AKA REVISTA LIYTʼIRINAKAN JISKTʼÄWINAKAPA

¿Cristiano awk taykanakajj tamat jaqsut wawapampejj tantachäwinakan qontʼasisipkaspati?

Khitinakatï tamat jaqsutäpki ukanakajj Tantachasiñ Utan kawkharus qontʼasisipki uk uñchʼukiñajj janiw wakiskirïkiti. Yatiyañataki revistajja, tamat jaqsuta ukat jupamp chika jakapki uka wawaparojj Diosar yupaychañ toqet yanaptʼañ wakischi ukhajj yanaptʼapjjaspawa sasaw awk taykanakarojj chʼamañchtʼapuni. Kunjamtï La Atalaya noviembre 15, 1988, 19 ukat 20 jananakan qhanañchi ukarjamajja, awk taykanakajj utapan jakki ukat tamat jaqsutäki uka wawapampejj Bibliat yatjjatasipkaspawa. Ukaw wawaparojj Diosatakjam wasitat sarnaqañatakejj chʼamañchtʼaspa.

Tantachasiñ Utanjja, tamat jaqsut wawatï mayninakar jan mayjtʼaykani ukhajja, awk taykapamp chik qontʼasisipkaspawa. Tamat jaqsutanakarojj qhepäjjarupuniw qontʼasiñama sasin janiw saskiti. Ukhamajja, tamat jaqsutäki uka wawajj awk taykapamp chik qontʼasiskaspawa. Cheqansa, wawapajj tantachäwinakan sumti istʼaski ukat askinak yateqaskiti ukwa awk taykajj sum uñjañ munapjje. Ukat jupanakampi chik qontʼasisajja, kuntï tantachäwin arstʼasiski jan ukajj yatichasiski ukanak sumti istʼasipki ukat yateqasipki, uk qhanwa amuyapjjani.

Ukat tamat jaqsut wawatï awk taykapamp jan jakjjchi ukhajja, ¿kunjamäspasa? ¿Awk taykapamp qontʼasisipkaspati? Nayrajja, mä cristianojj tamat jaqsut familiaranakapajj jan pachpa utan jakapki ukanakamp chikachasiniti janicha uk sumwa Bibliat apstʼat qellqatanakasan amuytʼayäna.a Ukampisa, tamat jaqsutajj tantachäwinakan familiapamp chik amuki qontʼasi ukajja, janiw pachpäkiti kunapachatejj familiaranakapajj aleqat tamat jaqsutampi chikachasiñatak thaqhapki ukampejja. Ukampis familiaranakatï kunjamsa tamat jaqsutar uñjasiñapa ukarjam uñjasipkani ukat Biblian ewjjanakaparjam phoqhañatak chʼamachasipjjarakini ukhajja, tantachäwinakan tamat jaqsutajj jupanakampi qontʼasiniti janicha ukajj janiw añcha wakiskirïkiti (1 Cor. 5:11, 13; 2 Juan 11).

Tamat jaqsutatï tantachäwinakana familiapamp chika jan ukajj tamankir mayni jilat kullakanakamp chika aleqaki qontʼasiskani ukhajja, janiw llakisiñajj wakiskiti. Awisajja, Tantachasiñ Utan kawkharus maynejj qontʼasiñapa uk amtañajj yaqha jan walinakaruw aparakispa. Ukhamasti familiasa ukat taqe khitinakatï tantachasipki ukanakas kunjamsa tamat jaqsutanakar uñjañasa uka toqet Bibliajj ewjjtʼkistu ukarjam sarnaqapjjani, ukat tamat jaqsutajj kawkhansay qontʼasiskpan mayninakar jan mayjtʼaykani ukhajja, tamankir jilata kullakanakajj janiw uka toqet sint llakisipjjañapäkiti.