¿Jiwjjtan uka qhepat jakañajj utjaskiti?

JAKAÑATSA jiwañatsa, jaqenakajj kunayman amuyapjje. Maynejj jiwjje ukhajja, yaqha cheqar jakiriw sarjje sasaw yaqhepajj sapjje. Yaqhepasti jiwjjasajj yaqha cuerponwa mayamp nasiñäni sasaw creyipjjaraki. Yaqhepajj jiwañaruw taqe kunas tukusjje sasaw amuyapjjaraki.

Familiamasa jan ukajj kawkjantï jakaskta uka cheqansa, inas uka toqet mayj amuyapjjchi. Kunjamtï uñjaniwayktanjja, jaqenakajj uka toqet kunayman parlapjje. Ukhamajj ¿jiwjjtan ukhajj kunas pasi uk yatsnati?

Religión pʼeqtʼirinakajja, walja maranakaw jaqenakajj jan jiwir almanïtanwa sasin yatichapjje. Oraqpachan wali uñtʼat religionanakas ukham yatichapjjaraki. Sañäni, cristianismo, hinduismo, judaísmo, islam ukanakajja, almasajj yaqha cheqanwa jakaski sasaw yatichapjje. Budistanakajja, mä jaqejj walja kutis mayampi naskaspa, ukhamatsa jan walinakat jaltasin kusisiñ jikjjatkaspa ukham amuyapjjaraki, ukarojja nirvana sasaw sapjje.

Taqe uka yatichäwinakajja, jiwjjasajj yaqha cheqarus maynejj jakasir sarkaspa ukhamwa jaqenakar amuytʼayi. Ukatwa walja jaqenakajj jiwjjtan ukhajj yaqha cheqaruw jakasir sarjjtanjja, ukajj Diosan munañapawa sasin sapjje. Ukampis ¿kunsa Bibliajj uka toqet yatichi? Uk yatiñatakejja, akjjar jutki uka yatichäw liytʼam. Uk yatiñajj inas musparaychïtam.