHACHA WARMJAMAW SERVIPJJTA

Janny: Mamajajj 1945 maranwa Jehová Diosan Qhanañchiripäjjäna, ukhajja nayajj 11 maranïskayätwa. Ukat kimsa wawanakapampi Bibliat yatjjatañ wakisitap jankʼakiw amuyäna. Ukampis tatajajj janiw Bibliat yatiñ munkänti. Ukat mamajajj tataj jan utankkäna ukhaw yatichapjjerïtu.

Ukat 1950 maran La Haya markan mä jachʼa tantachäwejj apaskäna ukaruw nayrïr kuti sarta. Mä seman qhepatwa Assen (Drenthe) markan Tantachasiñ Utajj utjkäna ukar nayrïr kuti sarta. Tatajajj wal colertʼasïna ukat utatwa alisnukutu. Ukat mamajajj akham situwa: “Kawkinsa jakasma uka yatjjtawa” sasa. Jilat kullakanakat parlaskatap sum amuyayäta. Qalltanjja, Jehová Diosan Qhanañchirinakapat uta jakʼan jakir mä familian ukaruw sarjjta. Ukampis tatajajj jan waltʼayaskakitanwa, ukatwa Deventer (Overijssel) markankir yaqha tamar sarjjta, ukajj utajat 95 kilometronak jayankiwa. Niyakejjay minus maranïskchïyätjja, tatajan utat jaqonukutap autoridadanakajj yatipjjän ukhajja, jan walinwa uñjasïna. Ukatwa utar kuttʼañajatak mayitu. Ukat jupajj janis Diosar iyawskchïnjja, tantachäwinakaru ukat yatiyir sarañat janiw jarkʼkitänti.

Utar kuttʼkayäta uka qhepatjja, mamajajj walpun usuntjjäna ukat nayaw utan lurañanak lurjjayäta. Ukhamäkchïnsa, Diosar yupaychañ toqet nayrar sartaskakiyätwa ukat 1951 maranwa bautisasta, ukhajj 17 maranïyätwa. Ukat mamajajj 1952 maran waliptjjäna ukhajja, kimsa kullakanakampiw precursor auxiliarjam pä phajjsi irnaqtʼta. Uma patjjan lurat mä utanwa jakasipjjayäta ukat pä jiskʼa markanwa Drenthe markan yatiyapjjta. 1953 maranwa precursor regularjam irnaqtʼañ qalltawayta. Mä mara qhepatjja, mä wayna jilataw tamanak tumptʼirjam tamar visittʼapjjetu. Jupasti Markusänwa. Ukat 1955 maranwa mayo phajjsin jaqechasipjjta, panpachanejj sumwa Jehová Diosar serviñäni sasaw amuyapjjta (Ecl. 4:9-12).

Markus: Jaqechasipjjta uka qhepatjja, Veendam (Groninga) markaruw precursorjam nayraqat khitapjjetu. Ukanjja, mä jiskʼa cuartonakwa jakasipjjayäta, largorojj 3 metroni ukat añchorojj 2 metroniraki. Warmijaw cuarto sum apthaptʼäna. Ukat sapa arumaw ikiñ waktʼayañatakejj mesa ukat pä jiskʼa sillanak kʼuchur jitkatayapjjerïta.

Sojjta phajjsi qhepatjja, tamanak tumptʼirjam irnaqtʼañajatakiw Bélgica markar khitapjjetu. Ukanjja, 4.000 yatiyirinakakiw 1955 maran utjäna. Jichhajja, 24.000 yatiyirinakaw utj-jje. Bélgica marka alay toqenkir Flandes markanjja, jaqenakajj kuna arunaktï Países Bajos markan parlapkäna uka pachpa arunakwa parlapjjäna. Ukampis Bélgica markankirinakjam arsuyañajj chʼamakïnwa, ukaw nanakatakejj qalltan chʼamänjja.

Janny: Tamanak tumptʼir sarañajj chʼamakïnwa. Tamanak tumptʼirejj bicicletatwa sarapjjerïta ukat jilat kullakanakan utapanwa qorpachasipjjerïta. Kunattejj mä tamat yaqha tamar visitir sarañatakejj janiw mä cheqajj qheparañatak utjapkitänti. Ukat qorpachasipjjerïta ukhatjja, martes alwaw yaqha tamar visittʼir sarapjjerïta. Ukhamäkchïnsa, Jehová Diosan bendicionapjamwa uñjapjjayäta.

Markus: Qalltanjja tamanakankir jilat kullakanakarojj janiw uñtʼapkayätti, ukampis jupanakajj wali munasiri ukat katoqtʼasirïpjjänwa (Heb. 13:2). Uka maranakanjja, walja kutiw holandés aru parlir tamanakarojj Bélgica markan visittʼapjjta. Ukat walja bendicionanakwa katoqapjjta. Holandés aru parlir niya taqe jilat kullakanakaruw uñtʼawayapjjta ukat walirak jupanakar munasipjjta. Walja wayn tawaqetanakaruw jilsuri, ajay toqet nayrar sartasin bautisasiri ukat Diosan Reinop nayrar uchirs uñjawayapjjta. Ukat yaqhepajj kunjamsa Diosatakejj taqe chuyma sapürunjam irnaqtʼasipki uk uñjañas wali kusiskañapuniwa (3 Juan 4). Ukham ‘maynit mayniru yanaptʼasiñaw’ kuntï lurapjjañajäki uk taqe chuym phoqhaskakiñatak yanaptʼawayapjjetu (Rom. 1:12).

JANIS CHIKÄPKCHIYÄTJJA, SUMA BENDICIONANAK KATOQAPJJTA

Markus: Jaqechasipkta ukhatjja, Galaad Escuelar wal sarañ munapjjayäta. Sapüruw mä horaksa inglés aru yateqapjjayäta. Niyakejjay libronakampikejj inglés aru yateqañajj chʼamakïchïnjja, vacacionatwa Inglaterra markar sarapjjta, ukhamat yatiykasin inglés aru yatsuñataki. Ukat 1963 maranwa Brooklyn markankir sucursalat mä sobre katoqapjjta. Ukan pä cartaw utjäna, mayajj nayataki ukat mayajj warmijataki. Nayar apayankitu ukanjja, tunka phajjsinak Galaad Escuelar sarañajatakïnwa. Ukanjja, jilatanakaruw Diosan markap sarayapjjañapatak wakichtʼasïna. Ukatwa 100 yateqerinakatjja 82 jilatanakäpjjayäta.

Janny: Cartanjja, Markusajj Galaad Escuelar sarkipanjja, Bélgica markan serviñatak qheparañ munasmati uk oracionampi amuykiptʼam sasaw sapjjetäna. Qalltanjja qʼala aynachtʼatäyätwa. Ukat chʼamachasitaj Jehová Diosajj janis bendiskaspa ukham amuyayäta. Ukampis Galaad Escuelajj kuna amtamp wakichtʼatasa ukwa amtasiyäta: ukar saririnakarojja oraqpachan Diosan arunakapat yatiyasiñ yanaptʼapjjañapatakiw wakichtʼapjje. Ukatwa Bélgica markan qheparañatak amtta ukat Gante markaruw precursor especialjam khitapjjetu, Anna ukat María Colpaert kullakanakampi, jupanakajj experienciani precursoräpjjänwa.

Markus: Niyakejjay inglés aru sum yateqañajächïnjja, Galaad Escuelar sarañatak phesqa phajjsi faltkipanwa Brooklyn sucursalar invittʼapjjetu. Ukanjja, Departamento de Servicio ukat Envios ukanwa irnaqayäta. Ukan irnaqtʼasa ukat Asia, Europa ukat Sud América uksa toqenakar Bibliat apstʼat qellqatanak apayañatak yanaptʼasajja, yaqha markan jilat kullakanakan utjatap sum amuyayäta. Jupanakat maynejj A. H. Macmillan jilatänwa, jupasti Russell jilatajj jakkäna uka tiempon peregrinjamaw (tamanak tumptʼiri) irnaqtʼatayna. Macmillan jilatajj chuymankipstata ukat niya oqaräkchïnsa, tantachäwinakarojj sarapunirïnwa. Uk uñjañajj chuymarupuniw purtʼitu ukat tantachasiñajj kunja wakiskirisa uk askit uñjañatakiw yanaptʼawayitu (Heb. 10:24, 25).

Janny: Markusamp nayampejj sapa semanajj walj kutiw carta apayasipjjerïta. ¡Purapat walpun llakisipjjerïta! Ukhamäkchïnsa, Markusajj Galaad Escuelanjj kusisitaw yateqaskäna ukat nayajj yatiykasajj kusisitaw jikjjatasirakiyäta. Ukat Markusajj Estados Unidos Markat kuttʼankäna ukhakamajja, nayajj 17 jaqenakaruw Bibliat yatichaskayäta. Nanakajj 15 phajjsinakaw jan chikapkayätti, ukampis ukham chʼamachasipjjatajatjja, Jehová Diosan bendicionap katoqawayapjjtwa. Markusajj kuttʼankäna uka urojja, kawkïr avionattï puriniñapäkäna ukajj walja horanakaw qheptʼäna. Ukat purinjjäna ukhajja, jachtʼasisaw qhomanttʼasipjjta. Ukhat aksarojj janipuniw jaljtapkti.

DIOSATAK IRNAQTʼAPJJATAJAT WALPUN YUSPÄRAPJJTA

Markus: Galaad Escuelat 1964 diciembre phajjsin kuttʼankayäta ukhajja, Betelan irnaqtʼapjjañajatakiw jawsapjjetu. Janis uka ratojj yatipkchiyätjja, janiw ukan walja tiempo qheparapjjañajäkänti. Ukat kimsa phajjsi qhepatwa Flandes markar tamanak tumptʼirinakan uñjiripjam khitapjjetu. Kunapachatï Aalzen ukat Els Wiegersma sat jilat kullakar Bélgica markar misionerjam khitapjjäna ukhajja, jupanakaw nanak lanti irnaqtʼjjapjjäna. Ukat nanakajj Betelaruw kuttʼawayjjapjjta, ukanjja nayajj Departamento de Servicio ukanwa irnaqtʼayäta. Ukat 1968 marat 1980 marakamajj sapa kutiw luräwinakajajj mayjtʼäna: Betelanwa irnaqtʼapjjayäta ukat tamanak tumptʼirjamas irnaqtʼapjjarakiyätwa. Qhepatjja, 1980 marat 2005 marakamajj tamanak tumptʼirinakan uñjiripjamaw wasitamp irnaqtʼjjapjjayäta.

Walja kutis luräwinakajajj mayjtʼkchïnjja, janipuniw Jehová Diosar taqe chuyma serviñatak amtawayapkta uk armasipkti. Kunanakantï irnaqtʼawayapjjta ukanak phoqhasajj wali kusisitaw jikjjatasipjjta, ukanakajj Diosan Reinop nayrar sartañapatakiwa sasaw taqe chuyma atinisipjjayäta.

Janny: Markusampi 1977 maran Brooklyn ukat 1997 maran Patterson sucursalar sarapkta ukajj wali kusiskañapunïnwa. Ukarojj Sucursal Sarayirjam wakichtʼasiñapatakiw Markusar invittʼapjjäna.

UNAS JIWASATAK WAKISI UK DIOSAJJ YATIWA

Markus: Khä 1982 maranjja, Jannyrojj operapjjänwa ukat waliptjjarakïnwa. Kimsa maranak qhepatjja, Lovaina markankir tamajj Tantachasiñ Uta patjjan utajj utjkäna ukwa churapjjetu. Jichhapuniw mä utajj utjapjjetäna, janipuniw 30 maranak nayrajj mä utajj utjapkitänti. Ukat sapa martesanak mä tamar tumptʼir sarañatak wakichasipjjerïta ukhajja, walja kutiw qʼepinak apaqaniñatakejj 54 gradanak makatirïta. Ukampis 2002 maran jan altus utankapjjañajataki wakichapjjäna ukat wal yuspärta. Ukatjja, 78 maranïkayäta ukhaw precursor especialjam Lokeren markar khitapjjetu. Diosatak ukham sapüru irnaqtʼasipkakitajat wali kusisitäpjjtwa.

Janny: Panpachanejja, 120 maranak jilaw Diosatak sapürunjam irnaqtʼasipkta. “Janiw kunapachas jaytkämati ni armtʼaskämasa” sasin Jehová Diosajj siskistu uk sumwa uñjawayapjjta. Ukat taqe chuyma, jan jitheqtas Jupar serviñäni ukhajja, ‘janiw kun pistʼaykistaniti’ uks qhan uñjapjjarakta (Heb. 13:5; Deu. 2:7).

Markus: Wayn tawaqöpkayäta ukhaw Jehová Diosar jakäwinakaj katuyasiwayapjjta. Ukhatpachjja, janipuniw kuna yänaksa nanakatak thaqhawayapkti. Ukat kawkharusa ukat kun lurañatakis khitapkchitänjja, taqe chuymaw phoqhapjjayäta, kunattejj taqe kunat sipansa Jehová Diosar serviñaw jukʼamp askejja.