Diosan Arupasti wali askiw yatichañataki
1. Pä uru jachʼa tantachäwejj 2013 maran septiembre phajjsit 2014 agosto phajjsikam apaskani ukajja, ¿kuna pʼeqeñchäwinïnisa, ukat kuna jisktʼarus qhanañchasiskani?
1 Aka Oraqpachan Jehová Diosakiw wali ‘Suma Yatichirisajja’ (Isa. 30:20, 21). Ukat Biblia toqew yatichistu, uka librjamajj janiw yaqha libronakajj utjkiti, kunattejj Bibliajj Diosan amuytʼayatawa. Ukat jañchi toqetsa, amuyu toqetsa, sarnaqäwi toqetsa ukat ajay toqetsa ¿kunjamsa yatichäwinakapajj yanaptʼistaspa? Uka toqet pä uru jachʼa tantachäwin 2013 maran septiembre phajjsit 2014 agosto phajjsikam apaskani ukanwa qhanañchasiskani, pʼeqeñchäwipajj “Diosan Arupajj wali wakiskiriw yatichañatakejja” satawa, ukasti 2 Timoteo 3:16 jiskʼa tʼaqat apstʼatawa.
2. Wakichäwin aski yatichäwinakap sum amuyañatakejj ¿kuna jisktʼanakas yanaptʼistani?
2 Kuna aski yatichäwinakas utjani. Kuna aski yatichäwinakas utjani uk sum amuyañatakejj aka jisktʼanakaruw qhanañchasiskani:
• Diosan yatichäwinakapajj ¿kunjamsa jakäwisan yanaptʼistu? (Isa. 48:17, 18.)
• Diosatak sapürunjam wal irnaqtʼañataki jakäwis mayjtʼayañäni ukhajja ¿kunatsa jan pächasiñasäki? (Mal. 3:10.)
• ¿Kunjamsa ‘jan uñtʼat yatichäwinakar’ uñjañasa? (Heb. 13:9.)
• Jesusajj wali ‘sumwa yatichirïna’ ukjja, ¿kunjamsa yateqassna? (Mat. 7:28, 29.)
• Tamar yatichirinakajj ¿kunatsa jupanak kikpa yatichasipjjañapa? (Rom. 2:21.)
• ¿Kunatakis Diosan Arupajj wali wakiskirejja? (2 Tim. 3:16.)
• Diosajj markanakaru ‘khathatiykani’ sasin qhanañchaski ukajj ¿kunjamsa jaqenakar uñjasiyi? (Ageo 2:6, 7.)
• ¿Kunsa Jehová Diosajj confiyistu? (Efe. 5:1.)
• Jehová Diosan yatichäwipat jan jitheqtañatakejja, ¿kunatsa chʼamachasiskakiñasa? (Luc. 13:24.)
3. Tantachäwin arstʼäwinakap istʼañatakejj ¿kunatsa chʼamachasiñasapuni?
3 Kawkïr jiskʼa tʼaqattï aka jachʼa tantachäwin pʼeqeñchäwipatakejj apstʼatäki ukanjja, kunjamänis qhepa urunakanjj uka toqetwa parlaraki. Aka jan wali urunakat parlkasajj akham sasaw apóstol Pablojj qellqäna: “Jan wali jaqenakajj ukhamarak sallqjjerinakasa jan walit jukʼamp jan waliruw sarapjjani, sallqjasina, ukhamarak sallqjayasisina” sasa (2 Tim. 3:13). Jiwasanakatï jan sallqjjatäñ munkstanjja, wali wakiskiripuniw kuntï Diosajj yatichkistu ukar istʼañasa ukat ukarjam sarnaqañasasa. Ukhamajj kuna toqettï jachʼa tantachäwin arstʼaskani uk istʼir sarapjjapuniñäni.