Nayrar sartañamatakejj ‘thakim sum askicham’

KHÄ 537 nayrïr pacha maranjja, kunjamsa israelitanakajj Babiloniat mistusajj Jerusalenar puripjjani sasaw Jehová Diosajj llakisïna. Ukatwa akham säna: “Markajjatakisti thaki wakichapjjam. Uka thaksti wali amuyumpi lurapjjarakim, qalanaksa qʼal willsupjjam” sasa (Isa. 62:10). ¿Kunjamsa judionakajj uk phoqapjjchäna? Inas yaqhepajj thakin jan walinak askichañatak nayrtʼapjjchïna, ukhamat mayni israelitanakajj uknam sumaki pasapjjañapataki.

Jehová Diosar jukʼamp yupaychañatakejj walja amtanakaw utjistu, ukanak phoqañatakejja ukhamarakiw thakis sum askichañasa. Diosajj uka thakit jan jitheqas nayrar sarsna ukwa muni. Ukatwa akham sistu: ‘Kayumajj sarkani uka thaki askicham, thakinakamjja sum uttʼayam’ sasa (Pro. 4:26, NM). Uka ewjjajj taqenitakiwa.

SUMA AMTANAKAMPI THAKIM ASKICHAM

Wayn tawaqonakat parlkasajja, jaqenakajj akham sapjjewa: “Waynjamas tawaqjamas nayraruw sartapjjani” sasa. Jilapart wayn tawaqonakajj kʼumara, chʼikhi, chʼamani ukhamäpjjewa, nayrar sartañatakis wal chʼamachasipjjaraki. Ukatwa Bibliajj sispacha: ‘Wayn tawaqonakan jachʼachasiñapajj chʼamapankiwa’ sasa (Pro. 20:29, NM). Ukhamajj maynitejj kunanaktï lurañ yatki ukanakampi Diosar jukʼamp serviñatak chʼamachasini ukhajja, amtanakapsa sum phoqaspa, ukat kusisitarakïspawa.

Akapachanjja, Jehová Diosan markapankir wayn tawaqonakajj wali askit uñjatäpjjewa. Sañäni, mä cristian tawaqoru jan ukajj mä waynaru suma notanak apsur uñjapjje ukhajja, yatichirinakas yateqer masinakasa, ‘jachʼa yateqañ utanakaruw mantañama’ sasaw chʼamañchapjje, ukhamat akapachan nayrar sartañapataki. Ukhamaraki maynitï kunan sum anattʼañ yatchi ukhajja, wali suma anatirit uñtʼatäñapatakiw chʼamañchapjjaraki. ¿Ukhaman uñjasirïtati? Jan ukajj ¿ukhaman uñjasiri wayn tawaqonakaruch uñtʼta? ¿Kunas maynirojj suma amtar puriñatak yanaptʼaspa?

Bibliaw suma thakin sarañamatakejj yanaptʼiristam. Eclesiastés 12:1 qellqatajj siwa: “Waynäkasina jumar irnoqer Diosamat amtasim, janïra chʼama tukuña urunakajj, ukhamarak maranakasa purinkipana” sasa. ¿Kunjamsa “jumar irnoqer Diosamat” amtasisma?

Africankir Erica sat mä jilatat parltʼañäni. Jupajj wal pelot takiñ munirïna. 15 maranëjjän ukhajja, markapankir mä jachʼa equipor mantañapatakiw uñchʼukipjjäna. Mä qawqha tiempotjja, Europa markaruw entrenamiento katoqer saraspäna, ukhamat pelot takiñan nayrar sartañataki. Ukampis ukham lurasajja, ¿Diosapat amtasispänti? ¿Kunsa Eric jilatajj lurpachäna ukat kunsa jupat yateqassna? Uk uñjañäni.

Escuelankkasaw Eric jilatajj Bibliat yateqañ qalltäna, ukanjja ‘Jehová Diosaw taqe jan walinak chhaqtayani’ sasaw yateqäna. Ukhamajj Diosan munañapa lurañatakejj qawqha wakiskirisa tiempo apstʼasisa chʼamachasiñajja ukwa amuyäna. Eric jilatajj pelot takirita wali uñtʼatäñat sipansa, Diosar serviñatakiw bautisasjjäna ukatjja ajay toqet nayrar sartañatakiw chʼamachasjjarakïna. Mä qawqha tiempotjja, irpir chuymaninakan yanapiripjamaw irnaqjjäna, qhepatsti Soltero Jilatanakan Bibliat Yatjjatapjjañapatak Escuelaruw sararakïna.

Jupatï pelot takiñ ajllispäna ukhajja, inas wali uñtʼata, qamiri ukhamächispäna. Ukampis jupajj aka qellqatat sum yatïna: “Qamiristi amuyasiwa jupan yänakapajj, mä markar alto perqanakampi muyuntatäkaspa ukhama” sasa (Pro. 18:11). Kunjamtï ukan siskejja, maynejj qollqenïsajj wali suma jarkʼaqatäkaspasa ukhamaw amuyasispa, ukampis ukajj inamayakiwa. Cheqas qamirïñ munirinakajj jukʼampiw “tʼaqhesiñampi yapjjatasipjje” (1 Tim. 6:9, 10).

Walja wayn tawaqonakaw Diosar sapüru serviñ amtawayapjje, ukham lurasajj wal kusisipjje, jan walinakatsa jarkʼaqasipjjarakiwa. Eric jilatajj siwa: “Jichhajj precursorjamaw irnaqtʼaskta. Ukanjja, wali kusisitaw jikjjatasta, walpun Jehová Diosarojj yuspärta, jupaw kusisiñar apiri thakin sarañatak yanaptʼawayitu” sasa.

¿Jumasti? Akapachan nayrar sartañat sipansa, precursoräñatak chʼamachasim, ukhamat thakim sum askichañataki. (“Universidadajj janiw kusisiñ churkistuti” sat recuadro uñjjattʼäta.)

KUNATÏ JARKʼKIRISTAM UK APANUKUM

Mä chacha warmejja, Estados Unidos markankir Betelaruw visitapjjäna, ukanwa walja betelitanakar wali kusisit irnaqasipkir uñjapjjäna. Qhepatjja, kullakajj sänwa: “Diosatak mä qawqha lurasajj waliksa lurasipkirista ukhamaw amuyasipjjayäta” sasa. Ukatwa chacha warmejj Jehová Diosar jukʼamp serviñ amtapjjäna.

Qalltanjja, kunanaktï lurañ amtapkäna uk phoqañajj jupanakatak wali chʼamänwa. Ukampis mä uruw Sapüru yatjjatañataki sat folleton Juan 8:31 qellqat liytʼapjjäna, ukansti Jesusajj sänwa: “Jumanakatejj cheqpach saytʼapjjäta [jan ukajj jaysapjjäta] kuntejj sapjjsma ukhamarjama ukkhajja, nayan cheqpacha discipulonakajjaw tukupjjäta” sasa. Ukatwa jachʼa utap aljapjjäna, ukat kunanakapatï utjkäna ukanaksa ukhamaraki. Ukjjarusti kawkïr tamatï yanaptʼa munkäna ukaruw sarjjapjjäna. Jichhajj precursorjamaw irnaqtʼasipki, Tantachasiñ Utanak luräwinsa kimsa uru jachʼa tantachäwinsa ukhamarakiw yanaptʼasipki. Ukham lurasajj ¿kunjamas jikjjatasipjjpacha? Jupanakajj akham sapjjewa: “Jan sinti yänakat llakisisasa, Diosan markapar yanaptʼasasa wali kusisitaw jikjjatasipjjta” sasa.

NAYRAR SARTASKAKIM

Salomón reyejj sänwa: “Nayraqatarupuni uñtam, kunatejj nayraqatamankki ukarupuni uñtam” sasa (Pro. 4:25, Aymar Biblia). Kunjamtï mä auto apnaqerejj nayraqatarupuni uñtkejja, ukhamarakiw jiwasajj nayraqatar uñtañasa, amtanakas phoqañkama. Diosar jukʼamp serviñatjja janipuniw kunampis apaqayasiñasäkiti.

Diosar jukʼamp yupaychañatakejj ¿kun lurañsa amtasma? Precursorjamaw irnaqtʼasma. Ukat kawkïr tamanakantï walja yatiyirinakajj munaski ukaruw sarasma, jan ukajj kawkhantï irpir chuymaninakasa, yanapirinakapasa munaski ukaruw sararakisma. ¿Ukanakar yanaptʼir sarañ munasmati? Tamanak tumptʼirimpiw ukjjat parltʼasma. Jichhajj jumatï jaya cheqanakar sarañ munstajja, kawkïr tamanakas yanaptʼa munasipki uksa yatjjatarakismawa.b

Qalltan Isaías 62:10 qellqatat parlktan uk amtañäni. Yaqhep judionakajj thakin kuna jan walinakatï utjkäna ukanak askichasajj wal irnaqtʼapjjpachäna, ukhamat israelitanakajj Jerusalenar sum puripjjañapataki. Ukham chʼamachasitanakapajj janiw inamayäkänti, Jerusalenarojj sumaw puripjjäna. Jichhajj jumatï Jehová Diosar jukʼamp serviñataki chʼamachasiskstajja, amtanakam phoqañkam saraskakim, Jehová Diosaw yanapaskätam. Ukatjja, thakit apaqañ munktam ukanakatjja amuyasim, Jehová Diosarus yatiñkankaña mayirakim. Jupaw ‘thakim sum askichañjja’ yanapätam (Pro. 4:26, NM).