Pä uru jachʼa tantachäwixa Diosar yupaychäwisan jan aynachtʼañatakiw yanaptʼistu
1. ¿Suma yatiyäwinak yatiyañasatakix kuna yanaptʼsa Jehová Diosax churistu?
1 Jehová Diosaxa, munasiñapatwa yatiyistu, yatichistu ukat chʼamañchtʼistu ukhamat Jupan mayitaparjam suma yatiyäwinak yatiyañasataki (Mat. 24:14; 2 Tim. 4:17). Sapa maratak wakichata pä uru jachʼa tantachäwix mä yanaptʼawa. Diosar yupaychäwisan kunjamsa jan walinakat jarkʼaqassna uka tuqitwa 2010 marataki machaq wakichäwin qhanañchasiskani. Ukasti Romanos 8:5 ukat Judas 17–19 qillqatanakat apsutäniwa, ukat 2009 maran agosto phaxsit 31 urunak saraqatatat nayraqataruw uka tantachäwinakan apasiñapax qalltawayani.
2. 1) ¿Pä uru jachʼa tantachäwix kunanakansa yanaptʼistani? 2) ¿Pasïr pä uru jachʼa tantachäwinakax kunjamsa yanaptʼawaytamxa?
2 Kuna tuqinakatsa yanaptʼistani. Jehová Diosar yupaychäwisanxa kunanakas ina chʼusar tiempo aptʼasiyistaspa uka tuqinakatwa uka wakichäwix amuytʼayistani. Munañasarjam jan sarnaqañasatakix kunanakas yanaptʼistaspa ukat kuna luräwinakansa maynin Diosatakjam sarnaqatapax amuyasi, taqi ukanak yatiqarakiñäni. Domingo uruxa walja arstʼäwinakaw utjani, ukanakaw Diosar yupaychäwisan wal chʼamañchtʼistani, ukat sapürunjam iyawsäwisax yantʼata uñjaski ukanakar saykatañatakix kunanaksa sapa maynis jan ukax familiansa lursna ukanak qhanañchtʼani. Ukhamasti, uka wakichäwix chuymasatwa jan wali amuyunak jarkʼaqistani, Diosampi sum apasiskakiñatakiw yanaptʼistani ukat ukarjam chʼamachasipki ukanakax suma bendicionanak katuqapxani uk jan armañasatakiw yanaptʼarakistani.
3. ¿Kunapachänis jutïr pä uru jachʼa tantachäwixa, ukat kunatakis jichjatpach wakichtʼasiñasa?
3 Kawkhansa ukat kunapachasa jutïr pä uru jachʼa tantachäwix apasini uk yatxäta ukhaxa, payürpach sarañataki ukat sum istʼañatakiw jichjatpach wakichtʼasiñama. Kuna amtäwitakis suma amuytʼampi wakichasirirux Jehová Diosax bendiciwa (Pro. 21:5).
4. ¿Jutïr pä uru jachʼa tantachäwin kunsa katuqañäni?
4 Chiqpachansa, Jehová Diosaw uka suma yanaptʼa Churirixa. Amuyasiri Chiqapa Uywatan waktʼayat uka wakichäwixa, kunatï suma yatiyäwinak yatiyaskakiñasataki wakiski uka tuqit sum yanaptʼistani. Jehová Diosax munasiñapat yanaptʼanak churkistu ukanakat walpun yuspärtanxa, ukhamat “jan pächasisa, iyawsäwisanxa kuntix suytʼktan ukanxa” chʼaman saytʼasiñasataki (Heb. 10:23-25; Sant. 1:17).