Mä uru jachʼa tantachäwitak machaq wakichäwi

2009 marataki mä uru jachʼa tantachäwin pʼiqiñchäwipax akawa: ‘Kuna lurañtï Tatitux churktam uk sum phuqaskakma’, ukasti Colosenses 4:17 qillqatat apstʼatawa. Cristianonakax taqi chuymaw ukar istʼaraktanxa: Jesusat yatiqasisaw jan jaytasa Jehová Diosat yatiyapuntanxa (Juan 17:4). Apóstol Pablosti ukhamarakiw tukuyañkama Diosat yatiyañ amtänxa, ukax yatiqaskayarakiwa (Hech. 20:24).

Diosat yatiykasinxa jan waltʼäwinakar kunjamsa jilat kullakanakax saykatapxi uka tuqinakat tamanak tumptʼir jilatax qhanañchtʼaskani. Ukxarusti “Kuntï satantktan ukxa yapuchañasawa” sat arstʼäwisti ‘khitinakatix wiñay jakañatak wakichatäpki’ ukanakar sum yanaptʼañatakiw yanaptʼistani (Hech. 13:48). Betelat jutir jilatawa “Chiqpachansa [...] Diosar servirinakäpxtanwa” sat arstʼäwimpiw nayraqat 2 Corintios 6:1-10 qillqatat sapa tʼaqat qhanañchaskani, jaypʼurusti “Diosat yatiyañarux askirupun uñjañäni” sat arstʼäwi arstʼaskarakini. Ukhamarakiw “Wayn tawaqunakasa jilïrinakasa Diosat yatiykasax kusisiñ jikxatapxi” ukat “Wayn tawaqunakax Diosat yatiyañ phuqasipki” sat arstʼäwinakax wal chuymachtʼarakistani. Jumatï mä uru jachʼa tantachäwina jan ukax pä uru jachʼa tantachäwina bautisasiñ munstaxa jankʼakiw tama taypin irpir chuymaninakan pʼiqtʼiriparu yatiyäta. Taqpach jachʼa tantachäwinakanwa Yatiyañataki sat revistatxa yatxatasi. Ukhamasti mä uru jachʼa tantachäwitak Yatiyañataki sat revistamxa apasiñamawa.

Kuna lurañtï Jehová Diosax churkistu uk phuqañax sañ muniwa jan kuna amtäwinakasampisa ni kuna luräwinakasampisa tiempo apaqayasiña. Aka mä uru jachʼa tantachäwixa, Jehová Diosar yupaychäwisan chʼamañchtʼasiñasataki wakichtʼatawa ukhamat jan yaqha luräwinak amtaskañataki ukat taqi chuyma tukuyañkama Diosat yatiyaskakiñ amtañatakisa yanaparakistaniwa.