Kawkhans yatiyaskakiñasawa
1. Jesusax mä warmiruw phuju jakʼan yatiyäna, ¿kunsa ukxat yatiqassna?
1 Jesusax walja horanak sarnaqasax qarita ukat umat pharjataw jikxatasïna. Ukhamasti, arkirinakapan manqʼa alir sarañapkamax Samaria marka anqäxan samartʼañatakiw quntʼasïna. Samariarux janiw yatiyir sarkänti; jan ukasti Galilea tuqiruw suma yatiyäwinak yatiyañatak saraskäna. Ukhamäkipansa, mä warmix um waysur jutkäna ukhaxa, janiw ukhamak uñtkänti, jan ukasti Diosan Arupatwa yatiyäna (Juan 4:5-14). ¿Kunatsa? Kunalaykutix Jehová Diosat jan jithiqtiri ‘chiqpach testigonwa’ (Apo. 3:14, MT). Jesusat yatiqasiñtï munstanxa, Jehová Diosan Qhanañchirinakapjamax kawkhans yatiyaskakiñasawa (1 Ped. 2:21).
2. ¿Kawkhans yatiyaskakiñatakix kunjamsa wakichtʼassna?
2 Wakichtʼatäñamawa. Kawkhans yatiyaskakiñatakix Bibliat apstʼat qillqatanakxa apasiñasapuniwa. Walja jilat kullakanakaw tratadonak apxartʼasiwayapxapuni, ukhamat jachʼa tiendanakan aljirinakaru, gasolina aljirinakaru ukat khitinakampitï ukürux jikisipxi ukanakar jayttʼawayañataki (Ecl. 11:6). Sapa kuti viajir mä kullakaxa, viajiñatakix mä jiskʼa Biblia ukat Kunsa yatichi sat librxa apxartʼasiwayapuniwa, ukat qunkattʼapki ukanakampix parltʼapuniwa.
3. ¿Kunjamatsa parltʼañ qalltsna?
3 Parltʼañ qalltañataki. Kawkhans yatiyaskakiñatakix janiw qalltatpachxa Biblian mä yatichäwipat parltʼañax wakiskapuniti. Amtañäni, Jesusax phuju jakʼan mä warmimpi parltʼäna ukhaxa, janiw nayaw Mesiasatxa sasax parlañ qalltkänti, jan ukasti um waxtʼita sasakiw arxaytʼäna, ukhamatwa uka warmix Jesusamp parltʼxarakïna (Juan 4:7-9). Jesusat yatiqasisinxa, mä kullakax akham saraki: ‘Kunjamakis fiestürux qamartʼaniwayta sasin jisktʼapxitu ukhaw jaqinakamp parlañ qalltta’ sasa. Kunatarak uka fiesta jan amtktasti sas jisktʼataxa, Jehová Diosan Qhanañchiripätax laykuw uk fiesta jan amtkti sañat sipansa “uka uru jan fiestachañatakiw amtta” sasaw uka kullakax saraki. Kunatarak jan amtktasti sasin jisktʼatax Diosan Arupatwa yatiyxaraki.
4. ¿Kunatsa Mateo 28:18-20 qillqatax yatiyaskakiñatakix chʼamañchtʼistaspa?
4 Jesusaxa, aka Uraqin suma yatiyäwinak yatiyañ tuktʼayawayxchisa, arunakapar istʼas suma yatiyäwinak yatiyktan ukxa uñjaskakiwa (Mat. 28:18-20). Ukhamasti, jupat yatiqasisax iyawsäwisat taqi chiqan yatiyaskakiñatakix wakichtʼatäpxañäni (Heb. 10:23).