Diosan Apnaqäwipar suytʼapxañapatakiw yatiytanxa
1 Aka jan wali tiemponakanxa, jaqinakax “jan kuna suytʼañani[w]” jakasipxi (Efe. 2:12). Yaqhipax qamirkankañaru, akapach apnaqirinakaru, ukat jaqinakan yatxatatanakaparuw (ciencia) atinisipxi, ukat ukanakax janiw askir apkiti. Ukampis jiwasanakarux “suytʼäwiw sum katxäsistu ukhamarak almasa uñjaraki, kunjämtix anclax mä barcorux katxäsixa ukhama”. ¡Wali kusiskañawa! (Heb. 6:19.)
2 Diosan Apnaqäwipax aka Uraqxa paraisoruwa tukuyani. Uñtʼatanakasasa familiaranakasasa jaktanxapxaniwa (Hech. 24:15). Pisinkañasa, ina chʼusat tʼaqhisiñasa, usuntañasa, chuymankipstañasa, jiwañasa tukusxaniwa (Sal. 9:18; Mat. 12:20, 21; Apo. 21:3, 4). Diosan taqi uka arsutanakapasa ukat yaqhanakasa niyaw phuqasxani. ¿Diosan kawkïr arsutap phuqasiñapsa jumax wal suyta?
3 Suma yatiyäwinakax yatiyañatakiwa. Diosan Apnaqäwipar suytʼañat yatisaxa, ¡kamisarak jan yatiykañänisti! Diosar munasiñampi ukat jaqi masisar munasiñampix Jesusat yatiqasiñwa yanaptʼistu, ukhamatwa ‘suma yatiyäwinak pobrenakar churtanxa; katuntatanakar qhispit sarnaqañatsa yatiyaraktanxa, ukat ukhamatwa juykhunakarus uñatatañ tuqita ukat tʼaqhisitanakarus qhispiyasiñ tuqit yatiyaraktanxa’ (Luc. 4:18). Apóstol Pablox qhatunakana ukat kawkjantï jaqix utjkäna ukawjanakanwa suma yatiyäwinak yatiyäna; ukatxa jankʼakiw ‘parlañar uchasïna’ (Hech. 18:5). Pablot yatiqasiñänixa, ‘akapach yänakar munañasa, qamiriptañ munañasa’, cristianonakjam suytʼasktan ukanak janiw chuymasat apskistaniti (Mar. 4:19).
4 Diosan yatiyäwinakapar jan yäqir jaqimpi jikistan ukhasa, Diosan Apnaqäwipat jan istʼañ munirimpi jan ukax Diosa contra saytʼirimpi jikistan ukhasa, janiw Diosan Apnaqäwipar suytʼäwisxa chuymasat apsktanti, kunattix ‘kuntï suytʼktan ukanxa jan payachasisa chʼaman saytʼatätanwa’ ukat ‘evangeliotxa, mä arunxa, suma yatiyäwinakatxa janiw phinqʼasktanti’ (Heb. 10:23; Rom. 1:16). Jiwasatï jan payachasisa taqi chuyma chʼamachasiskakiñänixa, yaqhipax istʼxapxistaspawa.
5 Akapachax kunjam jan waltʼäwinkisa, ukat kunjamsa profecianakas phuqasiski ukanakatxa parlasksnawa, ukampis amtapxapuniñäni, janiw akapach chhaqtañapataki juchañchirinakäktanti. Jan ukasti, Diosan Apnaqäwipar suytʼapxañapataki suma yatiyäwinak yatiyirinakäpxtanwa. Ukhamasti, jan payachasisa kusisit taqi chuymampi yatiyir mistsusipkakiñäni, ukhamat “kunatix suyatäki ukax phuqhasiñapataki” (Heb. 6:11).