¿YATIYÄTATI?

Nayra Roma markankir mä oficialajj ¿kunanaksa lurañapäna?

Griego Qollan Qellqatanakajj Roma markankir walja oficialanakatwa (centurión) parli. Jesusar jiwayapkäna uka soldadonakan pʼeqtʼiripajj oficialänwa, Cornelio chachas ukhamarakïnwa, jupajj jan judiöpkäna ukanakat nayrïr cristianönwa. Apóstol Pablor tʼaqhesiykäna uka chachasa ukat Julio sat soldados oficialarakïnwa, jupajj Roma markakamaw Pablor irpäna (Marcos 15:39; Hechos 10:1, nota, NM; 22:25; 27:1, nota, NM).

Ejerciton mä oficialapajja, pataka soldadonakaruw pʼeqtʼäna. Ukajj 50 jan ukajj 100 soldadonakänwa. Uka oficialajj soldadonakaparuw yatichäna, cheqañchäna ukhamarak armamentonakapsa, qʼepinakapsa revisäna ukat kun lurañatakis jupaw pʼeqtʼäna.

Soldadonakajj mä oficialjam irnaqañatakiw wal chʼamachasipjjerïna. Oficialjam irnaqañ munapkän ukanakajj pʼeqtʼañ sum yatipjjañapäna. Ukhamatakwa Roma ejercitojj suma wakichtʼataspäna. Mä qellqatarjamajja, mä oficialajj “wali experienciani ukat ejercitot wali yatjjattʼata chachañapänwa”.

Espejonakajj nayra tiempon ¿kunjamänsa?

Nayra tiempon utjkäna uka espejonakajj jichha tiempon utjki uka espejonakat sipan mayjänwa. Yaqhepanakajj metalat lurtʼatänwa, ukampis sum kʼajtañapatakejj wali sum khitsupjjerïna, ukajj cobreta, electrota, qollqeta, qorit kunaw utjäna. Tabernáculo lurañ qalltapkän ukhaw Biblian nayrïr kuti aytasi, uka cheqanwa israelitanakajj Diosar yupaychañ qalltapjjäna. Uk lurañatakejj warminakaw espejonakap churapjjäna, ukampiw mä tinaja jan ukajj mä jachʼa fuente lurapjjäna ukat ukan uchañapas cobret luratänwa (Éxodo 38:8). Taqe ukanak lurañatakejja, espejonakajj umatatayasiñapänwa.

Oraq allirinakajj Israel markansa, uka jakʼankir yaqha cheqanakansa, warminakan joyanakapa ukat yaqha ukham kʼachachasiñanakamp chikwa espejonak jikjjatapjjatayna. Uka espejonakat jila partejj janiw suma moroqʼokänti ukat katuñapajj maderata, metalata, jan ukajj marfilat luratänwa, ukarojj warmir uñtasit khitsupjjerïna. Uka espejonakan qhepäjjapajj janiw suma kʼajkir khitsutäkänti.

Nayra tiempon utjkän uka espejonakajj uñkatasiñatakejj janiw suma qhanäkänti. Ukatwa apóstol Pablojj akham sispachäna: “Jichhajj taqe kunas jayphukjamaki mä espejotjam uñjasktanjja” sasa (1 Corintios 13:12).