¿Khitis anticristojja?

ANTICRISTO siski uka arojja, Roma markankir papanakaru jan ukajj ajjsarkañ peliculanakar uñtayañatakiw mara mara apnaqasiwayi. Ukatwa jaqenakajj akham jisktʼasipjje: “¿Khitis anticristojja? ¿Yatjjatañajj wakisiti?” sasa. Uka arojj Biblian phesqa kutiw uñsti, ukhamajj kunjamsa apnaqasi uk yatjjatañäni.

KHITIS ANTICRISTOJJ UKAW QHANSTI

Biblia qellqeri Apóstol Juan sapakiw anticristo siski uka arjja apnaqawayi. ¿Jupajj kamsänsa? Nayrïr cartapan akham sänwa: ‘Qhepa urunakajj purinjjewa. Jumanakajj istʼapjjäyätawa: “Anticristojj jutaniw” siri; kunjamatï jichhajj Cristo toqe parlirinakajj wali uñstawayejja, ukhamatwa yattanjja qhepa urunakäjjatapa. Jupanakajj jiwasanak taypitwa mistupjje, ukampis janiw jiwasankirïpkiti. ¿Khitis kʼarejja? Jesusar “janiw Cristökiti” siski uka. Ukawa Criston uñisiripajja, Awkirus ukhamarak Yoqarus jan uñtʼiri tukutap layku’ sasa (1 Juan 2:18, 19, 22).

¿Kunsa uka arunakat yateqtanjja? Apóstol Juanajj ‘Cristo contra parlirinakajj waliw uñstani’ sasaw säna, ukampejj Cristo contra saytʼirinakajj waljanïpjjewa saskänwa. Juanan arsutaparjamajja, anticristojj mä arunjja, Cristo contra saytʼirinakajj kʼarinakwa yatichapjje, jan ukajj Cristompita Awkipampit kunatï cheqäki ukanakwa imtʼañ munapjje. Jupanakat yaqhepajj ‘Cristötwa’ sasin sapki ukanakäspawa, jan ukajj Criston organizacionapäpjjtwa sasin sapjjarakispa, ukhamat jaqenakajj arkapjjañapataki. Juanajj uka jaqenakajj jiwasanak “taypitwa mistuwayapjje” sasaw qhanañchäna, ukampejj Jesusan yatichäwinakap jan istʼañ munapjjatapwa uñachtʼayistu. Juanajj uka carta qellqkäna uka tiemponjja, Cristo contra saytʼirinakajj utj-jjänwa. Ukat ‘qhepa urunaka’ sasinjja, Jesusan qhep qhepa apostolopajj jiwañapäjjäna uka nayraw ukajj uñstañapäna.

¿Kunampsa Juanajj anticristot sänjja? Cristo contra saytʼirinakajj religionanakan kʼari yatichäwinakapwa yatichi sasaw akham säna: “Khititejj siski: ‘Jesucristojj janchin juti’ sasa, ukïristi Diosankiriwa. Ukampis khititejj siski: ‘Jesucristojj janiw janchina jutkiti’ sasa, ukajj janiw Diosan ajayupanïkiti, jan ukasti Cristo conträki uka ajayuniwa. Jumanakajj istʼapjjtawa uka ajayun jutañapjja; jichhasti ukajj akapachankjjewa” sasa (1 Juan 4:2, 3). Payïr cartapan akham sarakïnwa: “Walja sallqjirinakawa sarnaqe. Jupanakajj janiw Tatit Jesucriston mä jaqeru tukusa jutatapjja iyawsapkiti. Khititejj uka yatichäwinïki ukajj sallqjiriwa, Tatit Jesucriston uñisiriparakiwa” sasa (2 Juan 7). Ukhamasti Cristo contra saytʼirinakajj Jesucristotsa kuntï jupajj yatichkäna ukanakatsa kʼarinak yatichi sasaw apóstol Juanajj säna.

‘KʼARI PROFETANAKA’ UKAT ‘ÑANQHA JAQE’

Janïr Juanajj anticristot qellqäna uka nayraw Jesusajj akham arkirinakapar ewjjtʼäna: ‘Amuyasipjjarakim kʼari profetanakata, ukanakajj jumanakan ukarojja ovejat isthapitaw jutapjje, manqha toqetsti lunthata lobonakäpjjewa’ sasa (Mateo 7:15, MT). Apóstol Pablojj ukhamarakiw Tesalónica markankir cristianonakar akham amtayäna: “Jan kunäkipansa sallqjayasipjjamti. Janïra [Jehová Diosan urupajj] purinkipanjja Dios contra saytʼañaw jutañapa, kunapachatejj ñanqha jaqejj uñstankani kawkïritejj tʼunjañataki juchañchatäki uka” sasa (2 Tesalonicenses 2:3).

Kʼari profetanakasa, kʼari yatichirinakas nayra patak maranakan utj-jjapunïnwa, cristianonakar Diosat jitheqtayañwa munapjjäna. Cristot kʼarinak yatichapjjäna, kunanaktï Cristojj yatichawaykäna uk janiw yatichapkänti, ukatwa Juanajj ‘anticristo’ sasin säna. ‘Tʼunjañataki juchañchat’ wawa sasinjja, Jehová Diosajj kunjamsa jupanakar uñji ukwa Pablojj amuytʼayaskäna.

¡ANTICRISTOT AMUYASIPJJAÑÄNI!

Cristo contra saytʼirinakajj utjaskakiwa. Yaqhep jaqenakasa, organizacionanakasa Jesús contra ukat yatichäwinakap contraw saytʼapjje. Amanutwa kʼari yatichäwinak uñstayapjje, ukhamat khitis Jesusajja, khitis Awkipajja uk jan sum amuyapjjañapataki. Jan sallqjjayasiñatakejja, wal amuyasiñasa. Kunjamsa sallqjjawayi uk pä toqet uñjañäni.

Walja maranakaw cristianöptwa siri iglesianakajj Trinidad kʼari yatichäwi yatichawayapjje. Awkimpi Yoqampejj pachpa Diosakiw sasaw sapjje. Ukhamatwa uka iglesianakajj Cristo contra tukupjje, jupanakajj Diosatsa Jesusatsa kʼarinak yatichapjje. Ukham lurasajja, Diosaru, Jesucristor uñtʼañatwa jaqenakar jarkʼapjje, ukampis Bibliajj Diosar sum uñtʼañataki, Jesusar arkañatakiw chʼamañchistu (1 Corintios 11:1; Santiago 4:8).

Maysa toqetsti, uka iglesianakajj jaqenakar sallqjjañatakejja, Biblianakapat Diosan Jehová sutip chhaqtayapjje, Diosan sutip uñstki uka Biblianaksa jiskʼachapjjewa. Cheqas jan walinakpun lurawayapjje, Diosan Jehová sutipajj qalltanjja, 7.000 kutiw Biblian uñstäna. Ukham lurasin ¿kunas jikjjatasiwayi? Jichhakamas walja jaqenakaw Diosar jan sum uñtʼapkiti.

Diosan sutip yatiñajja, suma chuyman jaqenakaruw Diosar jakʼachasiñatak yanaptʼawayi. Ukaw Richard chachampejj pasäna, kuntï Jehová Diosan Testigonakapampi parlkäna, uk janiw armaskiti. Jupajj akham siwa: “Cheqpach Diosan sutipajj Jehová satawa sasaw Bibliampi yatichapjjetu. Diosajj sutinïtap yatisajj walpun muspharta. Janipuniw ukham amuyirïkatätti” sasa. Ukhamatwa Bibliat yateqkäna ukarjam sarnaqañatak chʼamachasïna, Jehová Diosaruw kusisiyañ munäna. Jupajj saskakiwa: “Diosan sutip yatiñajj Jupampi sum apasiñatakiw yanaptʼawayitu” sasa.

Walja maranakaw anticristojj jan ukajj Cristo contra saytʼirinakajj millón millón jaqenakar Diosat jitheqtayawayi. Bibliat sum yatjjatañäni ukhajja, khitis cheqpach Cristo contra saytʼirejj uk sum amuyañäni ukat kʼari yatichäwinakatsa qhespiyasirakiñäniwa (Juan 17:17).