¿Kawkhan yatiyañatakisa wakichtʼatätati?
1. Diosan Arup kawkhan yatiyasas wali askinakwa jikxatsna, uka tuqit arstʼam.
1 Diosan Arup kawkhan yatiyasas wali askinakwa jikxatsna. Ukham yatiyasax walja askinak jikxatapxatayna, uka tuqit waljaw Biblian uñsti (Juan 4:7-15). ¿Kunjamsa ukham yatiyañatakix wakichtʼassna?
2. Yäpar isthapisitasasa kʼachachtʼasitasasa ¿kunjamsa yatiyañatak yanaptʼistaspa?
2 Yäpar isthaptʼatäñasawa. Isthapisitasas ukat kʼachachtʼasitasas jan yäparjamäkani ukhax Diosan arunakapat yatiyañ axsarayassnawa, jiwasatï yäpar isthaptʼasiñäni ukhax iyawsäwisat jan axsartʼasaw taqinir yatiyañäni (1 Tim. 2:9, 10). Qʼuma ukat yäpar isthaptʼat uñjapxistani ukhaxa, kunats ukham isistan uk yatiñ munapxarakiniwa. Jehová Diosan Qhanañchirinakapatxa ukaw mä chacha warmir pasatayna, jupanakax musulmán yupaychäwinkir jaqin ladopan quntʼataw viajapxäna. Suma isthaptʼat uñjasaxa uka chachax cristianopxtati sasaw jisktʼäna, ukhamat parlañ qalltasax kimsa horanak parlapxatayna.
3. ¿Jesusat yatiqasisax kunjamsa maynimp parlañ qalltsna?
3 ¿Kunjams parlañ qalltsna? Jesusax mä samaritanar Jacobon phujup thiyan parlañ qalltkasax janiw jan amuykañ arunakamp parlkänti, jan ukasti um waxtʼita sasakiw parlañ qalltäna. Jiwasax ukhamwa luraraksna, kuna tuqitsa maynix parlañ muni uk parltʼasasa jan ukax jisktʼasasa. Chiqas awisax axsartʼayasiraksnawa, ukampis Jahová Diosar atinisiñäni ukhaxa Jupaw maynimp parlañ qalltañatakix yanapistani (1 Tes. 2:2).
4. ¿Kawkhan yatiyañatakis kunjamsa wakichassna?
4 Akanak lurarakismawa. Walja jilat kullakanakaw khitinakarus yatiyapxaspa uk sum amuytʼapxi. Jumax ukham lurarakismawa. Kawkirus saräta ukat khitinakampis sapür jikisisma ukwa amuytʼañama. Jupanakatakjamwa Bibliat apstʼat qillqatanak apasiñama ukat Biblsa apasiñamarakiwa. Kawkhantï jikxataskta uka jaqinakax kunjamäsipkisa ukat kunjamsa yanaptʼasma ukwa sum amuyañama. Ukhamtï lurätaxa, Diosan arunakapat kawkhan yatiyañatakis wakichtʼatayätawa (Fili. 1:12-14; 1 Ped. 3:15).
5. Jikxatasktan uka chiqankir jaqinakar yatiyañatakixa, ¿kunatsa wakichtʼatäñasa?
5 Diosar munasitasata ukat jaqi masisar munasitasatwa kawkhantï jikxatasktan uka chiqanakan yatiyañatak chʼamachastanxa (Mat. 22:37-39). Niyakixay Diosan arunakap yatiyañax wali wakiskirïchixa janiw ukhamaki uñjañasäkiti, jan ukasti suma wakichtʼatäñasawa. Ukhamatwa janïr akapacha tukuskipan Diosan Apnaqäwipat suma yatiyäwinak phuqatpach taqinir yatiyañäni (Rom. 10:13, 14; 2 Tim. 4:2).