“¿Kunarak nayan bautisasiñajatak jarkʼitaspasti?”

1. Adanampi Evampin jan wali amtar puripjjatapatjja, ¿kuna jan walinakas utjawayi?

¿KHITIKIS kunatï walïki jan walïkaraki uk sañapa? Adanampi Evampejj aski ukhamarak ñanqha yatiñ churir qoqat manqʼapkäna ukhajja, Jehová Diosaru, leyinakapar jan confiyapjjatapwa uñachtʼayapjjäna. Kunatï walïki jan walïkaraki uk jupanak pachpa amtañwa ajllipjjarakïna (Gén. 3:22). Ukham lurasajja, Diosamp sum apasiñsa wiñayatak jakañsa aptʼasipjjänwa. Wawanakaparus mä usükaspas ukhamwa juchsa jiwañsa apkatapjjäna (Rom. 5:12). Kuntï lurañ amtapkäna ukajj kunayman tʼaqesiñanakwa utjayawayi.

2, 3. 1) Felipen arunakap istʼasajja, ¿kunsa Etiopía markankir mä jilïr oficialajj luräna? 2) ¿Kuna bendicionanaksa bautisasitasat katoqtanjja? 3) ¿Kuna jisktʼanakarus aka yatichäwin qhanañchaskañäni?

² Adanampi Evampejj jan walpunwa lurapjjäna. Ukampis Etiopía markankir mä jilïr oficialajja, Felipen arunakap istʼasajj ukspachaw bautisasïna. Ukhamatwa kuntï Jehová Diosasa Jesusas jupa layku lurapkäna ukar yuspäratap uñachtʼayäna (Hech. 8:34-38). Jiwasajj jakäwis Diosar katuyasktan, ukhamarak uka jilïr oficialjam bautisasktan ukhajja, Jehová Diosar confiyatasa, kuntï Jupasa Jesusas jiwas layku lurawayapki ukar yuspärataswa uñachtʼaytanjja. “Kunatï walïki jan walïkaraki uk Diosakiw saspa” sasin confiyataswa uñachtʼayaraktanjja.

³ Jehová Diosar servisajj kuna bendicionanaksa katoqtan ukanak amuytʼam. Kuntï Adanampi Evampejj aptʼasiwayapki ukanakwa Diosajj churistani, wiñay jakañsa churarakistaniwa. Jesucristor confiyatas laykusti, Diosajj juchanakas perdonistuwa, ukatwa qʼoma conciencianïtanjja (Mat. 20:28; Hech. 10:43). Jehová Diosan yaqha servirinakapampiw mä familiak Jupar sirvtanjja, jupanakajj Diosamp katoqatäpjjewa, jutïrin sum jakasiñwa suyapjjaraki (Juan 10:14-16; Rom. 8:20, 21). Taqe uka bendicionanaksa katoqkstanjja, Diosar uñtʼjjapjje ukanakat yaqhepajj janiw bautisasiñ munapkiti, kunjamtï Etiopía markankir jilïr oficialajj bautisaskäna ukhama. ¿Kunatsa jan munapkpacha? ¿Kunas bautisasiñatak yanaptʼaspa?

¿KUNATSA YAQHEPAJJ BAUTISASIÑ JAN MUNAPKI?

4, 5. ¿Kunas Avery sat waynarusa Hannah sat tawaqorus llakisiyäna?

⁴ Jupanak pachpatwa pächasipjje. Avery sat waynan awk taykapajj Testigöpjjewa. Awkipajja, wawanakapar suma uywirita, suma jilïr irpirit uñtʼatawa. Ukhamäkchisa, Avery waynajj janiw bautisasiñ amtkänti. Jupajj akham siwa: “‘Janiw awkij-jamäkäti’ sasaw amuyayäta” sasa. Congregacionan utjki uka lurañanak janis phoqerjamäkaspa ukhamwa amuyasirakïna. Jupajj akham saskakiwa: “‘Waljanitak oración lurañajataki, discurso arstʼañajataki, jan ukajj predicañatak grupo apsuñajatakiw mayipjjetani’ sasaw ajjsarayäta” sasa.

⁵ Hannah sat 18 marani tawaqojj wali ajjsarirïnwa. Jehová Diosar serviri awk taykan uywatas jilsuwaykchejja, janis kunatak sirvkaspa ukhamwa amuyasïna. Awisajja, wali llakitäsajj jupa pachpaw jan walinak lurasirïna, ukajj jukʼampiw llakisiyäna. Jupajj akham siwa: “Kuntï lurkayäta uk janiw awk taykajarusa ni khitirus awiskayätti. ‘Naya pachpa jan walinak lurasitajat janipuniw Jehová Diosajj munaskitaniti’ sasaw amuyayäta” sasa.

6. ¿Kunatsa Vanessajj jan bautisaskäna?

⁶ Janiw suma amigonakanïpkiti. 22 marani Vanessa sat tawaqojj akham siwa: “Mä munat amiganiyätwa, jupampejj niya 10 maranakaw uñtʼasipjjayäta” sasa. Ukampis Diosar jan serviri uka amigapajj janiw bautisasiñapatak chʼamañchkänti, ukatwa Vanessajj wal llakisïna. Jupajj akham siwa: “Amiganakanïñajj nayatak wali chʼamänwa, ukatwa jupamp jan parljjañ wal ajjsarayäta, ‘janiw jupjam yaqha amiganïñ puedkäti’ sasaw sayäta” sasa.

7. ¿Kunar purtʼasiñsa Makaylajj ajjsaräna, ukat kunatsa ukham amuyäna?

⁷ Juchar purtʼasiñwa ajjsarapjje. Makayla tawaqojj phesqa maranïskäna ukhaw jilapajj congregacionat jaqsut uñjasïna. Jilapan ukham uñjasitapatjja, awk taykapajj wal llakisipjjäna. Uk uñjasaw Makaylajj jan bautisasiñ munkänti, akham siwa: “Bautisasiñ wal ajjsarayäta. ‘Juchar purtʼasitajat congregacionat jaqsupjjetani ukhajja, jukʼampiw awk taykajajj llakisipjjani’ sasaw amuyayäta” sasa.

8. ¿Kunsa Miles sat waynajj ajjsaräna?

⁸ Uñisitäñwa ajjsarapjje. Miles sat waynat parltʼarakiñäni. Awk taykapajj divorciatäpjjewa, tatapajj Testigowa, mamapajj janiw Testigökiti. Miles waynajj akham siwa: “18 maranakaw mamitajamp jakawayta. Papitujajj bautisaskäna ukhajja, mamitajajj wal colerasïna, uk amtapuntwa, ukatwa ‘bautisasiñ munta’ sasin mamitajar jan siskayätti. ‘Bautisasï ukhajj uñisitaniwa’ sasaw ajjsarayäta” sasa.

¿KUNANAK LURAÑAS YANAPTʼIRISTAM?

9. Jehová Diosajj wali munasiri, pacienciani Diosätap yateqäta ukhajja, ¿kun lurañsa munäta?

⁹ Adanampi Evampejj janiw Jehová Diosar taqe chuym munasipkänti, ukatwa Jupar jan serviñ amtapjjäna. Ukhamäkchïnsa, wawanïpjjañapataki, ukat kunjamsa wawanakapar uywapjjani uk jupanak pachpa amtapjjañapatakiw Diosajj jaytäna. Ukampis munañaparjam sarnaqañ amtasajja, jan amuytʼasirïpjjatapwa Adanampi Evampejj uñachtʼayapjjäna. Jilïr wawapajj sullkaparuw jiwayäna, jaqenakajj jupanakatakik taqe kuns muniri, jaqe masipar jan walinak luriri ukhamaw tukupjjarakïna (Gén. 4:8; 6:11-13). Ukampis Diosajja, Jupar serviñ munirinakar kunjamsa salvani uk yatjjänwa (Juan 6:38-40, 57, 58). Jehová Diosajj wali munasiri, pacienciani ukham Diosawa. Jupar jukʼamp uñtʼaskakïta ukhajja, jukʼampirakiw munasïta. Nayrïr chacha warmjam munañamar sarnaqañat sipansa, Diosar jakäwim katuyasiñwa munarakïta.

10. ¿Kunjamsa Salmo 19:7 qellqatat lupʼiñajj Diosar serviñatak yanaptʼiristam?

¹⁰ Jehová Diosar uñtʼaskakiñamawa. Jupar jukʼamp uñtʼañajja, juma pachpat jan sint pächasiñatakiw yanaptʼätam. Avery sat waynarojj Salmo 19:7 (liytʼañataki) qellqat liytʼaña, ukhamarak kuntï ukan siski ukat lupʼiñaw yanaptʼäna. Uka qellqatajj kunjamsa jakäwipan phoqasïna uk amuyasajja, jukʼampiw Diosar munasïna. Diosar ukham munasiñajj juma pachpat jan sint pächasiñataki, ukat Diosar jakäwiman nayrar uchañatakiw yanaptʼätam, Jupatakjam sarnaqañwa munarakïta. Hannah sat tawaqojj akham siwa: “Naya pachpa jan walinak lurasta ukhajj Jehová Diosaruw chuyma ustʼayta, uk amuyañatakiw Biblia liyiñasa, Bibliat sapak yatjjatañas yanaptʼawayitu” sasa (1 Ped. 5:7). Kullakajj kuntï yateqkäna ukarjam sarnaqañatakiw chʼamachasïna (Sant. 1:22). Jupajj akham saskakiwa: “Jehová Diosar istʼañajj kunjamsa yanaptʼitäna uk amuyasajja, jukʼampiw Jupar munasiyäta. ‘Yanaptʼap munkä ukhajj yanaptʼapunitaniwa’ sasaw jichhajj confiyta” sasa. Hannah kullakajj janiw jupa pachpajj jan walinak lurasjjeti, Diosar jakäwip katuyasisajj bautisasjjarakiwa.

11. 1) ¿Kunsa Vanessajj suma amigonakanïñatak luräna? 2) ¿Kunsa Vanessa tawaqot yateqsna?

¹¹ Suma amigonakanïñamawa. Vanessa tawaqorojja, janiw amigapajj Diosar serviñatak yanaptʼkänti. Ukatwa Vanessajj jupamp jan parljjänti. Ukampis janiw ukak lurkänti, jan ukasti, congregacionan yaqha amiganakanïñatakiw chʼamachasïna. Jupajj akham siwa: “Noé chachampina familiapampin sarnaqäwipaw yanaptʼitäna. Jupanakajj jan wali jaqenak taypinwa jakapjjäna, ukatwa jupanakkam sum apasipjjäna” sasa. Vanessajja, bautisasisajj precursorat serviñwa qalltäna. Jichhajj akham siwa: “Diosar ukham serviñajja, congregacionajana ukat yaqha congregacionanakan suma amigonak jikjjatañatakiw yanaptʼawayitu” sasa. Jumatï Diosan arunakap taqe chuyma yatiyañatak chʼamachasïta ukhajja, ukhamarakiw suma amigonak jikjjatäta (Mat. 24:14).

12. ¿Kunsa Adanampi Evampejj jan lurapkäna, ukat kunjamansa uñjasipjjäna?

¹² Janiw ajjsarirïñamäkiti. Jiwasatï Jehová Diosar taqe chuyma respetañäni ukhajja, janipuniw kunatï chuymap ustʼaykaspa uk lurkañäniti (Sal. 111:10). Adanampi Evampitï Diosar ukham respetapjjaspänjja, janiw Jupa contrajj saytʼasipkaspänti. Ukampis Dios contra saytʼasipjjäna ukhajja, “ukspachaw nayranakapajj jistʼartäna”, mä arunjja, juchararäpjjatapwa amuyasipjjäna, wawanakaparojj mä usükaspas ukhamwa juchsa jiwañsa apkatapjjañapäna. Diosan leyinakap pʼakintapjjatap yatisajja, qʼalalasïpkatap amuyasajj phenqʼasiñat imjjatasipjjänwa (Gén. 3:7, 21).

13, 14. 1) 1 Pedro 3:21 textorjamajja, ¿kunatsa jiwañar jan sinti ajjsarañasäki? 2) ¿Kunatsa Jehová Diosar munastanjja?

¹³ Jiwañar sinti ajjsarañajj janiw walïkiti. ¿Kunatsa ukham sistanjja? Kunjamatsa wiñayatak jakassna uk Jehová Diosajj yatiwa. Jiwasatï juchar purtʼasisajj taqe chuyma arrepentisiñäni ukhajja, Diosajj Yoqapan jiwatapar confiyatasat perdonistaniwa. ¿Kunjamsa Jesusan jiwatapar confiyatas uñachtʼaysna? Diosar jakäwis katuyasisa, ukhamarak bautisasisaw uñachtʼaysna (1 Pedro 3:21 liytʼañataki).

¹⁴ ¿Kunatsa Jehová Diosar munastanjja? Jehová Diosaw kunatï sumäki uk sapür churistu, amtanakapatsa kunatï cheqäki uksa yaticharakistuwa (Juan 8:31, 32). Juparakiw jiwasar irpañatakisa yanaptʼañatakis cristiano congregación uttʼayawayi. Akapachan jan walinakajj utjki ukanakar saykatañatakis Diosaw yanaptʼistu, ‘jutïrin wiñayatakiw wali sum jakasjjapjjäta’ sasaw sarakistu (Sal. 68:19; Apoc. 21:3, 4). Jehová Diosajj kunjamsa munasitap uñachtʼayistu uka toqet lupʼtan ukhajja, jukʼampiw Jupar munastanjja, respetaraktanwa, ukatwa kunatï chuymap ustʼaykaspa ukanak jan lurktanti.

15. Makayla tawaqorojja, ¿kun amuyañas “jucharuw purtʼasï” sasin jan ajjsarañatak yanaptʼäna?

¹⁵ Jehová Diosajj perdonasir Diosawa, uk amuyañaw Makayla tawaqorojj “jucharuw purtʼasï” sasin jan ajjsarañatak yanaptʼäna. Jupajj akham siwa: “Taqeniw pantjasirïtanjja, jan walinaksa lurtanjja. Ukampis Jehová Diosajj wal munasistu, Jesusan jiwatap laykuw perdonarakistu” sasa. Makaylajja, Diosar wal munasitap laykuw jakäwip Jupar katuyasisajj bautisasïna.

16. Miles waynarojja, ¿kunas mamapar “bautisasiñ munta” sasin jan ajjsaras sañatak yanaptʼäna?

¹⁶ Mamapar “bautisasiñ munta” sañ ajjsarkäna uka Miles sat waynajja, congregacionanak tumptʼir mä jilataruw yanaptʼa mayïna. Jupajj akham siwa: “Uka jilatajj nayjamarakiw jilsutayna, mamapajj janiw Testigökänti. Uka jilatawa, ‘nayaw bautisasiñ munta, janiw papitujajj obligkituti’ sasin mamitajar amuytʼayañajatak yanaptʼitäna” sasa. Miles waynajj “bautisasiñ munta” sasin mamitapar säna ukhajja, wal mamapajj colerasïna, janipuniw bautisasiñap munkänti, ukatwa Miles waynajj utat sarjjäna. Jupajj saskakiwa: “Diosajj kuntï naya layku lurawayki uk yatiñajj chuymaruw purtʼitäna. Jesusan jaqenak layku jiwatapat amuytʼasajja, qhawqsa Jehová Diosajj munasistu ukwa amuyayäta. Ukaw jakäwij Jupar katuyasiñatakisa bautisasiñatakis yanaptʼitäna” sasa.

KUNTÏ AMTAWAYKTA UKARJAM LURAM

17. ¿Kunsa taqenis uñachtʼaysna?

¹⁷ Edén jardinan aski ukhamarak ñanqha yatiñ churir qoqat manqʼasajja, Awkip contra saytʼatapwa Eva warmejj uñachtʼayäna. Adanajj uka qoqan achupat manqʼäna ukhasti, kunanaktï Jehová Diosajj jupa layku lurkäna ukanakat jan yuspäratapwa uñachtʼayarakïna. Taqeniw jan Adán chachjamätassa, ni Eva warmjamätassa uñachtʼaysna. Jiwasajj Diosan bendicionanakapat wal yuspärtanjja. Ukat bautisasisajja, “kunatï walïki jan walïkaraki uk Diosakiw saspa” sasin iyawsataswa uñachtʼaytanjja, Jupar munasitasa, confiyataswa uñachtʼayaraktanjja.

18. ¿Kunsa Diosar kusisita serviñatakejj lurañama?

¹⁸ Bautisasjjtan uka qhepatjja, amtasarjam sarnaqañat sipansa Diosan leyinakaparjamaw sapür sarnaqañasa. Ukham lurañajj chʼamäkchisa, waljaniw sapa marajj ukham lurapjje. Jumajj jupanakjamarakiw Diosan leyinakaparjam sarnaqasma. Ukatakejja, Bibliat yatjjataskakiñamawa, jilat kullakanakatsa janiw jayarstʼañamäkiti, wali munasiri alajjpachankir Awkimat kunanaktï yateqkta ukanakatsa yaqhanakaruw parlañama (Heb. 10:24, 25). Mä amtar puriñatakisti, kuntï Jehová Diosajj Arup toqesa markap toqes ewjjtʼktam ukaruw istʼañama (Is. 30:21). Ukham luräta ukhajja, kusisitaw jakasïta (Prov. 16:3, 20).

19. ¿Kunsa janipun armañamäki, ukat kunatsa?

¹⁹ Jehová Diosan ewjjtʼanakapajj qhawqsa yanaptʼtam uk janipun armkäta ukhajja, jukʼampiw Jupar munasïta, leyinakapsa wali valoranitwa uñjarakïta. Supayajj kunsay churañ munkchïtamjja, janipuniw Diosar serviñ jaytkätati. Akat waranqa maranakatjja, “walikpun bautisasiwayta” sasin wali kusisitaw säta.