Jehová Diosaw luräwis phuqañatak wakichtʼistu
1. Jehová Diosax yupaychirinakapar mä luräwi churasaxa, ¿kunampsa luraraki?
1 Kunapachatï Jehová Diosax yupaychirinakapar mä luräwi churki ukhaxa, kunjamsa phuqapxañapa uksa qhanañcharakiwa. Amuytʼañataki, Noé chacharux arka luram sasin säna ukhaxa, kunjamsa luraspa uksa qhanañchtʼarakïnwa, jupax janipuniw kunapachas mä arka lurkänti (Gén. 6:14-16). Ukat Moisesax uwij awatirïkäna ukhaxa, israelankir taqi jilïrinakan ukaru ukat Faraonan ukaru sarañapatakiw mä luräw katuqäna. Jehová Diosax akham sänwa: “Nayawa jumampïskäxa kunapachatix parlkäta ukkhaxa, ukhamarak nayarakiw yaticharakïma kunanaktix arsuñamäki uksa” sasa (Éxo. 4:12). Jichhürunakanxa, janirakiw suma yatiyäwinak yatiyir sarañasatakix sapak jaytkistuti. Jan ukasti, Yatiyañataki Diosan Yatichäwipa ukat Yatiyañatak Tantachäwi tuqiw wakichtʼistu. ¿Kunjamsa uka tantachäwinakat askinak apsna?
2. ¿Kunjamsa Yatiyañataki Diosan Yatichäwipa sat tantachäwit askinak apsna?
2 Yatiyañataki Diosan Yatichäwipa. Kuna tuqinakatsa yatxatasiskani ukx sapa tantachäwitakiw wakichtʼasiñasa. Ukhamatwa, khitinakatï uka tantachäwin arstʼapkani ukanakar uñjasinx yatichañatakix suma wakichtʼatäñäni (Pro. 27:17). Ukhamarusa, uka tantachäwirux Benefíciese sat libro apasiñasapuniwa ukat ukarus qillqtʼasiñasarakiwa. Ukat mä jilatana jan ukax kullakana arstʼañap tukuyatar uka tantachäwi sarayir jilatax Benefíciese sat librot wakiskir yatichäwinak qhanstayani ukhaxa, librosat arktasaw kunanaksa lurañ amttan uka wakiskir arunak raytʼasiñasa ukat thiyanakaparus qillqtʼasiraksnawa. Ukat uka tantachäwin arstʼasaw askinak jikxataraksna. ¿Jumax ukan arstʼañatak qillqtʼayasxtati? Arstʼañ waktʼkätam ukhax sumwa wakichtʼasiñama ukat kuntï jilatax siskätam uk phuqañatakiw chʼamachasiñama. Ukatsti kuntï yatiqawaykta ukampiw yatiyañamaraki.
3. Yatiyañatak Tantachäwit askinak apsuñatakixa, ¿kunas yanaptʼistani?
3 Yatiyañatak Tantachäwi. Uka tantachäwin kunanaktï iwxtʼaski uk amtañatakixa, kuna tuqinakatsa yatxatasiskani uka yatichäwinakwa liytʼañasa ukat arstʼañatakiw wakichtʼasiñasa. Ukat mä qhawqha arunakampik arstʼañäni ukhaxa, mayninakas arstʼapxarakispawa. Kunapachatï demostracionanakax utjani ukhaxa, sumwa uñjañasa ukat istʼañasa, ukat kunanakatï sum yatiyir sarañatakix yanaptʼistaspa ukarjamaw lurañasaraki. Diosan Apnaqäwipat Yatiyañataki sat qillqatanxa wali wakiskir yatichäwinakaw mistsu, uka yatichäwinakx qhanaruw uchañasa.
4. Jehová Diosax churkistu uka wakichäwinakxa, ¿kunatsa sum katuqasiñasa?
4 Kuna luräwtï Moisesasa ukat Noé chachas katuqkäna uk phuqañax jupanakatakix chʼamakïpachänwa, jiwasatakix Uraqpachan suma yatiyäwinak yatiyañax ukham chʼamakirakiwa (Mat. 24:14). Ukhamäkchisa, Suma Yatichiri Jehová Diosar atinisiñäni ukat tantachäwinak tuqi yatichkistu ukanak sum katuqasiñäni ukhaxa, kusisitaw luräwis phuqañäni (Isa. 30:20).