Tʼaqesiñanaka: ¿Diosan castigopäpachati?

LUCÍA WARMEJJ CHʼEQA KAYUPAT COJOWA. Jupajj jiskʼäkäna ukhaw poliomielitis sat usu katüna, uka usojj wali contagiosowa, cuerpon ankunakapwa jan waltʼayaraki. 16 maranïkäna ukhajja, khiti warmitakitï trabajkäna ukajj akham sänwa: “Diosaw jan istʼasirïtamatsa, taykamar jan respetatamatsa uka usump castigpachätam” sasa. Walja maranakas pasjjchejja, qhawqsa uka arunakajj chuym ustʼayäna uk Luciajj amtaskakiwa.

DÁMARIS WARMEJJ PʼEQEN TUMORANÏTAP YATISÏNA UKHAJJA, tatapajj akham sänwa: “Ukhaman uñjasiñatakejj jan walpun lurpachätajja, ukatwa Diosajj castigtamjja” sasa. Uka arunakajj walpun chuym ustʼayäna.

Nayratpachaw “usunakajj Diosan castigopawa” sasin jaqenakajj creyipjjäna. Usos y costumbres de las tierras bíblicas sat librojj akham siwa: “Jesusan tiempopanjja, ‘maynin juchapatwa jan ukajj familiaranakapan juchapatwa Diosajj usunakamp castigue’ sasaw jaqenakajj amuyapjjäna” sasa. Yaqha librojj akham sarakiwa: “Cristojj jakkäna ukhat walja maranak pasatatjja, ‘usunakampiw Diosajj jaqenakar castigue’ sasaw yaqhep jaqenakajj amuyapjjäna” sasa (Medieval Medicine and the Plague). ¿1300 maranakan Europa toqen utjawayki uka usojj Diosan castigopäpachänti? Jan ukajj ¿mä contagioso usukïpachäncha? Ukhamätapwa doctoranakajj qhepa maranakan yatjjatawayapjje. Inas akham jisktʼasta: “¿Diosajj usunakampit jaqenakar castigpacha?” sasa.a

AK AMUYTʼAM: Diosatï usunakampi jaqenakar castigaspäna ukhajja, ¿kunataraki Jesusajj usutanakar qollaspänsti? Ukham lurasajja, “Diosajj janiw jaqenakar cheqaparjam uñjkiti” sañsa Jesusajj munkaspäna ukhamäspänwa (Mateo 4:23, 24). Ukampis Jesusajj janipuniw Dios contrajj saytʼkaspänti. Jupapachpaw akham säna: “Kunanakatï jupar kusisiyki ukpunwa nayajj lurta”, “kunjamtejj alajjpachankir Awkejj siskitu ukarjamaw nayajj luraskta” sasa (Juan 8:29; 14:31).

Bibliajj akham sasaw qhan yaticharaki: “[Jehová Diosajj] cheqapawa, askirakiwa” sasa (Deuteronomio 32:4). Ak amuytʼañäni, janiw Diosajj mä jaqer castigañ laykukejj mä accidenten walja jaqenakar jiwaraykaspati. Diosar taqe chuym serviri Abrahán sat chachajja, ‘Diosajj janipuniw jan juchanirojj juchaninakamp chika jiwaraykaspati’ sasaw säna (Génesis 18:25). Bibliajj akham sarakiwa: “Diosajj janiw kuna jan walsa lurkaspati, janirakiw kunatejj jan cheqapäki uksa lurkaspati” sasa (Job 34:10-12).

¿KUNSA BIBLIAJJ TʼAQESIÑANAKAT YATICHISTU?

Diosajj janiw castigañatak tʼaqesiykistuti. Jesusampi discipulonakapampejj juykhu nasir mä jaqemp jikisipkäna ukhaw Jesusajj ukhamätap qhan säna. Discipulonakapajj akham sasaw Jesusar jisktʼapjjäna: “Rabí, ¿aka jaqen juykhu nasiñapatakejj khitis juchanïpacha, jupati jan ukajj awk taykapacha?” sasa. Uk satasti Jesusajj sänwa: “Janiw aka jaqes ni awk taykapas juchanïkiti” sasa (Juan 9:1-3).

Uka tiempon jakir jaqenakajja, tʼaqesiñanakajj Diosan castigopawa sasaw amuyapjjäna, ukatwa Jesusan discipulonakapajja, “janiw aka jaqes ni awk taykapas juchanïkiti” sir istʼasajj wal musparapjjpachäna. Juykhu jaqer qollasajja, kuntï jaqenakajj amuyapkäna ukajj jan cheqätapwa Jesusajj uñachtʼayäna (Juan 9:6, 7). Janiw Diosajj tʼaqesiñanakat juchanïkiti, uk yatiñajj wali usutäpki ukanakarojj wal chuymachtʼi.

Bibliajj akham siwa:

• “Diosajj janiw jan walinakampejj yantʼatäkaspati, janirakiw jupajj ni khitirus yantʼkiti” (SANTIAGO 1:13). Diosajj niyaw kuna jan walinakatï jaqenakar tʼaqesiyki ukanak chhaqtayjjani, usunakasa, tʼaqesiñanakasa, jiwañas janiw utj-jjaniti.

• Jesusajj ‘taqe tʼaqesirinakaruw waliptayäna’ (MATEO 8:16). Kunjamsa Jesusajj usutanakar qolläna ukajja, kunsa Diosan Reinopajj oraqpachan lurani ukwa uñachtʼayistu.

• “Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti. Kunanakatï nayrajj utjkäna ukanakajj tukusjjewa” (APOCALIPSIS 21:3-5).

¿KHITIS TʼAQESIÑANAKAT JUCHANÏPACHA?

¿Kunatsa akapachan tʼaqesiñanakasa jan walinakas utjpacha? Diosatï ukanakat jan juchanïchejja, ¿khitis juchanïpacha? Nayratpachaw jaqenakajj uka jisktʼanakat wal yatiñ munapjjäna. Jutïr yatichäwinwa ukanakajj qhanañchasiskani.