Wali sumwa Biblia uñtʼañasa
1. ¿Bibliax kunatsa wali wakiskirixa?
1 Biblia wali sum uñtʼañaxa Diosan Arup yatiyañatakisa yatichañatakisa wal yanaptʼistu, ukhamatwa kʼari yatichäwinakasa jaqin amtat yatichäwinakas kʼarïtap Bibliampi sum qhanañchañäni (2 Tim. 2:15; 1 Ped. 3:15).
2. ¿Biblian jiskʼa tʼaqanakap jankʼaki jikxatañatakix kunas yanaptʼistani?
2 Sum uñtʼañasawa. Biblia uñtʼañax mä máquina apnaqañamp sasiwa, Bibliat jukʼamp sum yatxatañäni ukhax yäparuw apnaqarakiñäni. Qalltat tukuykam liytʼasaxa kuna tuqitsa parli janiw ukak amuykañäniti, jan ukasti jiskʼa tʼaqanak pʼiqiruw amxasiñäni ukat jiskʼa tʼaqanak jikxatañax janiw chʼamäkaniti. Diosan Arupat jukʼamp sum yatiqasaxa, wali kusisita ukat jan payachasisaw tamamp chika yatiyir sarasasa jan ukax yaqha chiqanakansa yatiyarakiñäni (1 Tes. 1:5).
3, 4. 1) ¿Kunjamanakatsa Biblia jukʼamppach uñtʼsna? 2) ¿Biblia sum uñtʼañatakix kunanakas yanaptʼawaytamxa?
3 Tantachäwinakan Bibliat liytʼaskani ukhaxa liytʼañasapuniwa. Sapaki Bibliat yatiqkasasa tantachäwinakatak wakichtʼaskasasa Biblian jiskʼa tʼaqanakapax utjchi ukhax thaqtañamapuniwa, ukat akham jisktʼasiñaw wakisispa, ¿uka jiskʼa tʼaqanakax kuns yatichitu ukat kunjams jakäwijan yanaptʼitu?, sasa. Maysa tuqitxa, computadorata jan ukax mä papelar qillqaqatat liytʼañat sipansa, Bibliatpach liytʼañaw jukʼamp askixa sasaw waljanix amuyapxi, kunattix yatiyapki ukhax jankʼakiw Biblian jiskʼa tʼaqanakap jikxatapxi (Juan 14:26).
4 Yaqhip familianakaxa Biblian jiskʼa tʼaqanakap pʼiqir yatsuñatakiw tiempo apstʼasipxi. ¿Kunjams uk lurapxi? Yaqhipanakax mä jiskʼa papelaruw mä tʼaqa qilltʼapxi ukat qhipäxaruxa kamsis uka jiskʼa tʼaqax ukwa qillqtʼapxaraki. Ukham lurasaxa kawkïri jiskʼa tʼaqasa jan ukax kamsis uka jiskʼa tʼaqax uk yatsuñatakiw familiarux yanaptʼi. Yaqha tuqinakat yatxatañax utjarakiwa, sañäni: Diosan arunakap jan istʼañ munirinakaru jan ukax kuna tuqits yatiñ munapxi uka jisktʼanakarusa Bibliampix kunjams qhanañchsna uk amtañatakix inas mä demostración lurañax wakischispa.
5. ¿Bibliamp wali sum qhanañchañatakixa, kunatsa yatsuñasax wakisi?
5 Bibljamaxa janipuniw yaqha librox utjkiti, Bibliakipuniw maynirux yatiñkankañ churaspa ‘qhispiyasiñarus irparakispa’ (2 Tim. 3:15). Ukampis yatiyktan uka jaqinakax kunja suma yatichäwinakanis Bibliaxa uk janiw amuyapkiti, ukatwa jiwasax wali sum wakichtʼasiñasaxa, ukhamatwa kuntï Bibliax yatichki uk sum mayninakar qhanañchtʼañäni (Pro. 2:1-5).