Jisktʼäwinaka

◼ ¿Kunjamanakatsa precursor jilat kullakanakar yanaptʼsna?

Uraqpachanxa, 2008 septiembre phaxsit 2009 agosto phaxsi tukuykamax niya 800.000 jilat kullakanakaw precursor regularjama ukat precursor especialjam irnaqtʼawayapxi. Uka jilat kullakanakaxa tiempopsa chʼamapsa ukat qullqipsa Diosan Apnaqäwipat suma yatiyäwinak yatiyañatakiw apstʼasiwayapxi, yapunakapat nayrïri achunaks luqtapkaspa ukhama (Pro. 3:9). Ukham chʼamachasipxatapatxa, ¡wali kusisitapuniw Jehová Diosax jikxataspacha! ¿Jiwasax ukham kusisitarakïtanti? Precursor jilat kullakanakasax wali kusisita ukat jan qarjtas sapürutjam Diosar luqtasipkakiñapatakixa, ¿kunjamsa yanaptʼsna?

Precursorjam luqtasipkakiñapatakix suma arunakampiw chʼamañchtʼsna (Pro. 25:11). Ukhamarusa, semananx inas mä urukis jupanakamp chika yatiyir mistuñatak tiempo apstʼassna. Ukat jupanakampi yatiyir sartan ukhaxa, autopat sarañat sipansa autosat sarañatakiw arxayañasa jan ukax yaqha autot sarañäni ukhaxa, pasajepsa pagarapiraksnawa. Ukat autopattï sarañänixa, gastopatakix qullqimpi yanaptʼaraksnawa (1 Cor. 13:5; Fili. 2:4). Ukat inas awisax manqʼasiñatak utar jawstʼsna, ukhamatwa munasitasa ukat yanaptʼatasxa uñachtʼayaraksna (1 Ped. 4:8, 9).

Khitinakatï Diosan Apnaqäwip nayraqat thaqapki ukanakaruxa, Jehová Diosaw kuntï jakañatak wakiski uk churaskani sasaw Bibliax qhanañchi (Sal. 37:25; Mat. 6:33). Ukanakxa wali munasir jilat kullakanak tuqiw churi (1 Juan 3:16-18). Ukampisa, precursor jilat kullakanakax janiw taqi kuntï jupanakatakix wakiski uk mayninakan churapxañap suyapkiti. Ukat kuna pistʼañansa jikxatasipxi uk jilat kullakanakar inas jan yatiyapkchiniti. Ukatwa kunjamäsipkis jupanakax uk sum amuyirïñasa, ukhamat “kunatï mayninakan jan utjki uka churapxaña[sa]taki” (2 Cor. 8:14, 15).

Nayra patak maranakan Cencreas tamanxa, Febe sat kullakax taqi chuymaw Diosar luqtaskäna, ukat kunapachatï jupax Roma markar saräna ukhaxa, akham sasaw Pablox Romankir jilat kullakanakarux säna: “Achiktʼasipxaraksmawa [...] Tatitun sutiparu sum katuqapxam, kunjämtix Diosar arkir taypinxa katuqasiñäki ukhama. Juparusti yanaptʼapxapunim, kunanakatix jupan jan utjki ukanakana” sasa (Rom. 16:1, 2). Jiwasaxa, ukhamarakiw tamasan precursor regular jan ukax precursor especialjam suma yatiyäwinak yatiyasipki ukanakarux munasiñ uñachtʼaysna ukat kunanaktix jupanakan jan utjki ukanakans yanaptʼaraksna (Hech. 5:42).