Invitacionanak lakirasajj walja askinak jikjjatasi
Kimsa uru jachʼa tantachäwi janïr purinkipanjja, kimsa semananak faltkipanwa invitacionanakajj taqe jaqenakar lakirasiskani, cheqas ukan yanaptʼañajj wali wakiskiripunïniwa. Khitinakatï pasïr maranakan invitación katoqawayas jachʼa tantachäwir sarawayapki ukanakajj Bibliat apstʼat arstʼäwinak istʼasa, tantachäwi sum waktʼayasitapa, ukat kunayman luräwinak utjki ukanak sum lurasitapa ukhamarak taqenis mä wawaki wali munasiñampi sum irnaqtʼapjjatap uñjasajj wal muspharapjje (Sal. 110:3; 133:1; Isa. 65:13, 14). ¿Ukhamajj invitacionanak lakirasajj askinak utjaspati? ¿Jaya cheqanakan jakapki ukanakajj tantachäwir sarapjjaspati?
Khä 2011 maran kimsa uru jachʼa tantachäwi pasatatjja, mä sucursalajj mä warmin cartapwa katoqatayna, uka warmejj Jehová Diosan Qhanañchirinakap uñjasajj imantasirïnwa, ukampis mä invitación uta punkupan jikjjatatayna. Uka cartajj akham sänwa: “Mä jachʼa utanïtwa ukat chachajampis wali sum apasirakta ukat ukakis kusisit jakasiñatakejj wakiskaspa ukham amuyayäta. Ukampis janiw ukhamäkänti, janiw kusisit jakaskayätti. Ukatwa sabadojj uka jachʼa tantachäwir sarañ amtawayta, ukar puriñatakejj 320 kilometronakwa autojat sararakiyäta”. Cheqas jupatakejj uka tantachäwinkañajj wali khusänwa, ukatwa domingo urump qheparañatakejj chachapar jawsatayna. Ukat jupajj akham saskakiwa: “Taqpach arstʼäwinakwa istʼayäta ukat Jehová Diosan Qhanañchirinakaparus waljanirurakiw uñtʼawayta. Ukat janikis aka tantachäwejj tukuskaspa sasaw sarakiyäta”. Utapar kuttʼjjasajj Bibliat yateqañwa qalltawayäna ukat pusi phajjsitjja, janïr bautisaskasinwa yatiyir mistjjäna. Ukat saskakiwa: “¡Walikpunjjay uka invitación uta punkujan jikjjatchiyäta! Jichhajj kusisitaw jakasta” sasa.
Khitinakatï invitación katoqapkani ukanakat mä qhawqhanis Jachʼa tantachäwirojj jutapjjapuniniwa. Ukhamasti, aka wakiskir luräwin yanaptʼapjjapuniñäni. Ukat invitacionanakatï jiltʼistani ukhajja, kawkhantï jachʼa tantachäwejj apaskani ukaruw apjjañasa, ukhamatwa tantachäwir sarkasin jaqenakar invittʼasispa.
[5 janan fotopa]
¿Kunjamsa invitacionajj lakirasiskani?
Waljanir invittʼañatakejj jukʼa arunakampikiw parlañasa. Inas akham sissna: “Kamisaraki. Oraqpachanwa aka invitacionajj lakirasiski. Jumatak jayttʼawayañ munaraktwa. Kunatakisa ukat kawkhansa apasiskani ukajj akanwa qhanañchasiski” sasa. Taqe chuymaw irnaqtʼañama. Sabadomp domingompejj invitacions jaytkchïtajja, wakisirjamäni ukhajj revistanak churarakismawa.