Kawkhans yatiyaktanwa
1. Nayrïr cristianonakax Diosan arunakap kawkhan yatiyañatakis wakichtʼatäpxänwa, ¿kunjamatsa uk yattanxa?
1 Diosan arunakap yatiyir nayrïri cristianonakaxa, ‘jan amuktʼasaw’ kawkhantï jaqinakax utjkäna uka chiqanakan yatiyapxäna (Hech. 5:42). Utat uta yatiykasax uka chiqnam pasaskir jaqinakarux janipuniw ukhamak uñtapkpachänti, jan ukasti Diosan arunakap yatiyapxpachänwa. Ukat qhatur kun alasir sarasas Diosan arunakapat yatiyañ janiw armasipkpachänti. Jupanakax Jesusjamarakiw yatiyañatakix wakichtʼatäpxäna (Mar. 6:31-34).
2. ¿Kunsa Jehová Diosan Qhanañchiripjamax lurañasa?
2 Wakichtʼatäpxañäni. Jiwasax Jehová Diosan Qhanañchiripat uñtʼatätanwa, ukaw kunjam jaqïtansa ukat kunsa lurtan uk uñachtʼayi (Isa. 43:10-12). Jehová Diosan mä qhanañchiripax suma suytʼäwipat kawkhan qhanañchañatakis wakichtʼatäñapawa, janiw utat uta yatiyañapakix wakiskiti (1 Ped. 3:15). ¿Kawkhan jikxatasisas kunjamsa Diosan arunakap yatiyasma, ukat kamsasas parlañ qalltasma uk amtasktati? ¿Khitinakatix istʼañ munapki jupanakar Bibliat apstʼat qillqatanak churañatakix apasipuntati? (Pro. 21:5.) ¿Utat utakti Diosan arunakap yatiyta, jan ukax yaqha chiqanakan yatiyañatakix chʼamachasiraktacha?
3. ¿Kunatsa callenakansa, auto sayañanakansa, plazanakansa, qhatunakansa, jan ukax yaqha ukhamanakan yatiyañarux wali askit uñjañasa?
3 “Taqin uñjkat” yatiyaña. Callenakana, auto sayañanakana, plazanakana, qhatunakana, jan ukax yaqha ukhamanakanwa Diosan arunakapat yatiytanxa. ¿Ukham yatiyañax mayjati, jan ukax ukham yatiyañax jiwasatäxicha? Apóstol Pablox utat uta ukat ‘taqin uñjkataw’ Diosan arunakap yatiyta sasaw säna (Hech. 20:20). Utat uta yatiyañax wali askiwa, ukhamatwa Diosan Reinopat jaqinakar yatiyaraktanxa. Ukampis Diosan arunakapat yatiyir nayrïr cristianonakatakixa, utat uta sarañat sipansa jaqinakar yatichañaw nayrankäna. Ukhamax Diosan chiqa yatichäwipat utat uta, taqin uñjkata ,ukat kawkhansa yatiyasipkakïnwa. Jiwasatï Diosan arunakap jukʼamp yatiyañ munstanxa, jupanakjamarakiw lurañasa (2 Tim. 4:5).