“Diosan yatiñapax luräwinakap tuqiw uñachtʼayasi”
1. Yatiyktan ukhaxa, ¿kunjamsa yaqhipax jiwasat amuyi?
1 Yatiyktan ukhaxa, yaqhipax janiw istʼañ munapkistuti. Jehová Diosan Qhanañchirinakapat inas jupanakax jan wali yatiyäwinak istʼapxchi jan ukax uñjapxchi, ukatwa jiwasat jan wal amuyxapxaspa. Ukat yaqhip chiqanakanxa, “jan wali sectawa” sasaw sapxarakistu. ¿Ukhaman jikxatasisax kun lurañas wakisispa?
2. Jiwasat jan walinak parlapxani ukhaxa, ¿kunas jan llakimp atipayasiñatakix yanaptʼistani?
2 Suma amtanïñasawa. Jesusasa ukat nayra patak marankan jakapkäna uka cristianonakasa ukham uñjatäpxarakïnwa ukat jan walinakwa jupanakat parlapxäna (Hech. 28:22). Ukhamansay jikxatasipxchïnxa, jupanakarux janipuniw yatiyir sarañatx phinqʼasiyapkänti ni axsarayapkänsa. Ukampis Jesusax akham sänwa: “Diosan yatiñapax luräwinakap tuqiw uñachtʼayasi” sasa (Mat. 11:18, 19). Jupax wali kusisitaw Awkipan munañap luraskakïna, ukat kunatï chiqäki uk thaqhapkäna ukanakatakisa, suma yatiyäwinakax qhanañapänwa. Diosan Yuqaparusa jiwasarjamarakiw uñjapxäna, uk amtañaw llakimpi jan atipayasiñasatak yanaptʼistani.
3. Jan walinak jiwasat parlapxi ukat jan istʼañ munapkistu ukhaxa, ¿kunatsa llakimp jan aynachtʼañasäki?
3 Akapachankir jaqinakax kunjamtï nayar uñisipkitu ukhamarakwa arkirinakajarux uñisipxani sasaw Jesusax säna (Juan 15:18-20). Ukhamaxa, jan walinak jiwasat parlapxi ukat jan istʼañ munapkistu ukhaxa, janiw llakimp aynachtʼktänti, kunattix uk pasañap yatxtanwa. Ukampis aka qhipa urunakan jakatas layku ukat Supayan urunakapax jukʼakïtap laykuxa, ukanakax jukʼamp jilxataskakiniwa (Apo. 12:12). Chiqas jiwasatakixa, Supayan urunakapax jukʼakïtap yatiñax wali kusiskañapuniwa.
4. Jan sum katuqapkistani ukhaxa, ¿kun lurañas wakisispa?
4 Llampʼu chuymanïñasawa. Jan sum katuqapkistu ukhaxa, jan khitirus coler churirjama ukat suma arunakampiw parltʼañasa (Pro. 15:1; Col. 4:5, 6). Ukat istʼirjamäni ukhaxa, kunats ukham amuyta sasaw jisktʼsna jan ukhax Jehová Diosan Qhanañchirinakapat jan sum yatisaw yaqhipax ukhamanak parlapxi sasaw qhanañchtʼaraksna. Ukham llampʼu chuymampi parltʼañäni ukhaxa, kuna jan walinaktï jiwasat istʼki ukax chiqäpachati janicha uk amuykiptʼasiñapatakiw yanaptʼañäni, ukat yaqha jilatas jan ukax kullakas wasitat yatiyir utapar kuttʼani ukhax inas istʼxarakchini. Ukampis wali coleratäni ukhaxa, llampʼu chuymampiw “sarxä” sasin sañasa. Jaqix janisay sum uñjchistanixa, Jehová Diosax ukham yatiyir saratasxa wali askitpunwa uñji (Isa. 52:7).