Jehová Diosaw ‘jan waItʼañanakajan’ sapür yanaptʼaskitu
Usut jikjjatasisajj kunayman jan walinakansa uñjaskstjja, ukat ukanak aguantañajj awisajj chʼamäkchisa, munasiri Jehová Dios Awkisan yanaptʼap qhan amuyawayta. Ukat 20 jila maranakaw precursorjam kusisita loqtaskta.
Nayajj 1956 maranwa espina bífida sat usun nasiwayta. Kunattejj jikhanijanjja tubo neural satäki ukan jan sum jistʼthapisitapatwa ankunakajar wal usuchjitu, ukatwa sarnaqañajj nayatakejj wali chʼama ukat yaqha usunakampiw usuntayarakitu.
Janïr naskayäta ukhajja, awk taykajajj mä chacha warmi misioneronakampiw Bibliat yateqañ qalltapjjatayna. Jiskʼäkayäta ukhajja, Usakos (Namibia) markajan mä qawqha yatiyirinakakiw utjäna. Niyakejjay tamajj jan utjkchënjja, kunatï tantachäwitak wakichatäkäna uk familianjamakiw yatjjatapjjerïta. Paqallqo maranïkayäta ukhajja, mä operacionaruw mantta, ukat chhojjo mistuñapatakiw cuerpojan mä pʼiya lurapjjetu. Ukat 14 maranirojj tʼuku usumpiw usuntta. Ukat niyakejjay colegior sarañajj jayankchïnjja ukat awk taykajamp sum uñjatäñajajj wakischïnjja, janiw colegio tukuyawaykti.
Ukhamäkchïnsa, Jehová Diosampi sum apasiñatakiwa chʼamachasiwayta. Bibliat apstʼat qellqatanakasat janiw afrikaans arut utjkänti. Ukatwa libronak liyiñatakejj inglés aru liyiñ yateqawayta. Ukatjja, Bibliat yatiyjjarakiyätwa ukat 19 maranïkayäta ukhaw bautisasta. Ukhat aksarojja, pusi maraw kunaymanit usuntawayta ukat chuyma toqets janiw sum jikjjataskayätti. Ukhamarusa, markajan taqeniw sum uñtʼasipjjayäta, ukatwa yatiyir sarañ ajjsarayäta.
Ukat 20 jila maranïkayäta ukhajja, Sudáfrica uksa toqeruw Namibia markar jakaskir sarjjapjjta, ukhapuniw nayrïr kutejj mä tamampi tantachasta. ¡Wali kusiskañapunïnwa! Ukampisa wasitatwa yaqha operacionar mantta, jichhajj colostomía ukwa lurapjjetu.
Mä qawqha tiempotjja, tamanak tumptʼir jilataw precursorjam irnaqtʼañ toqet arstʼäna. Arunakapajj chuymajarupuniw purtʼitu. Precursorjam irnaqtʼañatak jan kʼumaräjatajj sum yatiyäta, ukampis kunjamsa Jehová Diosajj jan waltʼañanakan yanaptʼitäna uk sum uñjawayta. Ukatwa precursor regularäñatak solicitud phoqhantta. Ukampis usutätajatjja, irpir chuymaninakajj janiw munapkänti.
Ukhamäkchïnsa, jukʼampi yatiyañatakiw chʼamachasta. Mamajana ukat yaqha jilata kullakanakan yanaptʼapampejj qawqha horanaktï precursoranakajj irnaqtʼapjje uk sojjta phajjsiw phoqta. Ukhamatwa precursoräñ munatajsa ukat phoqherjamätajsa uñachtʼayta. Ukat wasitatwa precursoräñatak solicitud phoqhantta, ukat iyaw sapjjetuwa. Septiembre 1, 1988 maranwa precursoräñ qalltawayta.
Precursorjamajja, kunjamsa Jehová Diosajj sapürunjam yanaptʼawayitu uk qhan uñjawayta. Jaqenakar Bibliat yatichañajja, usujat jan sint llakisiñataki ukat Diosamp sum apasiñatakiw yanaptʼawayitu. Jehová Diosaru jakäwip katuyasipjjañapataki ukat bautisasipjjañapatak waljanir yanaptʼasajj wali kusisitapuniw jikjjatasta.
Usutakïsktwa, ukampis Jehová Diosaw ‘jan waItʼañanakajan’ sapür yanaptʼaskitu (Sal. 68:19). ¡Jupajj janiw sum jikjjatasiñajatakik yanaptʼkituti, jan ukasti walwa bendeciwayarakitu!