“¡Cristor arkapxañäni!” sat Jachʼa Tantachäwir jawstʼañatakix Uraqpachanwa yatiyatäni
Yatiyirinakaxa mayampiw jachʼa tantachäwir jawstʼañataki qillqatanak lakirapxani
1 Pasïr maraxa “¡Niyawa qhispiyatäxapxañäni!” sat Jachʼa Tantachäwirux taqiniruw jawstʼasirakïna, ukaxa yatiqañ munirinakatakix wali askipunïnwa. Khitinakatï uka jawstʼäwir iyawsasa jutapkäna ukanakaxa Jehová Diosan Qhanañchirinakapamp chikaw wali suma yatichäwinak katuqawayapxi (Isa. 65:13). Cristiano jilat kullakanakasamp chikaw jupanakax maynit maynikam chʼamañchasiwayapxi (Sal. 133:1). Ukhamax mayamp jutapxañapatakixa, aka marax “¡Cristor arkapxañäni!” sat Jachʼa Tantachäwir jawstʼañatakix wasitatwa qillqatanak taqinir lakirañäni.
2 Pasïr marat kamsapxisa. “¡Niyawa qhispiyatäxapxañäni!” sat Jachʼa Tantachäwir jawstʼañax wali sumpun yanaptʼawayi sasaw taqi markanakat yatiyanipxi. Walja chiqanakanwa jiwasat wali sum parlasiwayi. Amuytʼañataki, mä markanxa, mä periodicox uka tuqit wali jachʼwa qillqatayna. Akham sänwa: “Janïr uka tantachäwi apaskipanxa Jehová Diosan Qhanañchirinakapax taqinimp parlañatakiw wal chʼamañchasipxi: jukʼamp horanakwa yatiyapxäna, wali jayanak sarnaqapxäna ukat jankʼakirakiw parlapxarakïna” sasa. Yaqha markanxa ukhamarakiw periodistanakax kunjamsa Qhanañchirinakax uka qillqatanak lakirasipki uka tuqitxa wal qillqapxatayna. Janïr jachʼa tantachäwi apaskipanwa kunjamsa yatiyasktanxa uka tuqitx mä kimsa periodiconakax wali sum qillqapxäna. Mä periodistaxa jiwasat waljpun qillqatayna, periodicon domingonak misturi chiqanxa mä pä janat jilaw qillqatayna. Iyawsäwisata, jilat kullakanakasata, qillqatanak lakiräwita, jachʼa tantachäwita, uka tuqinakatwa qillqatayna. Kunapachatï mä yatiyir kullakax jachʼa tantachäwir jutañapataki mä warmir invitación churkäna ukhaxa, uka warmix akham sänwa: “Anchhitaw aka tuqit periodicon liyiskäyatxa” sasa. Yaqha jaqixa akham sarakïnwa: “Anchhitaw jumanakxat liyiskäyatxa, ¡jichhax purtʼanipxaraktasa! ¿Aka qillqatax nayatakiti?” sasa. Ukat akham sarakïnwa: “Jehová Diosan Qhanañchirinakapjamaxa akham lurasax wali sumpun lurapxtaxa” sasa.
3 Waljaniw invitacionas aptʼasita jachʼa tantachäwir purinipxäna. Yaqhipanakax jaya markanakatwa purinipxäna. Jaqinakar wali suma jawstʼatasatwa jachʼa tantachäwir jutirinakax jukʼamp jilxattawayi. Mä markanxa sapa patakatxa pä tunk paqallqunimpiw pasir marat sipanxa jutapxatayna.
4 Sapa tamanxa kunjamsa lakirasini. Jachʼa tantachäwitaki kimsa semana faltkipanwa yatiyirinakax invitacionanak lakirañ qalltapxani, kawkhantï tamax yatiyañapäki ukxa tukuyañkam taqinir lakirapxañapa. Sinti jachʼächixa, mä semana faltkipanxa chʼusa utanakar sum amuytʼasisaw invitación jaytapxaspa. Tamanakax kawkhantï yatiyapki uk tukuyañataki ukat invitacionanak tukuyañatakiw chʼamachasipxañapa. Invitacionanakatï jiltʼanixa precursoranakaw lakirapxaspa.
5 Jaqir kamsañänisa. Inas akham sas qalltsna: “Mä jachʼa tantachäwiw utjani, ukar jutapxañapatakiw taqinir jawstʼasipktxa, uka jawstʼäwix Uraqpachanwa lurasiski. Aka invitacionax jumatakiwa. Akanwa uka tuqit jukʼamp qhanañchasiski”. Ukham mä jukʼa arunakampiki parltʼätaxa jukʼampiw lakiräta. Ukhamarusa, maynitï jisktʼasinixa, uka jisktʼäwinakapar qhanañchätawa, ukat jukʼamp yatiqañ munaskakchixa, direccionap qillqtʼasim ukat jankʼaki kuttʼañamawa.
6 ¡Wali askipuniw Cristor arkañataki chʼamachasiñaxa! (Juan 3:36.) Jutïr jachʼa tanchäwixa uk lurañatakiw taqi ukankirinakar yanaptʼistani. Chiqpachansa, “¡Cristor arkapxañäni!” sat Jachʼa Tantachäwir Uraqpachan yatiyatasatxa waljaniw muspharapxani. Ukhamaxa, taqinir yatiyañatakiw chʼamachasiñama. Uraqpachankir jilat kullakanakasamp chika invitacionanak lakirañataki chʼamachasitamatxa Jehová Diosax jumarux bendispan.