Jehová Diosar munasiñaw aguantañatak yanaptʼawayitu

KHÄ 1970 chika maranjja, Hospital General Valley Forge sat qollayasiñ utanwa mä ikiñankaskayäta. Ukajj Phoenixville (Pensilvania, Estados Unidos) markankiwa. Ukanjja, mä enfermerow chuymajajj kunjamas putoqeski uk sapa 30 minutot uñjitäna. Nayajj 20 maranikïskayätwa, mä jan wali usumpiw tʼaqhesiskayäta. Uñjkitäna uka enfermerojj nayat mä qawqha maranak jilïrikïnwa, nayar uñjasajj wali llakitaw jikjjatasïna. Jukʼampikiw aynachtʼjjayäta, ukatwa enfermeror akham sista: “¿Janejjay ni may kutis mä jaq jiwir uñjktatejja?” sasa. Sustjasisajj sarakitänwa: “Janiwa, janiw uñjirïkti” sasa.

“Jiwjjpachäyäwa” sasaw sayäta. Kunjamatsa hospitalan uñjasta uk jichhajj mä jukʼa parltʼapjjäma.

KUNJAMAS GUERRAJJ UK UÑJTA

Vietnam sat markan guerrajj utjkäna ukanjja, usutanakar operaski uka utan trabajkasaw mä jan wali usumpi usuntayäta. Ukan irnaqañajj wal gustitäna, usutanakampiru usuchjatanakampiru yanaptʼañajj wali khusapunïnwa, ukhamarus operir (cirujano) doctoräñwa munayäta. Julio 1969 maranwa Vietnam markaru purta. Mayninakarjamarakiw uka markar yatinoqtañatakisa, calorar yatinoqtañatakisa, mä semana yanaptʼapjjetäna.

Dong Tam markan jaqenakar operañatak hospitalajj utjki ukar puriyäta uka qhepatjja, walja helicopteronakaw jiwatanak phoqantata purinipjjäna, uka hospitalajj Mekong jawir jakʼan jikjjatasi. Nayajj markajar wal munasiyäta, trabajiñsa wal munarakiyäta, ukatwa ukaratpach trabajiñ qalltaña munayäta. Usuchjatanakaru operañataki wakichtʼasajja, jankʼakiw fierrot lurat jiskʼa utanakar apatäna. Uka utanakajj juntʼuptayiri, thaytʼayir maquinanakanïnwa, ukanwa operacionanakajj lurasïna. Ukanjja, mä cirujano, anestesia uchiri ukat pä enfermeronakaw jaqenakar qhespiyañataki wal chʼamachasipjjäna. Helicopteronkkäna uka chʼiyar bolsanakjja janiw apaqapkänti. ‘Guerran jiwapki uka soldadonakan chikat cuerponakapaw ukanki’ sasaw qhepat awisapjjetäna. Taqe ukanakwa guerran uñjawayta.

DIOSAT YATIÑ MUNTA

Waynäjjayäta ukhaw Jehová Diosan Qhanañchirinakapan cheqa yatichäwinakap yateqayäta. Mamajaw jupanakampi Bibliat yatjjatäna. Ukampis janiw bautisaskänti. Kunapachatï mamajajj Bibliat yatjjatkäna ukhajj nayajj jupampi chiktʼatapunïrïtwa. Mä kutejja, padrastrojampiw Jehová Diosan Qhanañchirinakapan mä Tantachasiñ Utap nayraqat pasapjjayäta, juparusti jisktʼayätwa: “¿Kunas ukajja?” sasa. Jupasti sarakitänwa: “¡Janipun uka jaqenakampi chikachasimti!” sasa. Padrastrojarojj wal munasiyäta, ukatsti respetarakiyätwa, ukatwa arunakapar istʼasajj jupanakat jan kuns yatjjayätti.

Vietnam markat kuttʼanjjasajja, Diosat wal yatjjatañ munayäta. Kunanaktï guerran uñjkayäta ukanakajj wal llakisiyitäna. Kunanakas Vietnam markan pasaskäna ukanak janjamakiw khitis amuykänti. Marcha luririnakajja, Estados Unidos markankir soldadonakarojj wawa jiwayirinaka sasaw sapjjerïna, uksa sum amtasirakta. Jan juchani wawanakaruw guerran jiwarayapjjerïna, ukatwa ukham sapjjäna.

Bibliat wal yatjjatañ munasajj kunayman iglesianakaruw sarirïyäta. Diosarojj munasiyätwa, ukampis sarkayäta uka iglesianakan luratanakapajj janiw walïkänti. Qhepat 1971 febrero phajjsin mä domingo urojja, Delray Beach, Florida markankir Jehová Diosan Qhanañchirinakapan Tantachasiñ Utaparuw sarta.

Ukar mantkta ukhajj taqenitaki arstʼäwejj niyas tukuyjjchïnjja, Yatiyañataki revistat yatjjatañatakiw qheparta. Kuna toqetsa uka revistan parlasïna uk janiw amtaskti. Ukampis kunjamsa wawanakajj textonak Biblianakapan taqenis thaqtasipjjäna uk janipuniw armaskti. ¡Ukajj wali muspharkañapunïnwa! Amukiw ischʼukiyäta, uñchʼukirakiyäta. Tukuyataru mistusinkayäta ukhajja, 80 marani Jim Gardner sat jilataw jikjjatitu. Jupajj La verdad que lleva a vida eterna sat libro uñachtʼayasajja, “¿ak katoqtʼasitasmati?” sitänwa. Ukjjarojja, jueves alwatakiw Bibliat yatjjatañataki amtawayapjjta.

Libro churkitäna uka domingo arumajj trabajiñaw waktʼitäna. Ukapachajj Boca Ratón, Florida cheqanwa mä privado hospitalan sala de emergencia ukan trabajiyäta. Turnojajj 11:00 arumat 7:00 alwakamänwa. Uka arumajj janiw añcha lurañanakajj utjkänti, ukhamajj Verdad libro liyiñ qalltayäta, ukhamaruw mä enfermerajj jutasin libro aparitu. Uk uñjjatasajj sitänwa: “¿Jehová Diosan Qhanañchiriparuch tukjjarakïta?” sasa. Libro aparasinjja, sarakiyätwa: “Jichhaw chika libronkaskta, inas jupanakat maynirëjjchï” sasa. Sarjjepansti libro liyiskakiyätwa, uka arumpachaw liyiñ tukuyta.

Bibliat yateqañ qalltkayäta ukhajja, “¿kunsa yatjjatañäni?” sasaw Gardner jilatar sayäta. Jupajj sitänwa: “Churksma uka libro” sasa. “Churkista uka libro liyiñ tukuyjjtwa” sasaw sarakiyäta. Ukjjarusti, jilatajj wali munasiñampiw sitäna: “Walïki, jichhajj nayrïr jaljakwa yatjjatañäni” sasa. Nayrïr kuti libro liytʼkayäta ukhajj janiw sum amuykatätti, ukwa jilatampi yatjjatasajj amuyasiyäta. Walja textonakwa Bibliajat liytʼayitäna. Ukhamatwa Jehová Diosar uñtʼañ qalltaskayäta. Uka alwajj Gardner jilatampejj kimsa jaljanakwa Verdad sat librot yatjjatawayapjjta. Ukhat qalltasinwa sapa juevesanakajj kimsa jaljanak yatjjatapjjerïta. Wali kusisitapuniw jilatampejj Bibliat yatjjatayäta. Gardner jilatajj alajjpachar sarañataki ajllitänwa, jupampi yatjjatañajj wali askipunïnwa. Charles T. Russell jilatarus uñtʼarakitaynawa.

Mä qawqha semananak qhepatjja, Diosan arunakapat yatiyjjayätwa. Jim jilataw wal yanaptʼawayitu, utat uta yatiyañatakis jupaw yanaptʼawayitu (Hech. 20:20). Yanaptʼapampejja, yatiyañajj wal gustjjetäna. Jichhakamas ukhamakïskiwa. Yatiyañajj Jehová Diosan mä suma churäwipapuniwa, cheqas ¡Jehová Diosan yanapiripäñajj wali kusiskañawa! (1 Cor. 3:9, MT.)

JEHOVÁ DIOSAR MUNASIÑWA QALLTTA

Kunjamsa Jehová Diosar munasiñ qalltawayta uk jichhajj parltʼapjjarakïma (Apo. 2:4). Uka munasiñaw guerran kunayman jan waltʼäwinak utjkäna uk armañatakisa, yaqha yantʼanakar saykatañatakis yanaptʼawayitu (Isa. 65:17).

Kunas 1971 maran mä urojj pasäna uk sum amtasta. Mä jachʼa utan jakaskayäta uka utatwa alisnukupjjetäna. Padrastrojajj Jehová Diosan mä Qhanañchiripa uka utan jakañap janiw munkänti. Ukhajj janiw qollqenïkayätti. Trabajkayäta uka hospitalan sapa pä semanatwa pagapjjetäna. Ukampis uka qollqempejj isinakwa alasjjayäta, ukhamat Jehová Diosat yatiyir sarañataki ukhamarak sutiparjam sarnaqañataki. Mä jukʼa qollqe imaskchiyätsa, Míchigan markan jilsuwaykta uka banconkänwa. Ukatwa mä qawqha urunakajj autojan jakawayta. Gasolina aljapki uka bañonakanwa jarisirïta ukhamarak sunksa khuchusirïta.

Auton jakaskayäta ukhajja, trabaj tukuyataruw tantachasiñ utar sarayäta, ukanwa yatiyir mistuñataki tantachasipjjañajäna, ukampis nayajj faltkipanwa puriyäta. Ukanjja, kawkhantï jan khitis uñjkitaspa ukjan qontʼataw suyaskayäta. Ukatsti kunjamsa Vietnam markan jaqenakan cuerpop phichantapjjäna, jiwat cuerponakatsa wilajj warasïna, jaqenakarus jiwarayasïna ukanak amtasajj wali chuyma ustʼataw jikjjatasiyäta. Waynanakajj “¿jakaskakïti? ¿Janit jiwkäjja?” sasin sapkitäna ukanak istʼkiristsa uñjkiristsa ukham amtayäta. Jupanakan jiwapjjañap yatkchiyätsa, jupanakar chuymachtʼañataki ukhamarak jan llakita uñkatañatakiw chʼamachasiyäta. ¡Amtasajj walpun chuym chʼalljjtayasiyäta!

Wali jachtʼasisaw Diosar mayisiyäta (Sal. 56:8). Ukatsti kunjamsa jiwatanakajj jaktanipjjani uka toqet lupʼiñ qalltta. Jiwatanakajj jaktanipkani ukhakiw kuna jan walinaktï nayasa yaqhanakasa uñjawayapkta ukanakajj armatäjjani. Jiwapkäna uka waynanakarojj Diosajj jaktayaniwa, ukatsti cheqa yatichäwinakwa yateqapjjani (Hech. 24:15). Ukanak amuytʼañajj chuymajaruw purtʼitäna, Diosarus jukʼampiw munasirakiyäta. Janipuniw uka urut armaskäti. Ukhat aksarojj yantʼanakansa, jan walinakansa Jehová Diosar munasiskakiñatakiw chʼamachasiwayta.

JEHOVÁ DIOSAJJ YANAPTʼAPUNITÄNWA

Guerrajj utjki ukhajja, jaqenakajj kunayman jan walinak lurapjje, nayas ukhamarakwa lurawayta. Ukampis pä textonakat lupʼiñaw wal yanaptʼawayitu. Nayrïrejj Apocalipsis 12:10, 11 qellqatawa. Uka qellqatarjamajja, Supayarojj janiw cheqa arunak parlatasampik atipjktanti, jan ukasti, Corderon wilap toqew atipjaraktanjja. Payïrejj Gálatas 2:20 qellqatawa. Uk liytʼasaw Jesucriston “naya layku” jiwatap amuytjja. Jehová Diosajj Jesusan jiwatapatwa nayarojj jan walinak luratajat perdonitu. Uk yatiñaw qʼoma conciencianïñataki yanaptʼitu, ukatsti khuyapayasiri Jehová Diosaru uñtʼapjjañapataki cheqa yatichäwinak jaqenakar yatiyañatakis chʼamañchtʼitu (Heb. 9:14).

Nayra maranakat amtasta ukhajja, Jehová Diosarojj nayar yanaptʼatapat walpun yuspärta. Kunapachatï Jim jilatajj auton jakaskataj yatïna ukhajja, uka urpachaw mä kullakan utapan qorpachasiñajatak yanaptʼitäna. Kullakajj jachʼa utanïnwa. Cheqas Jehová Diosaw Jim jilat toqesa, uka munasiri kullak toqes mä suma uta churitäna. ¡Jehová Diosajj wali khuyaptʼayasiriwa! Taqe chuyma servirinakaparojj Jupaw uñjaski.

AMUYUMPIW TAQE CHUYMA YATIYTA

Mayo 1971 maranjja, Míchigan markar sarañajaw wakisïna ukhamat yaqhep luräwinakamp phoqañajataki. Delray Beach (Florida) markan utjkäna uka tamat janïr sarkasajja, autojan maleteroparuw Bibliat apstʼat qellqatanak phoqantawayta, ukatsti alay toqer sarir jachʼa thaknamaw viajiyäta. Nayajj 1.500 kilometronak sarañajänwa, ukampis 400 kilometronak viajiskayäta ukhaw Bibliat apstʼat qellqatanakajj pistʼjjetäna. Taqe cheqanwa Diosan Reinopat taqe chuym yatiyirïta. Carcelanakana, samartʼañatak utjki uka cheqan bañor mantir chachanakarus yatiyaskakirïtwa. Qellqatanak jaytawaykta ukanakat maynisa ‘¿Diosan markapar mantanipjjpachati?’ sasaw jichhakamas jisktʼasta (1 Cor. 3:6, 7).

Cheqa yatichäwinak yateqaskayäta ukhajja, chuyma ustʼayir arunakampiw parlirïyäta. Familiajampejj jukʼampïnwa. Niyakejjay Jehová Diosarojj wal munaschiyätjja, jan ajjsartʼasaw qhana arunakamp jupanakar yatiyirïta. John ukhamarak Ron jilanakajarojj wal munasta, ukatwa cheqa yatichäwinak jupanakar jan pächtʼasis parlirïta. Qhepatjja chuym ustʼayirjam parlatajatjja, perdón mayisjjayäta. Ukampis cheqa yatichäwinak yateqañ munapjjañapatakiw Diosat mayta. Ukhat jichhakamajja Jehová Diosaw yatichawayitu ukatwa yatiykasasa yatichkasasa wali amuyump parljjta (Col. 4:6).

YAQHANAKATAKEJJ MUNASIÑAJAJJ UTJARAKIWA

Kunjamsa Jehová Diosar munasiñ qalltawayta uk wali sum amtta, ukampis jakäwijan munasiwayapkitu jupanakatsa janirakiw armaskti. Diosar uñtʼasinjja Susan kullakaruw uñtʼarakta, juparojj ukhamarakiw munasta. Diosan Reinopar yanaptʼaskakiñatakejj mä yanapir munayäta. Susan esposajajj chʼollqe warmiwa Diosarus wal munasiraki. Mä kutejja, casarasiñataki uñtʼasisipkayäta ukhajja, utaparuw sarta, ukanjja uta anqanwa Yatiyañataki revista liyiskatayna. Taman jan yatjjataski uka yatichäwinak Bibliampi liytʼaskir uñjasajj walpun muspharirïta, akham amuytʼirïta: “Jupajj walpun Diosar munasi” sasa. 1971 maranwa casarasipjjta, ukhat aksarojj wal yanaptʼawayitu, ukham luratapat wal yuspärta. Esposajajj nayar munasituwa, ukampis Jehová Diosaruw jukʼamp munasi, ukaw jupat wal kusisiyitu.

Jehová Diosajj pä wawampiw bendiciwayapjjetu, jupanakajj Jesse ukat Paul satäpjjewa. Diosaw jiskʼatpach jupanakar yanaptʼawayi (1 Sam. 3:19). Jehová Diosar loqtapjjatapajj esposajarusa nayarusa wali sum mayninakampejj uñjayapjjetu. Diosar qalltan munasipkäna uk jan armapjjatapatwa jichhürkamajj Diosar servisipki. 20 jila maranakaw Diosar sapürunjam loqtasipkaraki. Yoqanakajajj Jehová Diosar taqe chuymampi taqe almampi munasir warminakampiw casarasiwayapjje, jupanakajj Stephanie ukat Racquel satäpjjewa (Efe. 6:6). Yojjchʼanakajat wali kusisitaw jikjjatasipjjta, jupanakajj wawanakajäpkaspas ukhamawa.

Bautisasjjasinjja, 16 maranakaw Rhode Island markan Diosatak irnaqtʼawayta, ukanjja walja jilat kullakanakampiw uñtʼasiwayapjjta. Wali uñtʼat irpir chuymaninakan luräwinakapatsa wali sumwa amtastjja. Tamanak tumptʼirinakatsa amtasiraktwa, sutinakap mayat mayat aytañajj waljäspawa, jupanakaw Jehová Diosar loqtaskakiñatakejj chʼamañchtʼawayapjjetu, ukham yanaptʼapjjatapat walpun yuspärta. ¡Jehová Diosar taqe chuyma munasiri jilatanakampi irnaqtʼañajj wali askipunïnwa! Carolina del Norte cheqanjja, Diosan arunakapat yatiyañajj jukʼampiw munasïna. Ukatwa 1987 maran uka cheqar sarapjjta, ukanjja waljanimpiw uñtʼasiwayapjjta.a

2002 maranjja, Patterson, Estados Unidos markankir Betelaruw invittʼapjjetäna. Nayajj Departamento de Servicio ukanwa irnaqayäta, esposajasti lavanderian trabajirakïna. Ukan yanaptʼañ walpun gustäna. Agosto 2005 maransti, Oraqpachan Jilïr Irpirinak taypin irnaqtʼañajatakiw invittʼapjjetäna. Altʼat chuymampiw uka luräwi katoqasta. Ukampis ukan jukʼampiw irnaqtʼañajäna, walja kutirakiw avionat viajiñajäna, ukanakaw munat esposajar llakisiyäna. Juparojj janiw avionat viajiñajj gustkiti, ukampis walja kutiw yaqha cheqanakar jupampejj avionat sarawayapjjta. ¿Kunas uk lurañatakejj jupar yanaptʼawayi? Esposajajj siwa: “Oraqpachan Jilïr Irpirinak taypin irnaqtʼasipki uka mayni jilatanakan esposanakapajja, esposojar jan qarjtasa jukʼampi yanaptʼaskakiñatakiw yanaptʼawayitu, jupanakajj wali munasiñampiw ewjjtʼawayapjjetu” sasa. Cheqansa jupajj ukhamwa yanaptʼawayitu ukatwa jupar wal munastjja.

Oficinajan walja fotonakaw utji, ukanakajj nayatak wali askipuniwa. Kunjamsa wali kusisit jakasiwayta ukanakwa amtayitu. Jehová Diosar qalltan munaskayäta uk amtañatak chʼamachasisajja, walja bendicionanakwa katoqawaytjja.