Jehová Diosan mä aski churäwipa
1. ¿Kunas 1938 maran apasiñ qalltawayi, ukat kuna amtampisa?
1 Jehová Diosan markapaxa, 1938 maranwa asambleas de zona ukham uñtʼat tantachäwi apañ qalltawayapxi, jichhax pä uru jachʼa tantachäwi sat sutimp uñtʼatäxiwa, uka tantachäwir sarapxañapatakiw tamanakar invittʼasïna. ¿Kuna amtampis uka tantachäwix apasïna? Informador (jichhaxa, Diosan Apnaqäwipat Yatiyañataki) inglés arut qillqatanxa, akham sasaw 1939 maran qhanañchasïna: “Aka jachʼa tantachäwixa Diosan uttʼayatawa. Uka taypiw Apnaqäwipat yatiyapxañapataki markapar yanaptʼi. Ukat kuna lurañtï Diosat katuqapki uk askirjam phuqañatakiw yatichäwinakax yanaptʼaraki” sasa. Jehová Diosan Qhanañchirinakapax 1938 maranxa, 58.000 ukhanikiyätanwa 2009 maratakix paqallq millón jiläxtanwa uk uñjasaxa, kunjamsa uka jachʼa tantachäwix “kuna lurañtï Diosat katuqapki” uk phuqañ yanaptʼaski ukax qhanwa amuyasi.
2. Septiembre phaxsit qalltkani uka pä uru jachʼa tantachäwinxa, ¿kuna tuqinakatsa qhanañchtʼasiskani?
2 Jutir pä uru jachʼa tantachäwin pʼiqiñchäwipa. Septiembre phaxsit pä uru jachʼa tantachäwi apasiñ qalltkani ukxa wal suytanxa, ukanwa jilat kullakanakasamp wal chʼamañchtʼasiñäni. Pʼiqiñchäwipaxa, Juan 15:19 qillqatat apstʼatawa: ‘Janiw akapachankirïpktatiʼ. ¿Kuna tuqinakatsa arstʼasiskani? Jehová Diosatak sapürjam irnaqtʼañax kunjamsa jan walinakat jarkʼaqistu, uka tuqitwa sabadox arstʼasiskani. Ukat mayachtʼat arstʼäwinxa kimsa arstʼäwinakwa istʼaskarakiñäni, ‘jachʼa axsarkañ animalampi’, ‘qʼañu lurañanakan sarnaqir warmimpi’ ukat ‘alakipa luriri jaqinakampix’ kunatsa jan chikachasiñasäki uka tuqinakatwa qhanañchtʼasiskarakini. Domingo uruxa, yaqha mayachtʼat arstʼäwiw utjarakini, ukanxa aka tuqitwa qhanañchasiskani: kunatsa Jehová Diosarux munasiñasa ukat akapachar jan munañasäki. Sarir jaqinakjamakïtanwa ukat akapachar atipañatakix janiw axsarañasäkiti uka tuqitwa yaqha arstʼäwinakanx qhanañchtʼasiskani.
3. Pä uru jachʼa tantachäwir sarasaxa, ¿kuna askinaksa jikxatsna?
3 Pasawayki uka pä uru jachʼa tantachäwixa mä kullakarux wal yanaptʼawayatayna, jupax janiw Diosan arunakap nayrjam yatiyxataynati, uka tantachäwin arstʼaskäna ukaxa, kunjamansa nayax jikxatasiyäta ukat jan qhiparas “yatiyir sarañatak” amtañatakiw yanaptʼawayitu sasaw qillqanitayna. 2010 septiembre phaxsit 2011 agosto phaxsi tukuykama apaskani uka pä uru jachʼa tantachäwixa, Jehová Diosar munasiñwa yanaptʼistani, jan akapacharu (1 Juan 2:15-17). Ukhamaxa, Jehová Diosan wakichat jachʼa tantachäwir sarañataki ukat sum istʼañataki wakichtʼasipxañäni.