2 Jan walinak askichañataki

TAQE KUNAT LLAKISIÑA

Rosi sat warmejj akham siwa: “Llakinakajat wal lupʼirïta, ukatjja jukʼamp jan walinwa uñjasï sasaw amuyirïta” sasa. ¿Biblian kawkïr qellqatas jupar yanaptʼäna? Juparojja Mateo 6:34 qellqataw yanaptʼäna, ukan akham siwa: “Jan qharürut llakisipjjamti, qharürojj yaqha llakinakaw utjarakini. Sapüruw jan walinakajj utji” sasa. Rosi warmirojja, Jesusan uka arunakapaw kunatï qharürojj paskaspa ukanakat jan llakisiñatakejj yanaptʼäna. Jupajj siwa: “Walja llakinakaw utjitäna, jukʼamp jan walinwa uñjasï sasin amuyañajj janiw walïkänti, kunanaktï amuykayäta ukanakajj inas jan paskchispänti” sasa.

Yasmín sat warmejja, llakinakamp wal aynachtʼäna. Jupajj akham siwa: “Sapa semanaw jachirïta, awisajj janiw ikirïkti. Llakinakajajj wal aynachtʼayaskitäna” sasa. ¿Biblian kawkïr qellqatas jupar yanaptʼäna? Jupajj 1 Pedro 5:7 qellqatwa amti, ukan akham siwa: “Taqe llakinakam [Diosan] amparapar katuyapjjam, jupajj kunatï jumanakar pasapktam ukanakat wal llakisi” sasa. Yasminajj saskakiwa: “Jehová Diosar mayisiskakiyätwa, jupajj mayisitanakajar istʼänwa. Mä jathi qʼepsa apaqkitaspa ukhamwa amuyasiyäta. Awisajj llakinakajj aynachtʼayituwa, ukampis kunsa lurirista ukwa yateqawayta” sasa.

LURÄWINAK HORASAR JAN PHOQAÑA

Isabel sat mä tawaqojja, akham siwa: “Kunanaktï lurañajäki ukanak qhepatakikiw jaytirïta, tatajajj ukhamarakiw lurirïna. Kunanaktï lurañajäki ukanak lurañat sipansa, awisajj televisión uñkatatakiw pasirïta, jan ukajj janiw kuns lurirïkti. Ukajj janiw walïkänti, maynejj jukʼamp llakinakan uñjasi, lurañanakap janirakiw sum lurkiti” sasa. Juparojj 2 Timoteo 2:15 qellqataw yanaptʼäna, ukan akham siwa: “Jumajj chʼamachasiskakim, ukhamat Dios nayraqatan suma uñjatäñataki, jan kunat phenqʼasis trabajiñataki” sasa. Isabelajj saskakiwa: “Kuntï lurañajäkäna uk qhep qhepa luratajatjja, janiw Jehová Diosajj phenqʼasiñap munkayätti” sasa.

Kelly sat mä tawaqojja, akham sarakiwa: “Mä luräwi tukuyañajäna ukhajja, qhepa qhepakiw lurirïta. Ukham lurasajj wal llakisirïta, jacharakirïtwa, awisajj janiw ikirïkti. Ukajj janiw waltʼaykitänti” sasa. Juparojj Proverbios 13:16 qellqataw yanaptʼäna, ukan akham siwa: “Khititejj chʼikhïki ukajja, chʼikhi kankañampiwa kuns luri; jan amuytʼan jaqesti loqhe luratanakapatwa kawki kawk tuku” sasa. Kelly tawaqojj uka textot wal lupʼïna, ukat akham sänwa: “Trabajos janïräkipan lurañ amtañajj wakisiwa. Kunanaksa lurañäta uk mä cuadernoruw qellqtʼasta, ukaw taqe kun horasapar lurañatak yanaptʼitu” sasa.

SAPARSTʼAT UÑJASIÑA

Cristina sat mä warmejj akham siwa: “Esposojajj pusi wawanakampi jaytjawayasaw sarjjäna” sasa. ¿Biblian kawkïr qellqatas jupar yanaptʼäna? Proverbios 17:17 qellqatajj akham siwa: “Mä amigojj taqe horasan munasiripuniwa; llakisiñansti mä jiljamaw chuymachasi” sasa. Cristinajja, Diosar servir jilat kullakanakan yanaptʼap thaqäna. ¿Jupanakajj yanaptʼapjjänti? Cristinajj saskakiwa: “Amigonakajajj kunaymanitwa yanaptʼapjjetu. Yaqhepajj manqʼañanaka, panqaranakwa apanipjjäna. Amigonakajat waljanejja, yaqha utar sarjjañatakejj kimsa kutiw yanaptʼapjjetäna. Maynejj trabajo jikjjatarapitäna, amigonakajajj yanaptʼapjjapunituwa” sasa.

Diana sat warmejja, ukhamarakiw saparstʼat uñjasïna. Jan walinakan uñjasisajj kunjamsa jikjjatasïna uk akham sasaw jupajj qhanañchi: “Mayninakajj wali sumas jakasipkaspa, nayajj janipunis kusisit jakaskirista ukham amuyasiyäta. Saparstʼataw uñjasiyäta” sasa. Juparojj Salmo 68:6 qellqataw yanaptʼäna, ukan akham siwa: “Diosaw [saparstʼat] jaqenakatakejj ut wakicharapi” sasa. Dianajj saskakiwa: “Uka qellqatajja, janiw mä cheqpach utat parlkänti, ukwa amuyayäta. Diosajja mä utsa churkistaspa ukhamawa, ukanwa servirinakapampi chika mä wawaki sum jakasiñajj utji. Ukhamasti nayaw Diosar nayraqat jakʼachasiñajjäna, ukhamatakwa servirinakaparojj jakʼachasiriskäyäta. Salmo 37:4 qellqataw uk amuyañatakejj yanaptʼitäna, ukan akham siwa: ‘Tatiturojj suma chuymamp munasim, jupasti chuyma manqheman mayisitamarjamaw churätam’” sasa.

Dianajj saskakïnwa: “Jehová Diosar jukʼamp jakʼachasiñajaw wakisïna, jupajj mä suma amigowa. Diosar servir jilat kullakanakampi amigöñatakejja, kunanaksa jupanakampejj lurirista uk cuadernoruw qellqtʼasiyäta. Ukatjja, pantjasitanakap uñchʼukiñat sipansa, kunja suma chuymanïpjjänsa uk uñjañatakiw chʼamachasiyäta” sasa.

Jehová Diosan Testigonakapajja, pantjasir jaqenakäpjjarakiwa, mayninakjamarakiw jan walin uñjasipjje. Ukhamarus Biblian ewjjtʼanakapaw mayninakar yanaptʼañatak jupanakarojj chʼamañchtʼi. Ukham suma amigonakanïñajj kusiskañawa. Ukampis jan qollkañ mä usur saykatañatakisa, jan ukajj familiasat maynejj jiwjje ukhasa, ¿Biblian yatichäwinakapajj yanaptʼistaspati?