“¿Kunapachas yaqha jachʼa tantachäwejj utjani?”

NOVIEMBRE 1932 maranjja, uka semananakakiw Ciudad de México markan semaforonak uchapjjäna, uka markanjja mä millonatsa jila jaqenakaw utjäna. Ukampis noticianakanjja janiw machaq semaforonakatak parlasjjänti, jan ukasti, reporteronakajj trenanak puripki ukanwa wal suyantasipkäna. ¿Khitirus suyasipkpachäna? Sociedad Watch Tower ukan presidenteparuw suyasipkäna, jupajj Joseph F. Rutherford satänwa. Testigonakas sum katoqtʼañatakiw suyasipkarakïna. Rutherford jilatajj kimsa uru jachʼa tantachäwitakiw purisinkäna.

The Golden Age (jichhajj ¡Despertad!) revistanjja akham sänwa: “Diosan markapajj kunjamsa México markan nayrar sartawayi uk amtañatakejja, aka jachʼa tantachäwejj wali amtatäniwa” sasa. Uka tantachäwinjja, 150 jilat kullakanakakiw tantachasipjjäna, ukhamajj ¿kunatsa wali amtatajja?

Uka tantachäwit nayrajja, jukʼanikiw Diosan arunakap istʼapjjäna. 1919 maratpachsa jachʼa tantachäwinakajj apaskchïnjja, congregacionanakajj jukʼaptaskänwa. 1929 maranwa sucursalajj utj-jjäna, ukajj wal yanaptʼani sañjamänwa, ukampis jan waltʼañanakaw utjäna. Sañäni, Diosan arunakap yatiyañjja janiw negocionakampi kitantasiñapäkiti sasin yatiyasïna ukhajja, colportor mä jilatajj colerasïnwa, Diosan markapat jitheqtasajj yaqha grupwa Bibliat yatjjatañatak uttʼayasïna. Sucursal sarayir jilatasa kuntï cristianonakajj jan lurapjjañapäki ukwa luräna, ukatwa yaqhar ajlliñajj wakisirakïna. Ukham jan walinak utjipanjja, Diosar taqe chuyma serviri Testigonakar chʼamañchtʼañaw wakisïna.

Rutherford jilatajj walpun jilat kullakanakar chʼamañchtʼäna. Jachʼa tantachäwinjja pä discursonak arstʼäna. Radionsti phesqa discursonak arstʼarakïna. México markpachanjja, ukhapuniw discursonakajj radion istʼasïna. Uka jachʼa tantachäwi qhepatjja, Sucursal sarayir yaqha jilataw Diosan markaparojj pʼeqtʼjjäna. Ukhatwa bendicionanak katoqjjapjje, kusisita chʼamañchtʼata ukhamaw Diosar servisipkaraki.

Qhepa marasti, pä jachʼa tantachäwiw apasirakïna, mayajj Veracruz markana, mayasti Ciudad de México markanaraki. Yatiyañatakejja jilat kullakanakajj wal chʼamachasipjjäna ukaw wal yanaptʼarakïna. 1931 maranjja, 82 yatiyirinakakiw utjäna, tunka maranakatjja tunka ukhampiw utj-jjäna. 1941 maransti, Ciudad de México markan waranqaniw mä Jachʼa Tantachäwin tantachasipjjäna.

“CALLENAK PHOQANTAPJJE”

Khä 1943 maranjja, “Nación Libre” sat Jachʼa Tantachäwiw utjani sasin yatiyañatakejj letreronak warkuntasisaw Testigonakajj callenakar mistupjjäna. Uka jachʼa tantachäwejj 12 markanakanwa apasiñapäna.a Testigonakajj 1936 maratpachwa ukham yatiyapjjerïna.

La Nación sat revistanjja, letreronakampi yatiyañajj kunjamsa Ciudad de México markan apasiwayi ukwa yatiyäna. Akham sasaw qellqäna: “Nayrïr urojj yaqhanakampir irpanipjjam sasïnwa. Qhepürusti, tantachasiñ utajj phoqaränwa” sasa. Uk uñjasajja, Católica Iglesiajj wal coleräna, ukatwa Testigonak contra saytʼäna. Ukhampachasa, Testigonakajj callenakar sarasipkakïnwa. “Waljaniw yatiyapjjäna, jupanakajj ‘sandwichinakar’ uñtasitäpjjänwa” sasaw La Nación revistajj säna. Uka revistanjja, kunjamsa jilatanakajj callenakan yatiyasipki uk uñachtʼayir mä fotow utjäna. Foto aynachanjja “callenak phoqantapjje” sasin qellqatänwa.

“JANIW CEMENTO PISJAMÄKITI”

Uka maranakanjja, México markan apaskäna uka jachʼa tantachäwinakar sarañatakejja, walpun chʼamachasipjjäna. Walja markanakarojj janiw trenas ni auto thakis purkänti. Mä congregacionat akham sasaw qellqanipjjäna: “Aka cheqarojj janiw trenas purinkiti” sasa. Jachʼa tantachäwir sarañatakejja, trenajj paski ukar puriñatakejj mulanakata, jan ukajj kayukiw walja urunak sarapjjerïna.

Jilat kullakanakat jila partejja sarañatakikiw pasajenïpjjäna. Waljanejj jilat kullakanakan utanakapanwa alojasipjjäna, jupanakajj kusisitaw katoqapjjarakïna. Yaqhepajj Tantachasiñ Utanakanwa alojasipjjäna. Mä kutejja, llätunk tunkaniw sucursalan alojasipjjäna, jupanakajj “20 cartón cajanakat lurata colchonanakanwa” filaki ikirapjjäna. Anuario librorjamajja, ukham alojtʼatajj walpun yuspärapjjäna, “janiw cemento pisjamäkiti” sasaw sapjjarakïna.

Uka jachʼa tantachäwinakajj jilat kullakanakatak wali wakiskirïnwa, ukatwa sarañatakejj wal chʼamachasipjjäna. México markankir jilat kullakanakajj jichhakamaw ukham chʼamachasisipki, taqpachanejj niya mä millonäpjjewa.b 1949 maranjja sucursalajj akham sasaw yatiyäna: “Jan wali tiemponakas utjkchïnjja, cheqa yatichäwinakarojj munasisipkakiwa. Sapa jachʼa tantachäwi qhepatjja, kunjamänsa uk parlasipkakiwa, ‘¿kunapachas yaqha jachʼa tantachäwejj utjani?’ sasaw jisktʼasipjjaraki” sasa. Jichhakamas jilat kullakanakajj ukham chʼamachasisipkakiwa. (De nuestros archivos en la sucursal de Centroamérica).