Diosan sutipax jachʼañchatäpan
1. ¿Kawkïrïnisa pä uru jachʼa tantachäwin pʼiqiñchäwipaxa, ukat kawkit apstʼatasa?
1 Taqi kunxaru Munañani Jehová Diosan sutip apañax wali kusiskañapuniw jiwasatakixa. Uka suti apañasatakix jupa pachpaw churawayistu, ukat 1931 maratwa Jehová Diosan Qhanañchirinakapjam uñtʼatäxtanxa (Isa. 43:10). Jesusax wali askitwa Awkipan sutip uñjäna, ukatwa Diosar mayisiñ yatichkäna ukhax Awkipan sutip jachʼañchañ nayraqat yatichäna (Mat. 6:9). Uka mayisïwitwa pä uru jachʼa tantachäwin pʼiqiñchäwipax apstʼasiwayi: “Diosan sutipax jachʼañchatäpan”. Uka tantachäwixa, 2011 maran septiembre phaxsit 2012 agosto phaxsikamaw apasiskani.
2. ¿Kuna tuqinakatsa pä uru jachʼa tantachäwin qhanañchasiskani?
2 Kuna tuqinakatsa qhanañchasiskani. Sábado uruxa, “Jehová Diosan sutip sapürunjam yatiyañatak chʼamachasiñäni” arstʼäwinxa, kunatsa Diosan sutip yatiyañax wal kusisiyistu uka tuqitwa qhanañchasiskani. Ukat “Jehová Diosan sutip janipun qʼañuchapxañäniti” mayachtʼat arstʼäwinxa, wali uñtʼata pusi sipitanakar jan jaltʼañatakiw yanaptʼaskistani. Maysa tuqitxa, “¿Kunatsa Diosan sutipax jachʼañchatäñapa?” arstʼäwinxa, Diosat jukʼamp yatiyaskakiñataki ukat janis jaqinakax istʼañ munapkchistu ukhasa, kunas taqi chuyma yatiyir saraskakiñatakix chʼamañchtʼistaspa ukwa qhanañchasiskani. Domingo urusti, mayachtʼat arstʼäwinxa kunjamsa amuyunakasampi, parlatasampi, amtanakasampi ukat sarnaqäwisamp Diosan sutip jachʼañchsna ukwa qhanañchasiskarakini. Taqinitak arstʼäwin pʼiqiñchäwipax akawa: “Jehová Diosax Armagedonanwa sutip jachʼañchani”. Uka arstʼäw istʼañax wali askipunïniwa khitinakatï jichhak jutasipki jupanakatakixa.
3. ¿Kuna aski luräwinïtansa, ukat kunjamsa pä uru jachʼa tantachäwix uk phuqañ yanaptʼistani?
3 Jehová Diosax niyaw sutip jachʼañchani (Eze. 36:23). Ukañkamasti, taqi kuntï uka qullan sutix sañ munki uk jachʼañchaskakiñasawa, ukax wali aski luräwipuniw jiwasatakixa. Chiqpachansa, pä uru jachʼa tantachäwiw Diosan sutip jukʼamp yatiyaskakiñatak yanaptʼistani.