Chʼamachasitasajj jan inamayäpati
1. ¿Kunjamsa 1 Corintios 9:26 qellqatajj yatiyir sarañatak chʼamachasitasan yanaptʼistaspa?
1 Apóstol Pablojj akham sänwa: “Nayajj janiw ina pampaki jalkti, janirakiw nuwasiñansa aleqa ina chʼusaru chʼakkiristsa ukham nuwaskti” (1 Cor. 9:26). Ukham sasinjja, Diosar jukʼamp serviñ munatapatwa Pablojj parlaskäna. Ukampis kuntï uka arunakajj siski ukajj yatiyir sarañanwa yanaptʼarakistaspa, kunattejj yatiyir sarañatak chʼamachasisajj wali askinak jikjjatañ muntanjja. ¿Kunjams uk lursna?
2. ¿Kawkhansa ukat kuna horasas yatiyañäni uk amtañatak kunjamsa Pablota ukat nayrïr cristianonakat yateqassna?
2 Jaqenakajj utjki ukhar sarapjjañäni. Pablosa ukat nayrïr cristianonakas kawkhantï jaqenakajj utjkäna uka cheqanakaruw yatiyir sarapjjerïna (Hech. 5:42; 16:13; 17:17). Yatiyktan uka cheqanakantï jaqenakajj arumajj utapankapjjchejja, inas uka horasanakan utat ut yatiyir sarañajj wakischispa. ¿Alwajj trabajoru sarañatakisa jan ukajj jaypʼojj utar kuttʼañatakis kawkhantï auto jan ukajj tren suyañatak utjki uka cheqanakan walja jaqenakat utji? ¿Territorioman kawkhantï aljirinakasa alasirinakasa utjki uka cheqanakan kuna horasas jaqenakajj wal utji? Uka horasanakaw callenakan yatiyañajj wali askïspa.
3. ¿Territorio tukuyañataki chʼamachasitasajj jan inamayäñapatakejj kuns lursna?
3 Territorio tukuyañatak amuyumpipun yatiyapjjañäni. Kunjamsa territorio tukuysna uk sumwa amuytʼañasa, ukhamatwa chʼamachasitasajj jan inamayäkaniti. Amuytʼañataki, walja yatiyirinakar mä zonar khitasi ukhajja, yatiyirinakar sum uñjañatakejj tiempo ukat chʼamachasiñaw wakisi. ¿Janit jaljañ wakiskaspa? Ukhamarusa, jaya cheqanakan autot yatiyir sarasajja, sapa auton janiw waljan sarañajj wakiskaspati, ukhamatwa jankʼak territorio tukuysna ukat walja jaqenakampis parltʼsna. Maysa toqetjja, uta jakʼan mä territorio mayisiraksnawa. Ukhamatwa viajasin tiempo jan añcha aptʼksnati.
4. Niyakejjay ‘jaqe katurïstanjja’, ¿kunas uk sum lurañatak yanaptʼistaspa?
4 Diosan arunakap yatiyirinakajj “jaqe katu[rïpjjewa]” sasaw Jesusajj säna (Mar. 1:17). Challwa katurejja, qänap janiw aleqaq uchkiti, jan ukasti challwanak katuñatakiw chʼamachasi: kuna horasa ukat kawkhansa katuspa uk sum amuyi, ukatsti jankʼakiw katuraraki. Jïsa, janiw inamay chʼamachaskiti. Yatiyir sarasin ukhamarakiw jiwasajj jankʼakïñasa (Heb. 6:11).