Wakiski ukampik jakasisajj kusisitäpjjtwa

DANIEL jilatampi Miriamampejj septiembre, 2000 maran casarasipjjäna, Barcelona, España markanwa jakapjjäna. Jilatajj akham siwa: “Sumsa jakasipkirista ukham amuyasipjjayäta. Trabajon ganapkayäta uka qollqempejja, suma pensionanakan manqʼapjjayäta, yaqha markarus sarapjjayäta, suma isinakwa alasipjjarakiyäta. Diosan arunakap yatiyiris sarapjjapunirïtwa” sasa. ¿Kunas qhepat pasäna?

Khä 2006 maran apaskäna uka jachʼa tantachäwin mä discursojj Daniel jilatan chuymaparuw purtʼäna. Ukan akham jisktʼäna: “¿‘Jiwañataki juchañchatäki’ ukanakan wiñay jakañ katoqapjjañapatak yanaptʼañatakejj chʼamachasisktanti?” sasa (Pro. 24:11). Qhespiyasipjjañapatakejj jiwasaw Bibliat yatiyañasa sasaw säna (Hech. 20:26, 27). Danielajj akham siwa: “Jehová Diosajj nayarus parlkitaspa ukhamänwa” sasa. Ukatjja, Diosan Arup jukʼamp yatiyañajj kusisiñwa churistu sasaw discurson qhanañcharakïna. Jilatajj uka arunakan cheqätap yatïnwa, esposapajj precursorat servisin bendicionanak katoqasajj wali kusisitänwa.

Daniel jilatajj akham siwa: “Diosar jukʼamp serviñatakejj taqe kun cambiañ wakisitapwa amuyayäta” sasa. Ukhamwa jilatajj luräna, jukʼa horanakakwa trabaj-jjäna, precursorat serviñsa qalltarakïnwa. Ukatsti yatiyirinakajj munaski ukar sarañajj kunja kusiskañäspasa ukwa amuytʼarakïna.

LLAKITA, QHEPATSTI KUSISITARAKI

Mayo, 2007 maranwa Daniel jilatasa Míriam kullakas trabajop jaytasin nayrajj visitapkäna uka Panamá markar sarjjapjjäna. Mar Caribe cheqan Bocas del Toro marka jakʼanakankir jiskʼa islanakaruw yatiyir sarapjjäna. Jila partejj guaymi arwa parlapjje. Danielampi esposapampejj imasipkäna uka qollqempejj kimsaqallqo phajjsinak Panamá markan utjañ amtapjjäna.

Jupanakajj boteta ukhamarak bicicletatwa islanakarojj viajapjjerïna, nayrïr kutjja 32 kilometronakwa qollunaknama, lupin lupjata bicicletat sarapjjäna. Wali qaritäsajj niyapuniw Daniel jilatajj desmayäna. Ukampis guaymi aru parlirinakajja, arupat mä jukʼa parltʼir istʼasajj jukʼamp sum katoqapjjäna. Ukatsti 23 jaqenakaruw Bibliat yatichapjjäna.

Imasit qollqepajj tukusjjäna ukhajja, wal llakisipjjäna. Daniel jilatajj akham siwa: “Españar kuttʼañwa amtapjjayäta, jachaqtʼasipjjarakiyätwa. Bibliat yateqerinakar janiw jaytañ munapkayätti” sasa. Mä phajjsi qhepatjja, mä kusiskañ yatiyäwi katoqapjjäna. Miriamajj akham siwa: “Precursor especialat serviñatakiw invittʼapjjetäna. ¡Uk yatisajj wal kusisipjjayäta!” sasa.

WALI KUSISKAÑÄNWA

Diosan markapan 2015 maran cambionak utjkäna ukhajja, janiw precursor especialat sirvjjapjjätati sasaw jupanakar sapjjäna. ¿Kunsa lurapjjpachäna? Salmo 37:5 qellqatan siski ukaruw confiyapjjäna, ukan akham siwa: “Tatitun amparapar sarnaqäwim katuyasim, jupar taqe chuymamp alkatam, jupasti yanapätamwa” sasa. Precursoräñatakejj trabajonak katusipjjäna, jichhajj Veraguas, Panamá markanwa yanaptʼasipki.

Daniel jilatajj akham siwa: “Españat janïr sarapkayäta ukhajja, kunatï wakiski ukamp jakapjjeristti janicha uk janiw yatipkayätti. Jichhajj yatjjapjjtwa, wakiskirïki ukanakat janiw kunas faltapkituti” sasa. Ukatsti akham sapjjarakiwa: “Altʼat chuymani jaqenakar Jehová Diosar uñtʼapjjañapatak yanaptʼasaw jukʼamp kusisitäpjjta” sasa.