Amuyus jarkʼaqasipjjañäni
1. Pä uru jachʼa tantachäwejj 2012 maran septiembre phajjsit 2013 agosto phajjsikam apaskani ukajja, ¿kuna pʼeqeñchäwinïnisa ukat kuna amtamp wakichtʼatasa?
1 Jesusajj taqe chuymamampi, taqe almamampi ukat taqe amuyumampi Jehová Diosar munasim sasaw arkirinakapar yatichäna (Mat. 22:37, 38). Jichha maran jachʼa tantachäwinakajj apaskani ukajja, kunjam jaqëñasasa uk amuyasiñasatakiw chʼamañchtʼistani, ukat ukarjam wakichtʼatarakiwa. Kimsa uru jachʼa tantachäwin pʼeqeñchäwipajj “Chuymas jarkʼaqasipjjañäni” satawa. Ukat mä uru jachʼa tantachäwejj 2012 maran septiembre phajjsit 2013 agosto phajjsikamaw apasiskani, pʼeqenchäwipajj “Conciencias jarkʼaqasipjjañäni” satawa ukat pä uru jachʼa tantachäwejj septiembre phajjsin qalltaskani ukajja, “Amuyus jarkʼaqasipjjañäni” sat pʼeqenchäwinirakiwa, ukasti Mateo 22:37 jiskʼa tʼaqat apstʼatawa. Uka pä uru jachʼa tantachäwejj amuyus sum uñakiptʼasiñasatak yanaptʼistaspa ukwa muntanjja, ukhamat Jehová Dios nayraqatapan sum sarnaqañasataki.
2. ¿Kuna jisktʼanakarus uka tantachäwin qhanañchasiskani?
2 Kunanakatsa yatjjatasiskani. Pä uru jachʼa tantachäwi tukuyatarojj kuna aski yatichäwinaktï yateqaniwaykañäni uk wal amtañ muntanjja. Ukatakejja, aka jisktʼanakarjam qhanañtʼasiskani ukjja sum qellqaqtʼasiñasawa:
• ¿Kunjamatsa jaqenakan amuyunakapamp jan apayasksna?
• Amuyupajj chʼamaktʼatäpki ukanakarojja, ¿kunjamsa yanaptʼsna?
• ¿Kunjam amuyunïñasas wakisi?
• Sum lupʼisajja, ¿kuna askinaksa jikjjatañäni?
• ¿Kunjamsa Jehová Diosajj suma amuyunïñasatakejj yanaptʼistaspa?
• Familian kusisiñ utjañapatakejja, ¿kunjamsa chachasa, warmisa, awk taykanakasa ukat wawanakas yanaptʼapjjaspa?
• ¿Kunjamsa Jehová Diosan jachʼa urupatak wakichtʼatätas uñachtʼaysna?
• Amuyus chʼamañchañajja, ¿kamsañs muni?
• Kuntï yateqapki ukarjam sarnaqerinakajja, ¿kuna askinaksa jikjjatapjje?
3. ¿Kunatsa uka jachʼa tantachäwirojj paypach uru sarañasa, sum istʼañasa ukat ukarjam sarnaqañasas wakiskirejja?
3 Taqe chʼamapampiw Supayajj amuyus kunaymanit qʼañuchañ muni ukat uk lurañatakejj wal chʼamachasi (2 Cor. 11:3). Ukhamajj amuyus jarkʼaqañasawa, jan wali lupʼïwinakampejj janiw apayasiñasäkiti, kunjam amuyunïkäntejj Cristojj uka pachpa amuyunïñasarakiwa ukat akapachan jan wali amuyupampejj janiw kunäkipansa apayasiñasäkiti (1 Cor. 2:16). Ukhamajja, uka tantachäwinkañatakejj paypach uru sarañatak chʼamachasipjjañäni ukat sumarak istʼapjjañäni. Jiwasatï kuntï yateqkañäni ukat ukarjam sarnaqañäni ukhajja, amuyusajj suma chʼamañchatäniwa ukat taqe chuymaw Diosan Reinopat yatiyarakiñäni (1 Ped. 1:13).