‘Suma amuytʼasir warmïtawa’

UKA arunakampiw Israel markan jakiri David chachajj Abigail warmir jachʼañchtʼäna. ¿Kunatsa ukham sispachäna? ¿Kunsa Abigail warmit yateqassna?

Saúl reyejj jiwayañatak arknaqkäna ukhaw Davidajj Abigail warmir uñtʼäna. Uka warmejj Nabal chachampi casaratänwa, uka chachajj wali qamirirakïnwa, awatirinakapajj Judá markat aynach toqenwa ovejanakap uñjapjjäna. Davidasa, soldadonakapasa Nabal chachan ovej awatirinakaparu ukhamarak uywanakaparuw jarkʼaqapjjäna. Ukatsti, kunatï utjki ukanak manqtʼasiñataki wajjtʼapjjeta sasaw Davidajj chachanak khitäna (1 Sam. 25:8, 15, 16). Ukham mayitapajj walikïskänwa, kunanakatï Nabal chachan utjkäna ukanakwa jan walinakat jarkʼaqapjjäna.

Ukampis Nabalajj sutiparjamaw luräna, “jan amuytʼani” jan ukajj “jan yatiñani” sañwa sutipajj muni. Davidajj maykäna uk churañat sipansa, jan amuytʼasisaw jan wali arunak säna. Ukatwa Davidajj jupar nuwantir sarañatak wakichtʼasïna. Nabalan ukham parlatapatjja, jupasa, utapankirinakasa jan walin uñjasipjjaspäna (1 Sam. 25:2-13, 21, 22).

Davidan jankʼaki colertʼasitapat kuna jan walinakas utjaspa uk amuyasajja, Abigailajj jan ajjsartʼasaw uka jan wal jarktʼañ munäna. Amuytʼasiñapwa Davidar mayïna, Jehová Diosamp sum apasitapsa amtayarakïnwa. Ukatsti, Israelan jutïr reyipampiru soldadonakapampirojj walja manqʼañanak churäna. Maysa toqetjja, jan walïki uk jan lurañataki uka warmi toqe Diosan yanaptʼatapwa Davidajj amuyäna. Ukatwa akham säna: ‘Suma amuytʼani warmïtawa’, “jumaw nayarojj jaqe jiwayañata qhespiyarakista” sasa (1 Sam. 25:18, 19, 23-35).

Mayninakajj kunjamsa yanaptʼapjjestu uk janiw Nabal chachjamajj armañasäkiti. Jan wal lurirjamäki ukanakarus jan lurapjjañapatakiw yanaptʼañasa. Salmo qellqerjamarakiw Diosar akham mayissna: “Suma amuytʼa chuymay churita, yatiñ kankañ churarakita” sasa (Sal. 119:66).

Mayninakajj inas sum amuytʼasisa kun luratas amuyapjjchini. Ukham luratas sapjjchini janisa, inas Davidjam akham sapjjchispa: ‘Suma amuytʼasirïtawa’ sasa.