Jisktʼäwinaka
◼ ¿Jehová Diosan Qhanañchirinakapax arstʼäwinakat grabatanaka ukat uka grabatat qillqaqtʼatanak maynit maynir pasayapxaspati?
Bibliat apstʼat arstʼäwinakax wal chuymachtʼistu ukat chʼamañchtʼarakistuwa (Hech. 15:32). Ukatwa tantachäwinakar jan jutapki ukanakarux uka chuymachtʼkir arunak yatiyañ munaraktanxa. Ukat jichhürunakanxa kunayman aparatonakaw utji ukanak tuqnamwa kunatï arstʼaski uk niya ukspach apayasispa. Ukat yaqhipaxa, sapa arstʼäwinakatjamwa grabacionanak imasipxi, yämas yaqhipax wali jaya maranakat kunaw imasipxi, suma amtampiw amigonakapar uk maytʼapxi jan ukax grabtʼarapipxi. Yaqhipasti Internetar kunaw uskupxi, ukhamat munapki ukanakan apaqasipxañapataki.
Ukampisa, janiw khitirus arstʼäwinak jan grabañapatak jarkʼatäkiti, familiapatakisa jupatakis grabtʼasiskaspawa. Ukhamarusa, usutäpki ukat tantachäwinakar jan jutirjamäpki ukanakatakix irpir chuymaninakaw grabtʼarapipxañapatak maynir mayispa. Ukhamäkchisa, arstʼäwinakan grabacionanakapa ukat uk qillqaqtʼats maynit maynir churañax janiw walïkiti, ¿kunatsa?
Kunattixa, arstʼäwinakax kawkinsa arstʼasini ukan wakisitaparjamaw wakichtʼasi, ukat kunapachatï uka arstʼäwit grabacionanaka jan ukax qillqaqatanak maynit maynir churasi ukhaxa, kunatsa ukham arstʼasiwayi uk jan yatipxatapatxa jan walinakakwa yaqhip chiqanak maynix amuyxaspa. Ukampisa, uka arstʼäwix chiqat janicha uk yatiñatakixa, khitisa ukat kunapachasa arstʼawayi uk yatxatañax chʼamäspawa (Luc. 1:1-4). Maysa tuqitsti, ukham grabacionanaka ukat grabatat qillqaqtʼatanak maynit mayniru churaspa ukhaxa, inas khititï katuqki ukax churirir ina chʼusatak jachʼañchchispa (1 Cor. 3:5-7).
Amuyasiri Chiqapa Uywataxa, wakiski ukarjamaw Diosar yupaychañ tuqit yatichäwinak “horasapar” churañatak chʼamachasipxi (Luc. 12:42). Ukat Jehová Diosan Qhanañchirinakapax tamanakan arstʼapki ukat Internetan www.jw.org ukan jikxataski uka grabacionanaksa jupanakaw churapxistu. Ukhamasti, iyawsäwisan suma chʼamañchtʼatäskakiñatakixa, Amuyasiri Chiqapa Uywatampi ukat Uraqpachan Jilïr Irpirinakampix kunatï wakiski ukanakxa churapxapunistaniwa (Hech. 16:4, 5).