Cheqa yatichäwejj Inti jalsun qhantʼi

JAPÓN markan nacir mä peregrinoruw (tamanak tumptʼiriruw) 1926 septiembre phajjsi sojjta urunjja, Estados Unidos markat misionerjam Japonar khitasïna. Juparojja, La Torre del Vigía sat revista katoqañatak mä qellqayasirikiw katoqäna. Uka qellqayasirejj mä gruporuw Kobe markan Bibliat yatichañ qalltatayna. Ukhamajja, 1927 enero 2 uruw Bibliat Yatjjatirinakajj nayrïr jachʼa tantachäwip apapjjäna. Ukansti, 36 jaqenakaw tantachasipjjäna, kimsaqallqoniw bautisasipjjarakïna. Ukampis ¿kunjamatsa Japón markankiri 60 millón jaqenakarojj Bibliat yatichapjjaspänjja?

1927 mayo phajjsinjja, discursonaka istʼapjjañapatakiw Bibliat Yatjjatirinakajj invittʼañ qalltapjjäna. Nayrïr discursojj Osaka markanwa apasïna. Ukatakejj markpachanwa letreronaka cartelanaka uskupjjäna, 3.000 invitacionanakwa munañan jaqenakar apayapjjäna. Ukatjja, 150.000 invitacionanakaw lakirasïna, periodiconakansa, 400.000 trena boletonakansa yatiyasirakïnwa. Discurso istʼañ urojja, pä avionatwa uka markpachar 100.000 invitacionanak willtanipjjäna. “Diosan Reinopajj jakʼankjjewa” sat discurso istʼañatakejja, Osaka markankir Asahi sat localarojj 2.300 jaqenakaw phoqantapjjäna. Niya mä ukhampiw jilarapjjarakïna. Discurso tukuyaru jisktʼäwimpi qhanañchäwimpi utjkäna ukarojj 600 jaqenakaw qheparapjjäna. Qhepatsti, Kioto markampina yaqha markanakampinwa Bibliat apstʼat discursonakajj arstʼasirakïna.

1927 octubre phajjsinjja, Bibliat Yatjjatirinakajj Tokio markan discursonak arstʼañ amtapjjäna. Ukatakejj wasitampiw munañan jaqenakarojj invitasïna, gobiernon nayrïr ministroparu, autoridadanakaru, religionanakan militaranakan pʼeqtʼirinakaparu. Letreronaka periodiconak toqew yatiyasïna, 710.000 invitacionanakaw lakirasirakïna. Japón markan capitalapan arstʼaskäna uka kimsa discursonak istʼañatakejj 4.800 jaqenakaw tantachasipjjäna.

COLPORTORANAKA

Reinot yatiyañatakejj walpun colportoranakajj (precursoranakajj) yanaptʼawayapjje. Matsue Ishii sat nayrïr colportorampi Jizo chachapampejja, niya Japón markpach Reinot parlas muytapjjäna: Sapporo, Sendai, Tokio, Yokohama, Nagoya, Osaka, Kioto, Okayama, Tokushima sat markanaka. Ishii kullakampi Sakiko Tanaka kullakampejj kimono sat isinakap uchtʼasisaw gobiernonkirinakar yatiyiris sarapjjäna. Jupanakat maynïrejj El Arpa de Dios ukat Liberación sat libronak carcelanakataki mayïna, sapa mayatjja 300.

Katsuo Miura jilatampi Hagino kullakampejj Ishii kullakatwa libronak mayisipjjäna, ukatsti jankʼakiw cheqätap amuyapjjäna. 1931 maran bautisasisajja, colportoranakjam serviñ qalltapjjäna. Haruichi Yamada jilatampi Tane kullakampi familianakapampejj 1930 mara nayraw Diosan Reinopat yateqapjjarakïna. Haruichimpi Tanempejj colportorjam serviñ qalltapjjäna, Yukiko phuchapasti Tokio Betelanwa servjjarakïna.

JEHÚ SAT CARRONAKA

Uka tiemponjja, auto alasiñajj wali jilänwa, thakinakas janirakiw walïkänti. Ukatwa Kazumi Minoura jilatampi yaqha colportoranakampejj llantan utanakat yatiyir sarapjjerïna. Ukarusti, Israel markan Jehú sat reyipajj carro apnaqerïkäna uk amtasawa, Jehú sas sutichapjjäna (2 Rey. 10:15, 16). “Jachʼa Jehú” satajj kimsaw utjäna, largorojj 2,2 metronïnwa, añchorojj 1,9 metroni, altorusti 1,9 metroniraki. Sapa mayarojj sojjtaniw mantapjjerïna. Ukat sucursalanjja, bicicletampi qatatnaqaña “wawa Jehú” sat 11 carronakwa lurapjjarakïna. Ukarusti paninikiw mantäna. Kiichi Iwasaki jilataw ukanak lurañ yanaptʼäna, jupasti siwa: “Sapa carrojj mä carpani, luzatakis auto bateriani ukhamänwa” sasa. Colportoranakajj Jehú sat carronakampiw cheqa yatichäwinakjja, Japón markpachan yatiyapjjäna. Jupanakasti uka carronakas nuktʼata qatattʼata ukhamaw qollu qollunakana vallenakana sarnaqapjjäna. Hokkaido sat alay markat Kyushu sat aynach markakama.

Ikumatsu Ota sat colportorajj siwa: “Mä markar purisajj uka carronak jawir lakaru jan ukajj mä pamparuw saytʼayapjjerïta. Ukat autoridadanakar nayraqat yatiyasajja, taqenin utaparuw qellqatanak apapjjerïta. Yatiyañ tukuyasajja, yaqha markaruw pasapjjarakirïta” sasa.

1927 maran Bibliat Yatjjatirinakajja, Kobe markan nayrïr jachʼa tantachäwinjja, kimsa tunk sojjtanikiw tantachasipjjäna, ‘jan yäqañjam jiskʼa qalltäwikïnwa’ (Zac. 4:10). Ukampis phesqa maranak qhepat 1932 maranjja, colportoranakampi mayni yatiyirinakampejj patak kimsaniw informapjjäna, 14.000 libronak churapjjatayna. Jichhajj Japón markan callenakapansa qhatunakapansa wali sum yatiyasipkaraki. Niya 220.000 yatiyirinakaw uka Inti jalsu toqenkir markanjja cheqa yatichäwinak qhantʼayasipki. (Japón markat qellqanita.)