Kunjam jaqëñasasa uk amuyasiñasawa

1, 2. Jehová Diosamp askit uñjatäñatakejja, ¿kunjam jaqëñasasa?

KUNSA jiwasat mayninakajj amuyapjje uka toqet taqeniw llakistanjja. Ukampis cristianjamajja, Jehová Diosamp askit uñjatañ toqetwa jukʼamp llakisiñasa. Kunattejj Jupaw taqe kunjjaru Munañani Diosajja, ukat ‘Juparakiw jakañ churirejja’ (Sal. 36:9, NM).

² Kunjam jaqëñassa Jehová Diosajj muni uka toqet parlkasajja, apóstol Pedrojj ‘Tatit chuyma jupar wali katuyasita jakapjjañasatakiw’ ewjjtʼistu (2 Pedro 3:11 liytʼasiñapawa). Jehová Diosampi askit uñjatäñatakejja, sarnaqäwisansa, amuyusansa ukat Diosar yupaychañansa qʼomäñasawa. Ukhamarusa, ‘Diosar katuyasitanakjamaw jakapjjañasaraki’, ukasti Jupar wali respetatassa ukat qawqsa munastan ukwa uñachtʼayañapa. Ukhamasti Jehová Diosamp askit uñjatäñatakejja, janiw luräwinakasanak amuyasiñapäkiti, jan ukasti kunjam jaqëktantejj ukansa amuyasiñaparakiwa. Kunattejj Jehová Diosaw ‘chuymanaka uñantirejja’, ukhamajja, sarnaqäwisajj qʼomäskiti ukat Jupar taqe chuymat yupaychasktan janicha ukjja sumwa yati (1 Cró. 29:17).

3. Diosamp askit uñjatäñ toqetjja, ¿kunanak jisktʼasiñasas wakisi?

³ Jehová Diosamp askit uñjatäñatak chʼamachasiñasjja, Supayajj janiw munkiti. Ukatwa, kunayman toqet Jehová Diosat jitheqtayañ munistu. Ukat Diosar jan yupaychjjañasatakejja, kunayman kʼarinakampiw sallqjañ munistu (Juan 8:44; 2 Cor. 11:13-15). Ukatwa akham sasin jisktʼasiñasa: “¿Kunjamsa Supayajj sallqjañ munistu? ¿Kunjamsa Jehová Diosamp sum apasiskaksna?” sasa.

¿KUNJAMSA SUPAYAJJ SALLQJAÑ MUNISTU?

4. Diosat jiwasar jitheqtayañatakejja, ¿Supayajj kun lurañsa muni, ukat kunatsa?

⁴ Discípulo Santiagojj akham sasaw säna: “Kunapachatejj maynejj uka jan wali amtatanakapampi atipjayasiskejja, ukkhaw tentacionarojj purejja”. Ukat “uka jan wali amtäwinakatwa juchajj sarti, ukatsti kunapachatejj uka juchajj jachʼäjje ukkhajja, jiwañakiw purinjjaraki” sasa (Sant. 1:14, 15). Diosat jiwasar jitheqtayañatakejja, Supayajj chuymasaruw purtʼañ munistu, kunattejj chuymanwa jan wali amuyunakajj qallti.

5, 6. 1) ¿Kuna toqnämsa Supayajj chuymasar purtʼañ munistu? 2) ¿Kuna jan wali amuyunaksa Supayajj chuymasar apantañ munistu, ukat kuna tiempotpachsa ukanakamp sallqjaski?

⁵ ¿Kuna toqnämsa Supayajj chuymasar purtʼañ munistu? Bibliajj akham siwa: ‘Taqe aka Oraqpachajja Supayan munañapankiwa’ sasa (1 Juan 5:19). Ukhamasti, Supayajj ‘akapachan utjki uka yänakapampiw’ sallqjañ munistu (1 Juan 2:15, 16 liytʼasiñapawa). Jiwasar sallqjañatakejja, waranq waranqa maranakaw Supayajj aka ñanqha pacha wakichawayi. Ukat niyakejjay aka ñanqha pachan jakstanjja, jan amuykañ sipitanakapar jan jaltʼañatakejj amuyasiñasawa (Juan 17:15).

⁶ Supayajj jan wali munañanakwa chuymasar apantañ munistu. Apóstol Juanajj ukanakat kimswa qhanstayi: 1) “janchin jan wali munañanakapa”, 2) ‘kuntï nayrajj uñjki ukanak munañanaka’ 3) “jachʼa jachʼa tukuñanaka”. Supayajj taqe ukanakampiw Jesusarojj wasaran yantʼäna. Niyakejjay Supayajj walja maranak ukanakampejj jaqenakar sallqjawaychejja, jichhürunakansa ukanakamp sallqjaskakiwa. Ukhamarusa, kunanakampitï apayasksna uk Supayajj sum yati ukat ukarjamaw sapa maynir yantʼi. Uka sipitanakar jan purtʼasiñatakejj kuns lursna uk janïr yatjjatkasajja, kunjamsa Supayajj ukanakampejj Evar sallqjäna ukat Jesusarus sallqjañ munäna uk yatjjatañäni, ukat kunsa sapa maynejj luräna uksa yatjjatarakiñäniwa.

“JANCHIN JAN WALI MUNAÑANAKAPA”

7. ¿Kunjamsa Supayajj ‘janchin munañanakapampi’ Evar sallqjäna?

⁷ Jaqejja, jakaskakiñatakejj manqʼañapaw wakisi. Ukatwa Jehová Diosajj aka Oraqjja, kunayman manqʼañanak jilarkir utjañapatak lurtʼawayi. Ukampis Supayajja, ukanakampiw Diosan munañap phoqhañat jitheqtayañ munistu. Kunjamsa Evarojj Diosat jitheqtayäna uk uñjañäni (Génesis 3:1-6 liytʼasiñapawa). “Askimpi ñanqhampi yatiñ churir qoqa[t]” manqʼantaskakim janiw jiwkätati. Ukat manqʼantäta ukhajja, Diosjamayätawa sasaw Supayajj Evar säna (Gén. 2:9). Uka arunakampejj Supayajj Evar akham siskaspas ukhamänwa: jakañatakejj janiw Diosar istʼañamapunejj wakiskiti sasa. Ukajj wali jachʼa kʼaripunïnwa. ¿Evajj kuns luraspäna? Jupajj akanak luraspäna: janiw Supayar istʼkaspänti ukat maysa toqetjja, kuntï Supayajj siskäna uka toqet lupʼiskakisajj qoqan achup manqʼañwa amtaspäna. Ukampis walja qoqan achunakap manqʼañatakis utjkchïnjja, Evajj jardín taypin utjkän uka qoqat lupʼiskakïnwa. ¿Ukat kuns luräna? “Mä achu apaqasinjja manqʼantänwa.” Kuntï Jehová Diosajj janiw manqʼapjjätati siskäna uk munañwa Supayajj chuymapar uchäna.

8. ¿Kunjamsa Supayajj ‘jañchin munañapampejj’ Jesusar sallqjañ munäna, ukat kunatsa amtapajj jan phoqhaskäna?

⁸ Jesusajj wasarankkaskäna ukhajja, ukhamarakwa Supayajj sallqjañ munäna. Niyakejjay Jesusajj 40 uru ukat 40 aruma jan manqʼatäkchïnjja, Supayajj Jesusan manqʼañ munañapatakejj akham sänwa: “Jumatejj Diosan Yoqapästajja, aka qalanakarojj tʼantʼar tukuyam” sasa (Luc. 4:1-3). ¿Jesusajj kuns luraspäna? Jupajj akanak luraspäna: manqʼañatakejj mä milagro luraspäna, jan ukajj janiw lurkaspänti. Jesusajja, jupan askip jikjjatañatakikejj janiw chʼamap apnaqañapäkänti uk sum yatïna. Manqʼat awtjatäkchïnsa, Jehová Diosamp sum apasiñaw jupatakejj jukʼamp wakiskirïnjja. Ukatwa akham säna: “Qellqatanjj siwa: ‘Janiw jaqejj tʼantʼa sapampikiti jakkani, jan ukasti taqe kuntejj Diosajj siski uka arunakampiw jakarakini’” sasa (Luc. 4:4).

‘KUNTÏ NAYRAJJ UÑJKI UKANAK MUNAÑANAKA’

9. ‘Nayrajj uñjki ukanak munaña’ siski uka arunakajja, ¿kuns amuytʼayistu, ukat uka munañampejj kunjamsa Supayajj Evar sallqjäna?

⁹ Apóstol Juanajj yaqha sipitatwa parlarakïna, ukajja ‘kuntï nayrajj uñjki ukanak munañawa’. Uka arunakajj ak amuytʼayistu: maynejj uñchʼukisakiw kuntï uñjki uk wal munjjaspa. Supayajj uka munañampiw Evar sallqjäna, akham sänwa: “Uka qoqan achunakapata manqʼapjjasma ukkhajj yatipjjasmawa kunatejj askïki, ukhamarak ñanqhäki ukanakjja” sasa. Uka qoqan achup uñchʼukiskakisajja, jukʼampiw manqʼantañ munjjäna. Ukhamänwa, jupajj “sumätapwa uñkatäna”.

10. ¿Kunjamsa Supayajj ‘kuntï nayrajj uñjki ukanak munañampi’ Jesusar sallqjañ munäna, ukampis Jesusajj kuns luräna?

¹⁰ ¿Kunjamsa Supayajj ‘kuntï nayrajj uñjki ukanak munañampi’ Jesusar sallqjañ munäna? “Taqe akapachan utjkis uka markanak Jesusarojj uñachtʼayäna. Sarakïnwa: ‘Nayajj taqe akapach markanakan munañanïñ churäma, ukanakan jachʼa kankañapampi [...]’” sasa (Luc. 4:5, 6). Jesusajj janiw cheqpachapun taqe uka markanak uñjkänti. Jan ukasti mä visión toqew Supayajj ukanak uñachtʼayäna. Ukhamat taqe uka markanak uñjasin apnaqañ munañapataki. Ukatsti Supayajj akham sänwa: “Jumatejj nayar killtʼasisin yupaychitätajja, taqpachaw jumankjjani” sasa (Luc. 4:7). Ukampis Jesusajj janiw kunjam jaqëñaptï Supayajj munkäna ukham jaqëñ munkänti. Ukatwa akham säna: “Qellqatanjja siwa: ‘[Jehová] Tatitu Diosamaruw yupaychäta, jupa saparukirakiw servïta’” sasa (Luc. 4:8).

“JACHʼA JACHʼA TUKUÑANAKA”

11. ¿Kunjamsa Supayajj Evar sallqjäna?

¹¹ Kunatï akapachan utjki ukanakat parlkasajja, apóstol Juanajj “jachʼa jachʼa tukuñanaka[twa]” arsurakïna. Adanampit Evampit amtañäni, taqe kunapatï jupanakan utjkäna ukanakjja, janiw khitirus jachʼa jachʼa tukusin uñachayapkaspänti, kunattejj jupanakakiw aka Oraqen jakasipjjäna. Ukampis jachʼa jachʼa tukupjjatapwa uñachtʼayapjjäna. ¿Kunjamsa? Kunapachatï Supayajj Evar yantʼkäna ukhajja, Diosajj askinakatsa jarkʼkaspa ukhamwa amuyayäna. Akham sasa: kunapachatejj jumanakajj “aski ukhamarak ñanqha yatiñ churir” qoqan achunakapat manqʼapjjäta ukhajja, “yatipjjasmawa kunatejj askïki, ukhamarak ñanqhäki ukanakjja, ukatsti Diosjamäpjjasmawa” sasa (Gén. 2:17; 3:5). Ukham sasinjja, Jehová Diosan yanaptʼap janiw munjjasmati sasaw Supayajj saskäna. Amuyatajja, jachʼa jachʼa tukutapatwa Evajj Supayan kʼari arunakapar istʼpachäna. Ukat janiw jiwkäti sasaw qoqan achup manqʼantäna. Ukham lurasajj pantjasipunïnwa.

12. ¿Kunjamsa Supayajj Jesusar yantʼañ munarakïna, ukat kunsa Jesusajj luräna?

¹² Ukampis Jesusajja, janiw Eva warmjam jachʼa jachʼa tukkänti, jan ukasti wali altʼat chuymanïnwa, ukajj wali yateqaskañapuniwa. Ukatjja, Supayajj kunatï jaqer wal muspharaykaspäna ukat Jehová Diosar yantʼkaspäna ukampiw yantʼañ munarakïna. Ukat Jesusatï Supayar istʼaspäna ukhajja, jachʼa jachʼa tukutapwa uñachtʼayaspäna uk Jesusajj sum yatïna. Ukatwa jan pächasis akham säna: “Qellqatanjja sarakiwa: ‘Janiw [Jehová] Tatit Diosamar yantʼätati’” sasa (Lucas 4:9-12 liytʼasiñapawa).

¿KUNJAMSA JEHOVÁ DIOSAMP SUM APASISKAKSNA?

13, 14. ¿Kunjamsa Supayajj jichhürunakan sipitapar jaltʼayañ munistu?

¹³ Kunjamtï Jesusarus ukat Evarus yantʼkänjja, ukhamarakiw jichhürunakan yantʼistu. Supayajj “janchin jan wali munañanakapa[mpiw]” jaqerojj yantʼi, ukhamat wachoqa juchar puripjjañapataki, jiljas manqʼapjjañapataki ukat umapjjañapataki. Ukatjja, ‘kuntï nayrajj uñjki ukanak munañampiw’ jaqerojj pornografía qʼañu luräwinak uñchʼukipjjañapatak wiyti, ukhamat khitinakatï jan amuyasipki ukanakar yantʼañataki, uka qʼañu luräwinakajj Internetanwa jilapartejj uñsti. Ukhamarusa, qamirïña, munañanïña ukat wali uñtʼatäña munapjjañapatakiw jaqerojj wiytaraki, ukhamat jupanakajj ‘jachʼa jachʼa tukupjjañapataki’.

¹⁴ Kunjamtï chawlla katurejj chawlla katuñatakejj likʼi apnaqkejja ukhamarakiw Supayajj akapachan yänakap jaqenakar sallqjañatak apnaqe. Chawllatakejja, likʼejj munkañawa, ukampis likʼi qhepäjjanjja sipitaw utji. Supayajj niya ukhamarakwa jaqenakamp luri, kunatï jakañatak wakiski ukanakampiw Jehová Diosan kamachinakap pʼakintayañ muni. Ukat kunanakatï sum jakasiñatak wakiski ukanakaw Diosan kamachinakap phoqhañat sipansa wali wakiskirejja sasinwa amuyayañ munistu. ¿Uka sipitar jaltʼañäniti?

15. ¿Kunjamsa Jesusat yateqasisajj Supayan sipitapar jan jaltʼksna?

¹⁵ Evajj Supayamp sallqjayasïnwa, ukampis Jesusajj janiw sallqjayaskänti. Qollan Qellqatanakat aytasajj akham sirïnwa: “Qellqatanjj siwa” sasa. Jiwasatï Bibliat sum yatjjatañäni ukat yatichäwinakaps sum uñtʼarakiñäni ukhajja, Supayan yantʼanakapar saykatañatakejj Biblian kawkïr jiskʼa tʼaqanakapas yanaptʼistaspa uk jankʼakiw amtañäni (Sal. 1:1, 2). Ukhamarusa, Jehová Diosar taqe chuyma nayra yupaychirinakapat lupʼiñajja, jupanakat yateqasiñatakiw yanaptʼistani (Rom. 15:4). Jehová Diosar taqe chuyma respetañäni ukat kuntï Jupajj munaski ukar munañäni ukat kuntï uñiski ukar uñisiñäni ukhajja, jan walinakatwa jarkʼaqasiñäni (Amós 5:15).

16, 17. ‘Amuytʼasirïñajja’, ¿kunjam jaqëñasatakis yanaptʼistani?

¹⁶ Apóstol Pablojj ‘amuytʼasirïpjjam’ sasaw ewjjtʼistu, ukhamat kunjam jaqëñastï Jehová Diosajj munki ukarjam sarnaqañasataki jan akapachan amuyunakaparjama (Rom. 12:1, 2, MT). Kunanaksa lupʼisktan uk amuytʼasiñasatakiw Pablojj amtayistu. Jupajj akham sänwa: “Ukhampï nanakajj tʼunjapjjtjja Dios contra jan wali parlanak utjatapjja, ukhamarak Diosan arunakapajj jan uñtʼatäñapataki jarkʼkis uka arunakarusa. Taqe jaqenakan amtatanakapsa Cristorukiw katuyapjjta, ukanakajj juparu istʼapjjañapataki” sasa (2 Cor. 10:5). Kuntï lupʼktan ukaw kunjam jaqëtansa uk uñachtʼayi, ukatwa kunanakatï Jehová Diosar kusisiyki ukanak lupʼiñasapunejj wakisi (Fili. 4:8).

¹⁷ Jiwasatï Diosatakjam sarnaqañ munstanjja, jan wali amuyunakassa ukat jan wali munañanakassa apanukuñasawa. Jehová Diosarojj “qʼoma chuyma[mpiw]” munasiñasa (1 Tim. 1:5). Ukampis ak amtapuniñäni: chuymasajj kʼarintiriwa, ukat akapachan utjki ukanakajj kunjamsa mayjtʼayistu ukanak janiw amuyasksnati (Jer. 17:9). Ukhamajja, kunjam jaqëtansa ukjja, Bibliarjamaw ‘yantʼasiñasa iyawsañanakasanjja suma chʼamanïtanti janicha uk yatiñataki’ (2 Cor. 13:5).

18, 19. Kunjam jaqëñastï Jehová Diosajj munki ukham jaqëñasatakejj ¿kunatsa chʼamachasiñasa?

¹⁸ Ukat ‘akapachan utjki ukanakampi’ jan apayasiñatakejja, apóstol Juanan aka arunakapwa amtañasa: “Akapachajj tukusirikiwa jan wali luräwinakapamppacha, ukampis kawkïritejj Diosan munañap lurki ukajj wiñayatakiw jaki” (1 Juan 2:17). Supayan apnaqat akapachajja, wali sumäkaspasa ukat wiñayatakïkaspas ukham amuyañjamawa, ukampis niyaw tukjatäni. Taqe kunatï akapachan utjki ukanakajj janiw wiñayatakïkiti. Uk amtañaw Supayamp jan sallqjayasiñatak yanaptʼistani.

¹⁹ Apóstol Pedrojja, kunjam jaqëñastï Jehová Diosajj munki ukham jaqëñasatakiw ewjjtʼistu. Ukatwa akham sistu: “Tatitun jutañap ursti suytʼapjjam, jankʼakïñapa munasa. Uka urojj alajjpachajj ninampi nakhantatäniwa, taqe kunas ninampirakiw umatatatäni” sasa (2 Ped. 3:12). Uka urojj niyaw purinini, ukhaw Jehová Diosajj Supayan aka ñanqha pachapar qʼal tukjani. Uka uru janïr purinkipanjja, Supayajj kunatï akapachan utjki ukanakampejj jaqenakar sallqjaskakiniwa, kunjamtï Evar sallqjkäna ukat Jesusar sallqjañ munkäna ukhama. Janipuniw Evat yateqasiñasäkiti jupajj munañanakapampikiw apayasjjäna. Ukham lursna ukhajja, Supayaruw diosasarjam tukuyasksna. Antisas Jesusat yateqasipjjañäni ukat Supayan sipitanakapajj wali munkañjamäkchispasa, janipun sallqjayasipjjañäniti. Jehová Diosajj kunjam jaqëñastï munki ukham jaqëñasatak chʼamachasipjjañäni.