‘Horasaparuw manqʼanak churistuʼ
1. Pasawayki uka mä uru jachʼa tantachäwixa, ¿kuna tuqitsa jumar yanaptʼawaytam, ukat yaqhanakarus yanaptʼawayi?
1 Mä uru jachʼa tantachäwi tukuyatarux akham sañwa yattanxa: “¡Ukham arunakpunwa istʼañ munayätxa!” sasa. Pasïr mä uru jachʼa tantachäwi tukuyataruxa, walja jilat kullakanakaw Jehová Diosatak jukʼamp irnaqtʼañ amtawayapxi sasaw tamanak tumptʼir mä jilatax säna. Ukat tamanak tumptʼir yaqha jilatax akham sänwa: “Kuna urunakansa jakasktan uk sum amuytʼasiñataki ukat kunanak lurañs amtapxta uka tuqit wasitat amuykiptʼañatakiw yanaptʼapxitu” sasa. Ukat yaqhax akham sarakïnwa: “Diosar luqtañaw taqi kunat sipansa nayrankañapa uk amuyañwa yanaptʼawayapxitu sasaw walja jilat kullakanakax sapxarakïna” sasa. Pasawayki uka mä uru jachʼa tantachäwixa, ¿kuna tuqitsa jumar yanaptʼawaytamxa?
2. Mä uru jachʼa tantachäwinxa, ¿kuna tuqinakatsa qhanañchasiskani?
2 Aka 2010 septiembre phaxsit 2011 agosto phaxsi tukuykama apaskani uka mä uru jachʼa tantachäwixa, horasapar manqʼäkaspas ukhamäniwa. Pʼiqiñchäwipax Salmo 118:8, 9 qillqatat apstʼatawa. “Jehová Diosax jan wali urunakanx kunjamsa chʼamañchtʼistu”, “Kunjamsa markapar mantapxañapatak yaqhanakar yanaptʼsna”, “Kunjamsa Diosat yatiqasis mayninakan jarkʼaqasiñapassna”, “Kunjamanakatsa wayn tawaqunakax Jehová Diosar atinisipxatap uñachtʼayapxaspa” ukat “Kunatsa jilat kullakanakasax mä jarkʼaqasïwispa” uka tuqinakatwa mä qhawqha arstʼäwinakax qhanañchaskani.
3. ¿Kunjamsa mä uru jachʼa tantachäwit sum yatiqsna?
3 Sum yatiqañataki. Uka tantachäwix kuna urünisa uk yatiyasini ukhatpachwa ukar sarañataki wakichasiñama, ukat jumamp Bibliat yatiqasipki ukanakarus yatiyañamawa. Amtapxapuniñäni, khitinakatix sum achupki ukanakaw taqi chuymampi Diosan arunakap katuqapxi (Luc. 8:15). Ukhamasti, taqpach arstʼäwi sum istʼañatakiw chʼamachasiñama ukat jakäwimansa yatiyañatakisa kuna yatichäwinakas yanaptʼiristamxa, ukwa qillqtʼasïta. Jachʼa tantachäwi tukuyatatxa kuna aski yatichäwinaksa yatiqawayapxta uk familiamamp parltʼañatak tiempo apstʼasiñamawa ukat ukarjamaxa kunanaksa sapa maynix lurapxañama uksa amuytʼapxarakismawa.
4. ¿Kunatsa wali kusisita mä uru jachʼa tantachäwi suytanxa?
4 Mä uru jachʼa tantachäwixa, wali munasiñampi ukat janïräkipanwa taqi kun sum mistuñapatak wakichasi, kunjamtï chʼamañchtʼkiri suma manqʼax wakichasixa ukhama. Ukhamasti, uka tantachäwir sarañataki ukat ‘horasaparu manqʼa churkistuʼ, mä arunxa, yatichäwinakat askinak yatiqir sarañatak chʼamachasitasxa Jehová Diosaw bendicistani, ukhamatwa yupaychañ tuqit chʼamañchtʼat jikxatasiñäni (Mat. 24:45).