Yatiyañatakix Diosat mayisiñasax wakisipuniwa
1. ¿Sum yatiyañasatakix kun lurañasas wakisi?
1 Chʼamasampikix janiw Diosan arupat yatiyañ luräwxa phuqksnati. Jehová Diosaw uka luräw phuqañatakix chʼam churistu (Fili. 4:13, NM). Suma chuyman jaqinakar jikxatapxañasatakix Jupaw angelanakap jiwasar yanaptʼañapatak khitani (Apo. 14:6, 7). Chiqa yatichäw phawatasaru ukat qarpxatatasarux Diosaw jiltayi (1 Cor. 3:6, 9). Ukatwa, alaxpachankir Awkisar taqi chuyma mayisiñasax wali wakiskiripunixa.
2. Diosar mayiskasaxa, ¿kunanak mayisiñas wakisispa?
2 Jiwasatak mayisiñasawa. Sapa kut yatiyir sarkasax mayisiñasapuniwa (Efe. 6:18). ¿Kuna tuqitsa mayisiñasäspa? Jan axsarasa ukat kawki chiqanakantï yatiyktan ukanakan kusisit chuymamp yatiyañatakiw mayisiñasa (Hech. 4:29). Bibliat yatiqañ munirinakar jikxatañatakiw Jehová Diosar yanaptʼa mayisiñasa. Khitirutï yatiyktan ukax jisktʼistani ukhaxa, uka jisktʼapar qhanañchañatakix Jehová Diosaruw chuymasan mayisiñasa (Neh. 2:4). Ukat jakäwisan Diosan Arupat yatiyañax nayrankañapatakix yatiñkankañ mayisiñasarakiwa (Sant. 1:5). Arupat yatiyañ wali askirjam uñjtan ukat uka luräwi katuqatasat yuspärtan ukhaxa, Jehová Diosax kusisiwa (Col. 3:15).
3. Mayninakatak mayiñax ¿kunjamsa yatiyañ luräwi nayrar sartañapatakix yanaptʼaspa?
3 Mayninakatakis mayiñasarakiwa. Mayninakatakix mayiñasawa, wakisirjamäspa ukhaxa, sutipat aytasas jilat kullakanakatakix mayiñasarakiwa (Sant. 5:16; Hech. 12:5). ¿Jan kʼumarätam laykut jukʼak yatiyta? Ukhamächi ukhaxa, kʼumaräsipki uka yatiyirinakatakiw mayirapirakisma. Mayisiwinakamax mayninakarux yanaptʼiwa, uk janiw pächasiñamäkiti marka apnaqirinakax Diosat yatiyañ jan jarktʼapxañapatakix mayiñasarakiwa, ukhamat jilat kullakanakax ‘samarañana jan llakini jakasipxañapataki’ (1 Tim. 2:1, 2).
4. ¿Kunatsa jan armtʼasisa Diosat mayisiskakiñasaxa?
4 Uraqpachan suma yatiyäwinak yatiyañax mä jachʼa luräwipuniwa, janiw chʼamasampikix uk lurksnati. Ukampis jan armtʼasisa Diosat mayisiskakiñän ukhaxa, Jupaw uk phuqañx yanaptʼistani (Rom. 12:12).