Oraqen jan waltʼäwinak utjipana

Sierra Leona markankir Andrew sat chachajj akham siwa: “Jallun wal purintatapat ñeqʼejj sartankän ukhajja, kunanakatï utjapkitäna taqe ukanakwa chhaqtayjjäna. Qalltanjja jan kamachtʼirjamaw uñjasipjjayäta” sasa.

Islas Vírgenes cheqankir David chachajj akham sarakiwa: “Jachʼa thaya pasatat utar kuttʼanjjapjjayäta ukhajja, janiw kunas utj-jjänti. Jan kamachtʼirjamäpjjayätwa. Wawajas qonqortʼasisaw wal jachäna” sasa.

¿JUMAJJ ukhaman uñjasirïtati? Ukhaman uñjasirinakajj ajjsarayasisaw jakapjje, jan kamachtʼirjama, llakita, sustjata, jan creyirjama, ukhamaw jikjjatasipjjaraki. Jupanakat jilapartejja, aynachtʼata qarita ukhamäpjjewa, jiwañakwa munjjapjjaraki.

Jumatï oraqen jan waltʼäwinak utjipan taqe kun aptʼassta ukhajja, inas wali llakita jan kamachtʼirjama jikjjatassta. Jakañajj janiw wakisjjaspati sasin inas amuyjjaraksta. Ukampis Bibliajja, kunatsa jakaskakiñamajj wakisi ukwa qhanañchi. Jutïrin suma jakasiñaw utj-jjani sasin confiyañatakejj kuna razonanakas utji uksa qhanañcharakiwa.

BIBLIAN YATICHÄWINAKAPAW MÄ SUMA SUYTʼÄW CHURISTU

Eclesiastés 7:8 textojj akham siwa: “Mä kuna luräwi qalltañat sipansa tukuyañawa jukʼamp askejja” sasa. Jumatï jan waltʼäwinakan uñjasitamat wasitampi sum jakasjjañataki chʼamachasiñamächi ukhajja, janiw jakañajj wakisjjeti sasin inas amuyjjsta. Ukampis sum jakasiñatak pacienciampi chʼamachasiskakïta ukhajja, jukʼat jukʼatwa sum jakasjjäta.

Bibliajj akham siwa: ‘Jachañajj janiw utj-jjaniti, janirakiw llakisiñat ayqoñas utj-jjaniti’ sasa (Isaías 65:19). Uka arunakajja, Diosan Reinopajj aka oraq mä Paraisor tukuyjjani ukhaw phoqasini (Salmo 37:11, 29). Ukanjja, janiw jan waltʼäwinakajj utj-jjaniti. Kuna jan waltʼäwinakantï uñjasiwayktan ukanakjja, janiw mayampsa amtjjañäniti. Taqe chʼamani Diosajj akham siwa: “Kunatejj utjkän ukajj armatäjjaniwa, janirakiw khitis mayampsa [...] amtaskjjaniti” sasa (Isaías 65:17).

Ak amuytʼam: ‘Sum jakasiñasatakisa, mä suytʼäwiniñasatakisa’ kunatï wakiski ukwa Diosajj lurawayi, Reinopan sumankañan jakasiñaswa munaraki (Jeremías 29:11). Uk yatiñajj ¿jakañ munaskakiñamatakejj yanaptʼiristamti? Qalltan parlaniwayktan uka Sally warmejj akham siwa: “Diosan Reinopajj apnaqjjani ukhajj kunjamas jakasjjañäni, ukanakat lupʼiñaw uka jan waltʼäwinak armañatakisa jan aynachtʼañatakis yanaptʼiristam” sasa.

Akat mä jukʼarojj ¿kunanaksa Diosan Reinopajj lurarakini? Uk yatjjatañamatakiw chʼamañchtʼapjjsma. Ukhamatwa, jan walinakansa uñjasiwaykstajja, kunatsa jakañajj wali wakiskiri uk amuyäta. Oraqen jan waltʼäwinakajj janiw utj-jjaniti, uksa yatjjatarakïtawa. Ukañkamajj Biblian ewjjtʼanakapaw aguantaskakiñamatak yanaptʼätam.

Aka textonakaw yanaptʼiristam

Sumwa iktʼañama

“Mä jukʼa samartʼañajja askiwa, pä chʼama qaritat sipansa, thayaru katthapiñ munasa” (Eclesiastés 4:6).

Yatjjatasiwayki ukarjamajja, “jan waltʼäwinak pasatat jan sum ikiñajj jukʼampiw jan waltʼayistaspa, aynachtʼayarakistaspa”. Ukhamajja, sumwa iktʼañama.

Kunjamäsktasa ukwa arsusiñama

“Llakejj jaqerojj mayjtʼayiwa; suma arusti kusisiyiwa” (Proverbios 12:25).

Kunjamäsktasa ukjja, familiaramaru jan ukajj confiykay amigomaruw yatiyañama. Jupanakajj sum istʼasinjja, chʼamañchtʼapjjätamwa, yanaptʼapjjarakïtamwa.a

Jutïrin suma jakasiñaw utj-jjani ukwa lupʼiñama

“Diosan promesaparjamajj machaq alajjpachanakampi machaq oraqempi suyasktanjja, ukanjja cheqapar sarnaqañaw utjani” (2 Pedro 3:13).

a Maynitï walja tiempo sinti llakitakïskchi, aynachtʼatakïskchi ukhajja, doctoramp uñjayasiñapaw walïspa.