¡Kawkhankkasasa yatiyañatak chʼamachasipxapuniñäni!

1. 1) Kawkhantï jikxatasktan uka chiqanakan yatiyañax ¿kamsañs muni? 2) Jumanakatxa, ¿qhawqhanis ukham yatiyatax Diosan chiqa yatichäwinakap yatiqawayapxta?

¹ ¿Tamamanx qhawqhanis ukham yatiyatax Biblian chiqa yatichäwinakap yatiqawayapxi? Uk yatisax muspharasmawa. Kawkhantï jikxatasktan uka chiqanakan yatiyañax ¿kamsañs muni? Sapür sarnaqäwisanxa, kawkhanxay jikxatasktan ukawjan jaqinakar suma yatiyäwinakxa yatiyañasapuniwa, ukwa sañ muni: escuelana, irnaqäwina, alasir sarkasa, familiaranakaru jan ukax uta jakʼankirinakar visittʼasa, yaqha chiqar sarkasa, jan ukax kun lurkasasa. Pä pataka bautisat jilat kullakanakatxa, niya 80 jilat kullakanakaw ukham yatiyatax Diosan chiqa yatichäwinakap uñtʼapxatayna, ukhamasti kunja askis ukham yatiyañax ukwa ukax uñachtʼayistu.

2. Bibliarjamaxa, ¿khitinakas kawkhantï jikxatasipkäna uka chiqanakan yatiyapxäna, ukat kunjamsa?

² Nayrïr cristianonakaxa, kawkhantï jikxatasipxäna ukhanakan yatiyapxapunirïnwa. Amuytʼañataki, Samaria marknam pasasipkäna ukhaxa, Jacobon phujupat um apsuskir mä warmiruw Jesusax yatiyäna (Juan 4:6-26). Etiopía markankir gobiernon irnaqir mä jaqiw Isaías libro liyiskäna, ukat akham jisktʼasaw Felipex parlañ qalltäna: ‘¿Kuntï liykta ukxa amuytati?’ sasa (Hech. 8:26-38). Filipos markan carcelan jistʼantatäkäna ukhaxa, cárcel uñjir jaqiruw Pablox yatiyarakïna (Hech. 16:23-34). Uka qhipat pachpa utapan katxasitäkäna ukhaxa, Pablox “jupar uñjtʼir jutirinakarusti” munasiñampiw katuqtʼarakïna ukat “jan axsartasarakiw jupax Diosan reinopatxa yaticharakïna, ukhamarak Tatit Jesucristxatsa” (Hech. 28:30, 31). Jupanakatï ukham yatiyawayapxchixa, jumax axsartʼiriskstasa ukham yatiyarakismawa. ¿Kunjamsa?

3. ¿Jan axsarañatakix kunas yanaptʼistani?

³ Qalltañataki. Jan uñtʼatanakamp parltʼañxa, niya taqiniw axsarayastanxa. Ukat uñtʼatäkchisa, Bibliat yatiyañxa mä jukʼ axsarayasnawa. Ukampis Jehová Diosax kunja munasiñanisa, taqi kuntï Jupax yupaychañ tuqit churkistu ukat kunjamansa jichhürunakan jaqix jikxatasi ukanakat sum lupʼiñäni ukhaxa, janiw axsarayaskañäniti, jan ukasti taqi chuymaw yatiyañäni (Jon. 4:11; Sal. 40:5; Mat. 13:52). Ukat Jehová Diosaruw jan axsarañatak yanap mayisiraksna (1 Tes. 2:2). Gaalad escuelar sarir mä jilatax akham siwa: “Kunapachatï jaqimp parlañ axsarayasta ukhaxa, Diosat mayisiñaw yanaptʼitu” sasa. Axsarayasïta ukhaxa, chuymaman Diosat mayisim (Neh. 2:4).

4. ¿Kun lurañsa amtañasa, ukat kunatsa?

⁴ Kawkhantï jikxatasktan uka chiqanakan yatiyañatakixa, janiw Biblia liytʼasapun qalltañasäkiti, jan ukasti inas parltʼañak amtsna. Janiw ukspach Bibliat yatiyañax wakiskapuniti. Walja jilat kullakanakaxa, ukham parlañ qalltasakiw Diosan suma yatiyäwinakapat yatiyapxi. Ukampis, janitï uka tuqit parlañ munkani ukhaxa, janiw munkir jan munkir parlañasäkiti, jan ukasti sarxä sasinwa respetomp sañasa.

5. ¿Kunjamsa mä kullakax yatiyañ qallti?

⁵ Axsartʼir mä kullakaxa, alasir sarki ukhax kusisitaw maynir uñkati. Ukat maynitï ukham kusisit uñkatarakchi ukhaxa, mä qhawqha arxaytʼi. Ukat maynix parlxayi ukhaw jan axsaras parlañ qallti. Parlxayatax wali amuyumpiw istʼaraki ukat kuna tuqitsa Bibliax yanaptʼaspa uks amuytʼarakiwa. Ukham lurasax Bibliat apstʼat walja qillqatanakwa jaytatayna ukat maynirus Bibliat yatichañsa qalltarakitaynawa.

6. Kawkhantï jikxatasktan uka chiqanakan ¿kunjamsa yatiyañ qalltsna?

⁶ Parlañ qalltañataki. ¿Qalltañatakix kuns sissna? Ak amtapuniñäni: um waxtʼita sasakiw Jesusax samaritana warmir parlañ qalltäna (Juan 4:7). Ukhamasti, arunttʼasa jan ukax respetomp kun jisktʼasakiw parlañ qalltaraksna. Ukat parltʼkasaw Bibliat kawkïr yatichäwinakapas chuymapar purtʼaspa uk amuysna (Ecl. 11:6). Yaqhipaxa, kunanaktï jaqinakax yatiñ munapkaspa ukwa arsupxi, ukham lurasaxa wali askinakwa jikxatawayapxi. Amuytʼañataki, doctoramp uñjayasiñatak suykasaxa, inas akham sischisma: “¡Jan kuna usus utjkani ukhaxa, wali kusisitapuniw jikxatasï!” sasa.

7. ¿Kunas parlañ qalltañatak yanaptʼistaspa?

⁷ Kawkhantï jikxataskta uka jaqinakax kunjamäsipkisa ukat kunjamsa yanaptʼasma uk sum amuytʼañaw yanaptʼarakistaspa. Amuytʼañataki, wawanakapar wali sum sarnaqtʼir uñjsna ukhax inas akham sissna: “Wali sumarakis wawanakamax sarnaqasipxixä, ¿kunjams ukhamapxäñapatak uywta?” sasa. Kuna tuqitsa irnaqir masinakapax parlapxi ukwa mä kullakax sum amuyi, ukatxa Bibliat apstʼat kawkir qillqatanakas uka tuqit parli ukwa churaraki. Mä kutixa, irnaqir masipaw jaqichasiñ amtatayna, uk yatisax ¡Despertad! sat revista aparapitayna, uka revistanwa kunjamsa jaqichasiñatak wakichasipxaspa uk qhanañchaskäna. Ukhamatwa Bibliat walja tuqinakat parltʼapxatayna.

8. ¿Kunjamanakatsa Bibliat apstʼat qillqatanakamp parlañ qalltsna?

⁸ Bibliat apstʼat qillqatanakxa mayninakan uñjkat liyiñaw yatiyañatak yanaptʼarakistaspa. Kunanakatsa jaqinakax yatiñ munapxaspa uka chiqanakwa Yatiyañataki jan ukax ¡Despertad! revistat mä jilatax janjtʼasi ukat amuki liytʼi. Maynirutï revista uñchʼukiri amuychi ukhaxa, kuna yatichäwittï liytʼaski uka tuqitwa jisktʼi jan ukax mä qhawq qhanañchtʼi. Ukat kunapachatï sum parltʼxapxi ukhaw Bibliat yatiyi. Bibliat apstʼat qillqatanakx inas kawkhantï yatiqir masinakasasa jan ukax irnaqir masinakasax uñjapxchispa uka chiqanakaruw uchsna, ukhamatwa uk uñjasax jisktʼistaspa ukat yatiyañ qalltsna.

9, 10. 1) ¿Kunjamanakatsa yatiyañ qalltsna? 2) ¿Kunjamsa jumax yatiyirïta?

⁹ Kunjamanakatsa parltʼsna. Niyakixay Diosan arunakapat jankʼak yatiyañax wakischixa, kawkhan yatiyañsa janipuniw ukhamak uñjañasäkiti. Jan ukasti, kun lurkasasa kawkhankasasa kunjamsa jaqinakarux yatiysna ukwa amuytʼañasa. Khitinakampis jikisiñäni ukat kunjamsa parlañ qalltsna ukxa, janiräkipanwa amuytʼañasa. Biblia ukat Bibliat apstʼat qillqatanakxa apasiñasapuniwa, ukhamatwa khitinakatï istʼapkistani ukanakar churaraksna (1 Ped. 3:15).

¹⁰ Walja jilat kullakanakaw kunjamanakatsa yatiyapxaspa uk amuytʼapxi. Wali jarkʼaqat utan jakasir mä kullakaxa, Bibliat yatiyañatakix mä jachʼa rompecabezas sat anatañwa armthapi, ukanxa wali suma chʼuxña chiqanak foto uñjasi. Ukat kunapachatï jaqinakax uk uñjasax wali sumarakisä sasin parlapxi ukhaw jupax Biblian parlki uka “machaq alaxpachampi[ta], machaq uraqimpi[ta]” parlañ qallti (Apo. 21:1-4). Kawkhankasasa, ¿kunjamanakatsa jumax yatiyañ qalltasma?

11. Kawkhan yatiykasasa, ¿kunjamsa yatxatañ munapki ukanakarux yanaptʼaskaksna?

¹¹ Yatxatañ munapki ukanakar yanaptʼaskakiñasawa. Khitinakas yatxatañ munaspa uk amuyañäni ukhaxa, yanaptʼaskakiñasawa. Wakisirjamächi ukhax inas jumax akham sischisma: “Jumamp parltʼañax askipunïnwa. ¿kawkhansa parltʼaskakiñatakix jikxatirissma?” sasa. Yaqhip jilat kullakanakax akham sapxarakiwa: “Jumamp parltʼañax askipunïnwa. Kuntï parlawayktan uka tuqit jukʼamp yatxatañ munsta ukhaxa, aka chiqanwa jikxatitasma” sasaw telefonopan numeropsa ukat kawkhansa jakasi uka direccionapsa churapxi. Janitï uka jaqir yanaptʼirjamästaxa, jankʼakiw Sírvase visitar (S-43) sat formularior qillqantasax tamamankir secretario jilatar churäta, jupaw kawkïr tamas yanaptʼaspa uk amtxani.

12. 1) Kawkhantï jikxatasktan uka chiqanakan qhawqha tiempsa yatiytan ukxa, ¿kunatsa qillqtʼasiñasapuni? 2) ¿Kuna askinaksa ukham yatiyasax jikxatasiwayi? (“Kawkhantï jikxatasktan uka chiqan yatiyasax wali askinakwa jikxatsna” siski uka recuadro uñxattʼäta.)

¹² Qhawqha tiempos ukham yatiytan uk informañasawa. Mä qhawqha minutoksay urun yatiystanxa, uk qillqtʼasiñ janipun armasiñäniti. Ak amuytʼañäni: sapa yatiyiritï phisqa minuto urun yatiyaspa ukhaxa, phaxsin 17 millón horanakwa yatiyasispa.

13. Kawkhantï jikxatasktan uka chiqanakan yatiyañxa, ¿kunatsa chʼamachastan?

¹³ Diosaru munasitasata ukat jaqi masisar munasitasatwa kawkhantï jikxatasktan uka chiqanakan yatiyañatak chʼamachastanxa (Mat. 22:37-39). Jehová Diosarux khuyaptʼayasiritapatwa munastanxa ukat kuna amtanis jiwasatakix uksa wali askirjamwa uñjtanxa, ukatwa taqi chuym ‘aytkay qhapaq sarayäwipat parltanxa’ (Sal. 145:7, 10-12). Jaqi masisar munasitas laykurakiwa, tiempo utjkipanxa kawkhantï jikxatasktan uka chiqanakan Diosan arunakapat yatiytanxa (Rom. 10:13, 14). Janïräkipan amuytʼañäni ukat waktʼayasiñäni ukhaxa, taqiniw kawkhantï jikxatastan uka chiqanakan yatiysna... inas ukhamat mayniru chiqa yatichäwinak uñtʼañ yanaptʼarakchisma, ukax wali kusiskañapunïspawa.

[4 janan qhanañchäwipa]

Parltʼañatakik chʼamachasim, ukhamatwa Bibliat yatiyañax jan chʼamäkaniti

[5 janan qhanañchäwipa]

Walja jilat kullakanakaw kunjamatsa yatiyapxaspa uk sum amuytʼapxi

[5 janan recuadropa]

Akanakwa lurarakisma

◼ Qalltañatak Jehová Diosat yanap mayisim

◼ Khitis parltʼañ munaspa ukat tiemponïpki ukanakar thaqham

◼ Kusisitaw uñkattʼañama ukat kuns yatiñ munaspa uka tuqit parltʼam

◼ Wali amuyump istʼam

[6 janan recuadropa]

Kawkhantï jikxatasktan uka chiqan yatiyasax wali askinakwa jikxatsna

• Mä jilataxa, autonak askichapki uka chiqan autop askichañapkam suykasaxa, ukankirinakaruw Bibliat yatiyäna ukat jachʼa tantachäwin taqinitak arstʼäwi istʼir jutapxañapatakiw invitacionanak lakiräna. Mä mara qhipatsti, mä jachʼa tantachäwinx jan uñtʼat mä jilataw wali munasiñamp uka jilatar arunttʼäna. ¿Khitïpachans aruntkäna uka jilataxa? Mä mara nayrax invitación churaniwaykatayna ukanakat maynïrïnwa. Taqinitak arstʼäwi istʼiriw saratayna ukat Bibliat yatiqañatakiw yanap mayitayna. Jichhaxa, jupasa warmipasa bautisatäxapxiwa.

• Mä kullakaxa, kimsa wawanakap tuqi uñtʼki uka jaqinakaruw yatiyi. Ukhamatwa jupax uta jakʼankirinakaparusa, escuelana ukat wawanakan awk taykanakapax tantachasipki ukan uñtʼki uka jaqinakarus yatiyaraki. Parlañ qallti ukhaxa, kunjamsa Bibliax wawanakapar uywañ yanaptʼi ukxa taqi chuymaw arstʼi ukat yaqha tuqinakatwa parltʼxi. Ukham parlañ qalltasax qhipatxa, Bibliat parltʼañax janiw chʼamäxiti. Ukham yatiyasaxa, uka kullakax tunka payaniruw bautisasiñapkam yanaptʼawayi. Jupaxa, niya ukham yatiyataw Bibliat yatiqarakitayna.

• Seguronak aljir chachaw mä kullakan utapar saratayna, juparuw kullakax Bibliat yatiyäna. Uka kullakax akham sasaw jisktʼatayna: ¿kʼumara, kusisita ukat wiñayatak jakañ munasmati? sasa. Uka chachax jïsa sataynawa, ukat kuna kasta segurots parlaski ukwa yatiñ munatayna. Kullakax kuna suytʼäwittï Bibliax parlki ukwa uñachtʼayäna ukat Bibliat apstʼat qillqat churarakïna, uka chachax mä jaypʼunakwa uka qillqat liysutayna. Bibliat yatiqañapatakiw amtxapxäna, tantachäwinakarus sarxänwa ukat qhipatxa bautisasxänwa.

• Mä kullakaxa, avionat sarkasaw ladopankir mä warmir parlxayäna ukat Bibliat yatiyarakïna. Purxasaxa, telefonopan numeropa ukat direccionapwa kullakax uka warmir churäna, ukat Jehová Diosan Qhanañchirinakapax utamar jutapxani ukhax Bibliat yatxatañatakiw yanap mayïta sasaw chʼamañchtʼarakïna. Ukat qhipürpachaw Diosan pä Qhanañchirinakapax punkup liqtʼapxatayna. Ukat Bibliat yatxatañ qalltawayasaxa, jankʼakiw Diosatakjam nayrar sarantasin bautisasxäna. Ukat jankʼakirakiw Bibliat kimsanir yatichxäna.

• Chuymankipstatanakar uñjañ utan jakasir mä jilataxa, akham sasaw sapa kuti arsu: “Diosan Apnaqäwipwa muntanxa” sasa, uka jilataxa 100 maraniwa ukat juykhurakiwa. Uk istʼasax enfermeranakasa ukat ukan jakapki ukanakasa uka tuqit jisktʼapxapuniwa, ukhamatwa kunas Diosan Apnaqäwipax uk qhanañchi. Mä uruxa, ukan irnaqir mä warmiw akham sasin jisktʼatayna: ¿kuns paraison luräta? sasa. Jilatax akham sasaw qhanañchtʼatayna: “Janiw juykhüxäti ukat sarnaqxarakiwa, ukhaw aka silla de ruedaj phichhantxä” sasa. Juykhutap laykusti yaqharuw revistanak liytʼarapiñapatak achiktʼasi. Mä uruxa, jilatan phuchapaw visittʼir saratayna ukat ukan irnaqir warmix revista utapar apasiñatakiw permiso mayitayna. Ukat mä enfermeraxa, akham sasaw sarakitayna: “Utanxa, akham sasaw jichhax sapxta ‘Diosan Apnaqäwipwa muntanxa’” sasa.

• Manqʼa aljañ utan suykasaxa, mä kullakax mä gruporuw política tuqit parlir istʼäna, jupanakax jilïr jaqinakäpxänwa. Janipuniw kuna apnaqäwis jan walinaka chhaqtaykaspati sasaw maynïrix säna, ukhaw kullakax akham amuytʼasïna: “Jichhakuchaw yatiyirista” sasa. Diosatwa chuymapan mayisïna ukat jupanakar jakʼachasïna. Nayraqatxa, khitis jupaxa ukwa arsüna ukat Diosan Apnaqäwipakiw taqi jan walinaka askichani sasin parltʼäna, ukat folletonaka uñachtʼayarakïna. Ukhaw manqʼa aljañ uta uñjirix jupar jakʼachtʼasïna. Ukat kullakax jichhax akat mistum sitaniwa sasaw amuyäna, ukampis uka jaqix akham sataynawa, kuntï parlaskayäta uk istʼtwa nayax mä folleto munaraktwa sasa. Ukat ukan irnaqir mä warmiw jachtʼasis jutarakïna, kuntï kullakax parlaskäna uk jupax istʼarakitaynawa. Jupaxa, Bibliatwa nayrax yatiqaskatayna ukat wasitatwa yatiqañ munäna.