¿Kunjamsa Bibliat jukʼamp sum yatjjatsna?

Josué chachajj Diosan Leyipwa liyiski; Jericó markan perqanakapaw allthaptaski, Rahab warmin utapasti janiw allthaptkiti; Josué chachajj ampar loqtasaw Diosat mayisiski

JOSUÉ chachajj mä jan walinwa uñjasi. Jupajj israelitanakaruw Suma Oraqer irpantañapa, ukatakejj kunayman jan walinakaruw atipjañapa. Ukampis Jehová Diosajj jupar akham sasaw chʼamañchtʼi: ‘Chʼamani saytʼasim, Leyijsa phoqarakim, uruy aruma leyirakim kuntï ukan siski uk lurañamataki. Ukhamatwa taqe luräwinakamajj sumaru sarani’ sasa (Jos. 1:7, 8).

Aka ‘chʼama tukuña jan wali tiemponakanjja’, jiwasajj ukhamarakiw kunayman jan walinakan uñjastanjja (2 Tim. 3:1). Ukampis kuntï Jehová Diosajj Josué chachar siskäna ukar istʼañäni ukhajja, taqe luräwinakasajj ukhamarakiw sumaru sarani. Jiwasatï Biblia sapüru liyiñänejja, kuna jan waltʼäwins uñjasiñäni ukhajj suma amtanakaruw puriñäni.

Ukampis jila parte jiwasanakatakejj yatjjatañajj chʼamakiwa. Ukhamäkchisa Bibliat yatjjatañajj wali wakiskiriwa. Ukatakejja, “Bibliat yatjjatañatakejj akanakwa lursna” siski uka recuadrow yanaptʼistaspa. Ukanjja wali wakiskir ewjjtʼanakaw utji.

Salmonak qellqeri mä chachajj akham sasaw cantäna: “Arsutanakaman thakipanay irpita, ukankiw nayan kusisiñajjajja” sasa (Sal. 119:35). Jiwasajj ukhamarakiw Bibliat yatjjatasajj kusisitäsna. Jukʼamp yatjjatasajja, suma yatichäwinakwa jikjjatsna.

Inas jiwasajj Josué chachjam mä markar jan irpkstanti, ukampis kunayman jan waltʼäwinakanwa uñjastanjja. Ukhamajja, Josué chachjamarakiw Bibliat yatjjatañasa ukarjamas sarnaqañasaraki. Ukhamtï lurañänejja, ‘taqe luräwinakasajj sumaruw sarani’.

BIBLIAT YATJJATAÑATAKEJJ AKANAKWA LURSNA

Janïr yatjjatkasajj orasiñasawa. Bibliajj Taqe Chʼamani Diosan amuyunakapaniwa, Jupaw jiwasan askisatak qellqayawayi. Ukhamajj sum amuytʼañatakisa, amtañatakisa, ukarjam sarnaqañatakis Diosan yanaptʼapwa mayiñasa (Esd. 7:10).
Jisktʼasiñasawa. Biblia liykasasa, Bibliat apstʼat qellqatanak liykasas akhamwa jisktʼassna: “¿Kunsa aka qellqatajj Jehová Diosat yatichitu? ¿Kunjamsa aka arunakajj kuna toqettï Bibliajj parlki uk amuytʼañ yanaptʼitu? ¿Kunjamsa aka textompejj mayninakar yanaptʼirista?” sasa.
Yatjjatkasajj lupʼiñasawa. Liykasajj akanakatwa mä ratu lupʼiñasa: “¿Ak liytʼasajj kunjamakis jikjjatastjja? ¿Kunatsa ukham jikjjatastjja? Kunatï nayrajj paskitäna, kunatï pasaskitu, kunatï jutïrin paskitaspa ukanakampejj ¿kunansa niya pachpaki? ¿Kunjamsa Biblian aka yatichäwinakaparjama, ewjjanakaparjam sarnaqerista?” sasa (Job 23:5; Sal. 49:3). Jehová Diosajj kunatsa servirinakapar mä kun jan lurapjjañapatak jarkʼi, ukarjam jan sarnaqasajj kuna jan walinakansa uñjasipjjaspa ukanakatwa lupʼiñasa (Deut. 32:28, 29).
Niyas uñjksna ukhamwa amuytʼañasa. Biblian qellqatäki uka sarnaqäwinakat liykasaw ukham lursna. Sañäni, ¿kunjamsa José waynar jilanakapajj ismaelitanakar aljapjje uk amuytanti? (Gén. 37:18-28). ¿Kunsa uñjtanjja, istʼtansa, muktʼaraktansa? Uka sarnaqäwinak liytʼasajj jupäksnas ukhamwa amuyañasa. ¿Kunsa lupʼiski, kunjamakis jikjjatasi? Ukham amuytʼañäni ukhajja, niyas uñjksna ukhamäniwa, jukʼamp sumwa yatjjatarakiñäni.
Kuna yanaptʼanakatï utjki ukanakampiw yanaptʼasiñasa. Ukanakampiw jukʼamp yatjjatsna. Uka yanaptʼanakat kawkïrinakas Internetansa, imprimitas arusan utji ukanak uñtʼañasawa. Ukanak sum apnaqañ yateqañatakejj yaqhanakaruw yanaptʼa maysna. Indice de las publicaciones Watch Tower, jan ukajj Jehová Diosan Testigonakapan Bibliat yatjjatapjjañapataki qellqatanjja, Bibliat apstʼat kunayman yatichäwinakaw utji, Biblian walja versiculonakapas qhanañchasirakiwa. Diosan Arupat yatjjatañataki yanaptʼa sat folletompiw yanaptʼasiraksna. Ukanjja, mapanaka, tiemponaka, medidanaka, ukat yaqhanakampiw utji.
Kuna wakiskir yatichäwinakas utji ukanakwa qellqtʼassna. Ukajj kuntï yatjjatawayktan uk jan armañatakiw yanaptʼistani. Yaqhanakarus uka toqet parlaraksnawa. Akhamwa jisktʼassna: “¿Kawkïrinakampis yatiyirista?” sasa. Taqe ukanakajj kuna wakiskir yatichäwinaktï yatjjatawaytan uk amtañatakiw yanaptʼistani, mayninakarus ukampiw yanaptʼaraksna.