Yapunakax apthapiñatak niy puquratäxiwa
1. ¿Kuna aski luräwis jichhürunakan apasiski?
1 Mä Samaritana warmir parlañ tukuyasaxa, akham sasaw Jesusax arkirinakapar säna: “Uñtapxam, yapunakax niyaw puquratäxi” sasa (Juan 4:35, 36). Jïsa, Diosar yupaychañatakiw jaqinakar apthapisiskäna ukat ukxa uraqpachanwa lurasiñapäna, uk Jesusax yatïnwa. Jupax alaxpachankchisa, cosecha apthapisiñapatakix yanaptʼaskakiwa (Mat. 28:19, 20). Cosecha apthapiñ urunak niya tukuskipanxa, ¿kunas jankʼak apthapiñ jilxattaskatap uñachtʼayistu?
2. Uraqpachan cosecha jankʼak apthapisiskatapxa, ¿kunas uñachtʼayi?
2 Uraqpachanwa apthapisiski: 2008 septiembre phaxsit 2009 agosto phaxsi tukuykamaxa, sapa patakatx 3,2 ukhampiw yatiyirinakax uraqpachan jilxattawayi. Diosan arupat yatiyañatak jarkʼatäki uka markanakanxa sapa patakatx 14 ukhanimpiw jilxattawayaraki. Ukat sapa phaxsixa 7.619.000 jilaniruw Bibliat yatichasitap informawayapxi, ukaxa uraqpachan utjki uka yatiyirinakat sipansa jilakipawayiwa, ukat 2007 septiembre phaxsit 2008 agosto phaxsi tukuykam utjkäna ukat sipansa niya 500.000 ukhanimpis jilxattkaspa ukhamawa. Ukham walja chiqanakan jilxattatapatxa Escuela de Galaad ukat mistsur misioneronakaw jukʼamp munasi. Walja markanakanwa anqäx markanakan parlapki uka arunakatxa jilxattaski. Niya apthapiñ janïr tukuskipanxa Jehová Diosaw jankʼaki apthapisiñapatak chʼamañchtʼaski (Isa. 60:22). Kawkhantï yatiykta uka chiqanxa, ¿kunjam chuymampis yatiyaskta?
3. Jaktan uka chiqan apthapiñatxa, ¿kunsa yaqhipax amuyapxaspa?
3 Jaktan uka chiqanakan apthapisiskarakiwa: “Kawkhantï yatiyktan uka chiqanakanx janiw khitis istʼañ munxapxiti” sasaw yaqhipax sapxi. Amuyatatxa ukax chiqäspawa, kunattixa yaqhip chiqanakanxa janiw nayrjamax Bibliat yatiqañ munirinakax utjxiti. Ukatwa yaqhip jilat kullakanakax cosecha apthapiñax tukutäxiwa mä qhawqhakiw utjxi sasin amuyapxi. Ukampis ukax ¿chiqäpachati?
4. ¿Kunjamsa yatiyir sarasax irnaqtʼañasa, ukat kunatsa?
4 Yapu apthapiñanxa, jankʼakipuniw qalltat tukuykam irnaqataxa. Kunatsa jankʼaki irnaqañasa ukxa Jesusan aka arunakapat amuytʼañäni: “Cosecha apthapiñax waljawa, ukampis irnaqirinakax jukʼanikirakiwa. Mayipxamaya yapunirux jukʼamp irnaqirinaka khitaniñapataki” (Mat. 9:37, 38). Ukhamarusa Jehová Diosaw yapuninjamax kunapachasa ukat kawkinsa yapux apthapisini uk amti (Juan 6:44; 1 Cor. 3:6-8). Ukhamasti, ¿kun lurañas jiwasar waktʼistu? Bibliax akham sasaw qhanañchi: “Alwataxa yapucham, [‘jaypʼurusti jan qarjtas irnaqaskakim’, NM]” sasa (Ecl. 11:4-6). Jïsa, yapu apthapiñ tiempo tukusiskipanxa, jankʼakiw jan qarjtas irnaqaskakiñasa.
5. Janisay jaqinakax istʼañ munapkchixa, ¿kunatsa taqi chuyma yatiyaskakiñasaxa?
5 Yapu apthapiñax janiw tukuskiti: Kawkhantï tamax yatiyki uka chiqantï kutin kutin yatiyaskstan ukat janis khitis istʼirjamächixa, kunanakatï aka uraqpachan pasaski uka tuqinakat amuytʼasaw istʼañ munxapxaspa ukat kunsa jutïrin lurapxani uk amuytʼasipxaspa. Wayn tawaqunakaxa, jilïriptxasax jan llakini ukat sum jakasiñ wakisitapwa amuyapxaraki. Ukat jan qarjtasa, kutin kutin saratasatxa inas khitinakatï nayrax jan istʼañ munapkäna ukanakax istʼxapxarakchistaspa. Ukhamarusa khitinakatï Diosan arunakap janipuni istʼañ munapki ukanakarus yatiyañasawa (Eze. 2:4, 5; 3:19). Ukatwa taqi chuyma ukat jan qarjtasa yatiyaskakiñasa (2 Tim. 4:2).
6. Janis istʼañ munapkchixa, ¿kunas taqi chuyma yatiyaskakiñatakix yanaptʼistani?
6 Kawkhantï yatiyktan uka chiqanakan jan istʼañ munapkani ukhaxa, ¿kunas taqi chuyma yatiyaskakiñatakix yanaptʼistani? Utat uta yatiyiris sarkchiñänixa, qhatunakansa ukat telefonotsa yatiyaraksnawa. Ukat kunjamsa chuymar purtʼañatak yatiyañ qalltsna uksa yaqha tuqinakat amuytʼaraksnawa. Jan ukax inas jaypʼu tuqiru jan ukax kunapachatï jaqinakax utapankapki ukhaw yatiyirix misturaksna. Ukat yaqha arunak parlir jaqinakar yatiyañatakix inas yaqha aru yatiqaraksna. Maysa tuqitxa, walja yatiyirinakax jan utjki uka chiqanakaruw jakir sarxaraksna. Ukhamasti, jankʼaki cosecha apthapiñäkaspas ukham amuyañäni ukhaxa, kuntï lurañasäki uk lurañatakiw chʼamachasiñäni.
7. ¿Kunapachkamas cosecha apthapiskakiñasa?
7 Yapuchirinakax cosecha apthapiñatakix mä tiemponikïpxiwa, ukhamasti jan samartʼasapuniw tukuyañkam apthapipxi. Diosar yupaychapxañapatak jaqinakar apthapiñanxa ukhamarakiwa. Ukampis ¿kunapachkamas apthapiskakiñäni? “Akapachan tukusiñapkama” ukat Diosan jachʼa urup puriniñapkama (Mat. 24:14; 28:20). Kunjamtï Jesusax tukuyañkam irnaqkänxa, ukhamarakiw jiwasax irnaqañ muntanxa (Juan 4:34; 17:4). Ukhamasti, kusisita, taqi chuyma ukat jan qarjtas Diosan jachʼa urup puriniñapkam yatiyaskakiñäni (Mat. 24:13). ¡Janïraw yapu apthapiñax tukuyaskiti!
[2 janan qhanañchäwipa]
Yapu apthapiñanxa, jankʼakipuniw qalltat tukuykam irnaqataxa