Yatiñampi sarnaqapxañäni
1 Kunapachatï Jesusax chawlla katuri pusi jaqirux arkirijäpxam siskäna ukhaxa, “ukspachaw Jesusarux arkapxäna” janiw amuytʼasïw sapkänti (Mat. 4:18-22). Ukat Tarsonkir Saulox cristianoptxäna ukat wasitampi uñjxäna ukhaxa, ‘ukspacharakikiw sinagoganakana Cristota yatiyäna’ janiw jupax jay lupʼkänti (Hech. 9:20, Machaka Testamento). Tiempox janiw saytʼkaspati, janirakiw kuttʼankaspasa. Ukatwa yatiñampi jakañax wali wakiskirixa, ukat tiempo utjaskipanxa, janiw ina chʼusar aptʼañasäkiti (Efe. 5:15, 16).
2 Jan waltʼäwinakaw jutaspa. Arumanthixa janiw kunjamtix jichhürux Jehová Diosar luqtasktan ukham luqtxsnati (Sant. 4:14). Maya, kunattix “horasax jan waltʼañax taqiniruw puri” (Ecl. 9:11). Paya, kunattix taqiniw chuymankipstaskttanxa. Ukat akapachanxa, sapa maratjamwa ‘chʼama tukuñ urunakarux’ mantasktanxa, ukat Jehová Diosatak kunjam irnaqtʼañti munktan ukax janiw ukhampach irnaqañjamäxiti (Ecl. 12:1). Ukhamasti, suytʼakï ukat Diosar jakäwij katuyasxä sañasa ukhamaraki tiemponïxä ukhaw jukʼampi irnaqxä sañasa janipuniw askïkaspati (Luc. 9:59-62). Amuytʼañataki, Abraham chachaxa chuymankipstatäxasaxa jan kuna llakini sumakiw jikxatasïna ukat ‘chuymantʼata kusisita’ ukhamaw jiwawayxäna, kunattix Jehová Diosar katuyasisaw yatiñampi jakasiwayäna (Gén. 25:8, Traducción del Nuevo Mundo).
3 Tiempox tukusiskiwa. “Jukʼa tiempokiw utjxistu”; ukhamasti janiw tiempo ina chʼusar aptʼañasäkiti (1 Cor. 7:29-31). Niyaw akapachax tukusini ukat uwijar uñtat suma jaqinakaru, yapükaspas ukham jachʼa cosecha apthapiñax niyaw tukusirakikini (Apo. 14:15). Ukhamaxa yatiyir mistsupxañäni, janipuni kunampisa ni kuna llakimpisa tiempo apaqayasiñäniti (Luc. 21:34, 35). ¡Apthapiñ yanaptʼasaxa wali kusisitaw jikxatasiñäni!
4 Diosatak kuna luräwin irnaqañax utjani ukhaxa, janipuni “janiw” sapxañäniti. “Jichhüru tiempox utjkipana,” taqi kunansa Jehová Diosar luqtañataki chʼamachasipxañäni (Heb. 3:13). Ukhamatwa, yatiñanïtasxa uñachtʼayañäni, kunattix “kawkïritix Diosan munañap lurki ukax wiñayatakiw jaki” (1 Juan 2:17).