¿Kunjam toqenakatsa suma yatiyäwinak prediksna?

JESUSAJJA taqe chuymaw predikirïna. Jupajj jaqenakan utanakaparu jan ukajj kawkjantï jaqenakajj utjkäna uka cheqanakar sarasaw Jehová Diosat parlirïna, yaticharakirïna (Mat. 9:35; 13:36; Luc. 8:1). Jaqenakamp jikisisajj Diosat parlapunirïnwa, discipulonakaparus yaticharakirïnwa, ukat walja jaqenak nayraqatanwa Diosat parlarakirïna (Mar. 4:10-13; 6:35-44; Juan 3:2-21). Jesusajj horasarupuniw chʼamañchtʼkir arunakampisa suytʼäwi churir arunakampis jaqenakar parlirïna (Luc. 4:16-19). Samartʼañaru manqtʼasiñaru chuym uchañat sipansa, predicañaruw jupajj chuym uchirïna (Mar. 6:30-34; Juan 4:4-34). Wali kusisit chuymampiw Jesusajj predikirïna, uk uñjasajj ukhamarakwa apostolonakajj kusisit chuymamp predicapjjäna. Evangelio libronak liytʼasajja, jiwasajj ukhamarakiw taqe chuyma predicañ muntanjja (Mat. 4:19, 20; Luc. 5:27, 28; Juan 1:43-45).

² Jesusat yateqasisajj kunjam toqenakatsa cristianonakajj prediksna ukwa jichhajj yatjjataskañäni, cheqansa Jesusajj niya pä waranq maranak nayraw predicañ qalltawayi.

UTAT UTA PREDICAÑA

³ Jehová Diosan servirinakapajja, utat uta Diosan Reinopat suma yatiyäwinak yatiyañajj kunja wakiskirisa uk sumwa amuytanjja. Cheqas utat uta predikiritwa Testigonakar uñtʼapjjestu. Ukham luratasatjja, mä qhawqha tiemponakwa walja millón jaqenakar suma yatiyäwinak predicawaytanjja (Mat. 11:19; 24:14). Ukhamarus utat uta predicasajja, jaqe masisarusa Jehová Diosarus qhawqsa munastan ukwa uñachtʼaytanjja (Mat. 22:34-40).

⁴ Utat uta predicañajj janiw Testigonakan uñstayatakïkiti. Amuytʼañataki, apóstol Pablojj Éfeso markankir ancianonakarojja, ‘Asia provinciar purinkta ukhajj jan amuktʼasaw jumanakan askimatak utat uta yatichapjjsma’ sasaw säna. Ukham lurasajj ‘arrepentisisin Jehová Diosar kuttʼanjjapjjañapataki, Jesús Tatitur confiyapjjañapatakiw’ apóstol Pablojj yanaptʼaskäna (Hech. 20:18, 20, 21). Uka tiemponjja, emperadoranakajj idolonakar adorañatakiw jaqenakar wal chʼamañchapjjäna, ukatwa walja jaqenakajj idolonakar wal yupaychapjjäna. Ukampis jupanakajj Jehová Diosaruw jankʼak thaqapjjañapäna, mä arunjja ‘mundsa kunanakatï aka mundon utjki ukanaks lurkaraki’ uka Diosaruw thaqapjjañapäna, jupajj “taqe cheqanwa” arrepentisipjjam sasin yatiyaskäna (Hech. 17:22-31).

⁵ Jichha tiemponjja, jaqenakar suma yatiyäwinak yatiyañajj jukʼamp wakiskiriwa, kuna laykutejj aka jan wali pachajj niyaw tukusjjani. Uk yatisajj jukʼampiw jaqenakar predicañ muntanjja. Ukatakejj utat uta yatiyañaw wal yanaptʼistu, ukham lurasaw Jehová Diosat kunatï cheqäki uk yatiñ munirinakar jikjjattanjja. Jesús tiemponsa apostolonak tiemponsa uka pachpaw lurasirakirïna (Mar. 13:10).

⁶ Qhawqtï puedktan ukarjam predicañatakiw chʼamachasiñasa, ukhamatwa Jehová Diosar wal kusisiyañäni (Ezeq. 9:11; Hech. 20:35). Ukampis yaqhep jilat kullakatakejja, utat uta predicañajj chʼamakiwa, wal ajjsarayasipjjaraki. ¿Kunatsa ukham ajjsarayasipjjpacha? Jupanakatakejj jan uñtʼatanakar parlañajj janiw faciläkiti, ukhamarus jupanakat yaqhepajj janiw kʼumarapunïpkiti, kawkjantï jukʼa jaqenakak Jehová Diosat yatiñ munapki uka cheqanwa predicapjjaraki, yaqhepasti gobiernomp jarkʼataw uñjasipjjaraki. Ukhamanakan uñjaskasajj jiwasajj janiw desanimasiñasäkiti (Éx. 4:10-12). Oraqpachankir walja jilat kullakanakaw niya ukhamanakan uñjasipjjaraki.

⁷ Jesusajj discipulonakapar akham sasaw säna: “Amtapjjapunim, nayajj sapürupuniw jumanakampïskta, akapachajj tukuskani ukapachkama” sasa (Mat. 28:20). Uka arunakajja taqe cheqan predicañataki, jaqenakar Jesusan discipulopar tukuyañatakiw chʼamañchtʼistu. Apóstol Pabljamaw jikjjatasiraktanjja, jupajj akham sänwa: “Khititejj nayar chʼam churkitu ukan chʼamapampejja taqe kunatakiw nayajj chʼamanïta” sasa (Filip. 4:13). Ukhamajj qhawqtï puedktan ukarjam utat uta predicañatak chʼamachasipjjañäni, congregacionamp chikas predikir sarapjjarakiñäni, ukhamatwa jilat kullakanakajj chʼamañchtʼapjjestani, Diosar serviñan nayrar sartaskakiñatakis yanaptʼapjjestani. Ukatjja jan walinakar saykatañatakejj Jehová Diosar yanaptʼa mayipjjapuniñäni (1 Juan 5:14).

⁸ Predikir sarasakiw kunarutï jiwasajj creyktan ukanak jaqenakar yatiysna, arjjataraksna (1 Ped. 3:15). Ukhamatakwa jan suytʼäwinïpki ukanakat sipans kunans mayjätan uk qhan amuyañäni (Is. 65:13, 14). Jesusan mandatopar istʼasajj aka jan wali pachan mä qhanjamaw qhantʼasktanjja, uk yatisajj wali kusisitätanwa. Ukhamarusa utat uta predicasajj mayniruw Jehová Diosar uñtʼañapatakisa wiñay jakañar apir thaknam sarañapatakis yanaptʼsna (Mat. 5:16; Juan 17:3; 1 Tim. 4:16).

⁹ Diosan arunakap predikir mistuñatak tantachäwinakajja, semanpachatakiw wakichtʼasi. Yaqhep congregacionanakajj jaypʼunakaw predikir mistupjje, uka horasanakaw uru jurnäla jan utapankapki ukanakar jikjjatapjje. Ukhamarus alwat sipansa jaypʼunakaw jaqenakajj sum istʼapjje.

DIOSAT YATIÑ MUNIRINAKAR THAQAPJJAÑÄNI

¹⁰ Diosat yatiñ munirinakar thaqapjjañapatakiw Jesusajj discipulonakapar mayïna (Mat. 10:11). Jupa pachpas Diosat yatiñ munir jaqenakaruw taqe horasan thaqäna, janiw utat utak predickänti (Luc. 8:1; Juan 4:7-15). Apostolonakas taqe horasanwa predicapjjarakïna (Hech. 17:17; 28:16, 23, 30, 31).

¹¹ Walja jaqenakar Diosan Reinopat yatiyañwa jiwasajj munaraktanjja. Ukatakejja kunjamtï Jesusasa apostolonakas predicapkäna ukhamwa predicañasa, kunjamtï jichha tiempon yatiyaski ukarjamaw jaqenakar yatiyañasaraki (1 Cor. 7:31). Amuytʼañataki, walja publicadoranakajj qhatunakana ukat oficinanakan predicasaw Diosat yatiñ munirinakar jikjjatawayapjje. Walja markanakanjja, predikirinakajj parquenakana, callenakana, estacionamientonakana jan ukajj yaqha ukham lugaranakan predicasaw suma chuyman jaqenakar jikjjatawayapjje. Yaqhep congregacionanakajja, predicapki uka cheqanakan qellqatanakani mä mesa jan ukajj carritonakwa uchapjje. Ukhamarus sucursalanakajja, walja jaqenakajj utjki uka cheqanakan predicasiñapatakiw jachʼa markanakan organiztʼapjjaspa, ukhamat walja congregacionanakankir jilat kullakanakajj predicacionamp yanaptʼapjjañapataki. Taqe ukhamanak lurasitapatjja, jan utapankapki ukanakaruw jikjjatasiwayi.

¹² Bibliat yatiñ munir mä jaqerutï jikjjatañäni ukhajja, kuna toqettï yatiñ munki ukarjamaw mä qellqat chursna. Bibliat jukʼamp yatjjatañ munañapatakejja, jiwasan sutisa ukat numeroswa jaytawaysna, ukat yaqha ratu jupamp parlañatakiw amtawayaraksna, Internetankir jw.org uksa uñachtʼayaraksnawa jan ukajj utapat jakʼankki uka Salón del Reino uñachtʼayaraksna. Jiwasatï predicañatak chʼamachasiñäni ukhajja, kusisitaw jikjjatasiñäni.

¹³ Jehová Diosan servirinakapajja, janiw aleqak jaqenakar predicañasäkiti, jan ukasti Bibliat yatiñ munapki ukanakarojj walja kutiw visittʼañasa. Ukham lurañäni ukhakiw Jehová Diosan yatichäwinakap chuymanakapar katoqapjjani, Diosar serviñansa nayrar sartapjjarakini.

REVISITANAKA

¹⁴ Jesusajj arkirinakapar akham sänwa: “Espíritu santojj jumanakjjar jutkani ukhaw chʼam katoqapjjäta, Jerusalén markanwa nayat qhanañchapjjarakïta, taqe Judeana, Samariana ukhamarak taqe aka oraqpachana” sasa (Hech. 1:8). Ukat akham sarakïnwa: “Ukhamasti sarapjjam, taqe markanakankir jaqenakar nayan discipulojar tukuyapjjam [...]. Ukatsti taqe kuntï nayajj jumanakar yatichapksma ukanak phoqañ yatichapjjarakim” sasa (Mat. 28:19, 20). Revisitanak lurañajj maynirojj kusisiyaspawa. Sum istʼapkistu ukanakajj wasitampi jiwasar uñjasajj wal kusisipjjaspa. Bibliat jupanakar yatichañajj Jehová Diosar jukʼamp confiyañatakiw yanaptʼani, Diosat yatjjatañajj kunja wakiskirisa uksa amuyapjjarakiniwa (Mat. 5:3). Jiwasatï sum waktʼayasiñäni, horasar revisitasar kuttʼarakiñäni ukhajja, inas utanejj Bibliat yateqañ qalltchini, cheqas uka amtampiw predikir sartanjja. Utanin ukar wasitat kuttʼasajja, satantktan uka jatharus umamp warjjatksna ukhamawa (1 Cor. 3:6).

¹⁵ Cheqansa janiw taqenitakejj revisita lurañajj faciläkiti. Yaqhep jilat kullakanakarojj predicañajj wal gusti, uk lurañatakis wali wakichtʼatäpjjarakiwa, ukampis Bibliat jukʼamp parlañatak wasitat kuttʼañajj jupanakatak chʼamakiwa, janis uk lurañatakejj wakichtʼatäpkaspa ukhamwa amuyasipjjaraki. ¿Jiwasarutï ukajj paschistu ukhajj kunsa lursna? Mayamp kuttʼañatakejj sum wakichtʼasiñasawa, ukhamat jan ajjsartʼas parlañataki. Ukatjja semanan apaski uka tantachäwin yatichaski ukarjam revisitanak lurañaw yanaptʼarakistaspa. Ukhamarus experienciani mä jilataru jan ukajj mä kullakaruw jiwasar compañtʼañapatak maysna.

CURSOS BÍBLICOS

¹⁶ Hechos 8 capitulojj judío religionar sarir mä jaqetwa parli, jupar Diosan Arup liytʼaskir istʼasajj Felipejj akham sasinwa jisktʼäna: “¿Kuntï jumajj liyiskta uk cheqpachapunit amuyta?” sasa. Uka jaqesti akham sänwa: “¿Cheqpachans jan khitin yatichatajj kunjamarak amuyiriststi?” sasa. Ukjjarojja Felipejj kuntï uka jaqejj liytʼaskäna ukarjamaw parlañ qalltäna, ukhamatwa “Jesusjjat suma yatiyäwinak jupar qhanañchäna” (Hech. 8:26-36). Qhawqha tiempos Felipejj uka jaqemp parläna ukajj janiw yatiskiti, ukampis uka jaqejj Jesusarojj creyjjänwa, bautisasisajj Jesusan discipuloparuw tukuñ munarakïna.

¹⁷ Jichhürunakanjja waljaniw Bibliat jan kuns yatipkiti, ukatwa kutin kutin jupanakar visittʼañajj wakisi, sum amuyapjjañapkamajja inas semananaka, phajjsinaka, jan ukajj mä marats jila visitañajj wakischini, ukhamat Jehová Diosar confiyapjjañapataki ukat bautisasipjjañapataki. Kunapachatï pacienciampi munasiñampi uka jaqenakar yatichtan ukhajja, chuymas chuymaw jikjjatastanjja. Uka toqet Jesusajj akham sänwa: “Katoqañat sipansa churañanwa jukʼamp kusisiñajj utji” sasa (Hech. 20:35).

¹⁸ ¿Kunjamsa estudionakasarojj Jesusan discipulopar tukupjjañapatakejj yanaptʼsna? Jaqenakar Bibliat yatichañatak lurasiwayki ukanakat mä qellqatamp yatichapjjañäni, semanan utjki uka tantachäwin yateqktan ukarjam lurapjjañäni, ukatjja yatichañatakejj wali experienciani mä jilatampi jan ukajj mä kullakampi compañtʼayasipjjañäni.

¹⁹ Bibliat yatichañ qalltañataki ukat yatichañatak yanaptʼa munstan ukhajja, mä ancianoru jan ukajj yatjjattʼat mä cristianoruw yanaptʼa maysna. Cristianjam Jakañataki ukat Yatichañataki sat qellqatanjja, kunjamsa Bibliat yatichsna uka toqet walja yanaptʼanakaw utjaraki, semanan apaski uka tantachäwinjja ukarjamaw demostracionanakajj lurasiraki. Ukatjja maynir Bibliat yatichañ qalltañatakejja, Jehová Diosaruw yanaptʼa mayiñasa (1 Juan 3:22). Ukhamajj Bibliat yatichañatak chʼamachasipjjañäni. Inas jiwasajj mä familiasar Bibliat yatichaskstan, ukampis yaqha jaqenakar Bibliat yatichañatakejj chʼamachasiñasarakiwa. Ukaw kusisit predicañatakejj yanaptʼistani.

BIBLIAT YATICHKTAN UKANAKAROJJA DIOSAN MARKAPAR IRPANIPJJAÑÄNI

²⁰ Khitinakarutï Jehová Diosar uñtʼapjjañapataki ukhamarak Jesusan discipulopar tukupjjañapatak yanaptʼktan ukanakajja, tiempompejj Jehová Diosan markap taypinkjjapjjewa. Jupanakarojja Jehová Diosan markap sum uñtʼapjjañapataki, kunan yanaptʼañay Diosan markapan wakischi uk lurapjjañapatakiw yanaptʼañasa, ukham lurasakiw jupanakarojj Diosar serviñan jiltapjjañapatak yanaptʼsna. Ukatakejja mä qhawqha videonakampi, ¿Khitinakas Jehová Diosan munañap lurasipki? sat folletompiw utjistu. Aka libron 4 capitulopas yanaptʼarakistaspawa.

²¹ Jaqenakar nayrïr kuti visitkäta ukhatpachaw Jehová Diosan organizacionapat parlañama, jupanakaruw Diosan Reinopat oraqpachan parlapjjañapatak ajlli sasaw sañamaraki. Bibliat apstʼat qellqatanakajj qhawqha valoranisa uka toqetsa parlañamarakiwa, khitinakatï uka qellqatanak lurapki, oraqpachan lakirapkaraki ukanakajj voluntarionakäpjjewa sasaw qhanañchtʼañamaraki. Tantachäwinakajj kunjamasa uksa parlañamarakiwa, jumamp chik ukar sarapjjañapatakis invittʼañamarakiwa, jilat kullakanakarus uñtʼayañamarakiwa. Ukhamarus asambleanakanwa jukʼamp jilat kullakanakar uñtʼapjjaspa. Ukham tantachäwinakanwa Jehová Diosan markapankirinakajj kunja munasirïpjjes uk amuyapjjani (Juan 13:35). Bibliat yateqerinakasajj Jehová Diosan markapar wal munasipjjani ukhajja, jukʼampiw Diosar jakʼachasipjjani.

BIBLIAT APSTʼAT QELLQATANAKAMPEJJ ¿KUNJAMSA PREDIKSNA?

²² Nayrïr patak maranakan jakir cristianonakajja, Biblian cheqa yatichäwinakap taqe chuymaw yatiyapjjäna, Biblia liytʼapjjañapatakiw jaqenakar chʼamañchtʼapjjäna, jupanakatakisa congregacionatakis Qellqatanakwa copiapjjarakïna. Janis walja copianakanïpkchïnjja, wali valoranitwa ukanak uñjapjjäna (Col. 4:16; 2 Tim. 2:15; 3:14-17; 4:13; 1 Ped. 1:1). Jehová Diosan Testigonakapajja, jichha tiempon walja millón Biblianaka, Bibliat apstʼat qellqatanakwa walja arunakan imprimipjje. Sañäni: libronaka, revistanaka, tratadonaka, folletonakwa imprimipjje.

²³ Jehová Diosan markapajj churkistu uka qellqatanakjja jaqenakar churapjjapuniñäni. Kunjamsa uka qellqatanakat yatjjatañajj yanaptʼawayistu uk amtañajja, uka qellqatanak jaqenakar churañatakiw chʼamañchtʼistani (Heb. 13:15, 16).

²⁴ Sapürutjamaw walja jaqenakajj Internetar kun yatiñatakis mantapjje. Ukatwa Diosan Reinopat jaqenakar yatiyañatakejj Internetankir jw.org cheqajj utjistu. Uk utjatap laykojja, walja jaqenakaw oraqpachan kunayman arunakat Biblia ukhamarak Bibliat apstʼat qellqatanak liytʼapjjaspa jan ukajj audionak istʼapjjaspa. Ukampis khitinakatï jan jiwasamp parlañ munapki, jan ukajj Jehová Diosan Testigonakapajj jan utjki uka cheqanakan jakasipki ukanakajja, jiwasan creencianakasat yatiñatakejj utanakap pachpanwa jw.org cheqar mantapjjaspa.

²⁵ Internetankir jw.org sat cheqjja jaqenakar uñtʼayapjjapuniñäni. Amuytʼañataki, mä jaqetï creencianakasat jisktʼistani ukhajja, mä celular toqnama jan ukajj mä tableta toqnamaw uk qhanañchtʼañatakejj Internetan jw.org cheqar mantsna. Mä jaqetï yaqha arut parlaschi, jan ukajj lenguaje de señas uk yatchi ukhajja, kunjamsa Biblia ukat Bibliat apstʼat qellqatanak jw.org cheqan pachpa arupat jikjjataspa ukwa uñachtʼaysna. Walja jilat kullakanakajja, videonak uñtayasaw Bibliat parlañ qalltapjje.

KAWKJANKKASAS YATIYAPJJAPUNIÑÄNI

²⁶ Jesusajja, “nayajj aka mundon qhanapätwa” sasaw säna (Juan 8:12). Mä kutejj jupar istʼapkäna ukanakarojja, jumanakajj aka mundon qhanapäpjjtawa sasaw Jesusajj säna. Ukat akham sarakïnwa: “Qhanam jaqenak nayraqatan qhantʼayapjjam, ukhamat jupanakajj suma luratanakam uñjasin alajjpachankir Awkimaru jachʼañchapjjañapataki” sasa (Mat. 5:14-16). Jesusan discipulonakapajj kunapachatï Jehová Diosan mayitanakap istʼapkäna, Jesusatsa yateqasipkarakïna ukhaw mä qhanjamas qhantʼapkaspa ukhamäna. Jichhürunakanjja ukhamarakiw cristianonakajj Jesusat yateqasisajj mä qhanar uñtat qhantʼapjje, ukhamat jupanakar istʼapki ukanakar yanaptʼañataki.

²⁷ Apóstol Pablojja jiwasanakatakejj wali yateqaskayarakiwa (1 Cor. 4:16; 11:1). Jupajj Atenas markankkäna ukhajja, sapürupuniw mercadonkir jaqenakar predicäna (Hech. 17:17). Filipos markankir cristianonakajj jupjamarakiw predicapjjäna. Ukatwa Pablojj jupanakar akham säna: “Jan wali jaqenak taypinsa, jan cheqapar sarnaqer jaqenak taypin jakkasasa, [...] jumanakajj mä qhanar uñtataw aka mundon qhanasipktajja” sasa (Filip. 2:15). Jichhürunakanjja jaqenakar predicasaw Reinon suma yatiyäwinakap qhanaytanjja. Ukampis janiw aleq parlasakejj qhanktanti, jan ukasti sum sarnaqasaw qhanaraktanjja. Ukanak uñjasaw mayninakajj jan akapachankir jaqenakjamätas amuyapjje. Ukampis ¿kunjamatsa jan akapachankir jaqenakjamätas amuyapjje? Suma yatiyäwinak yatiyatasatwa kunatsa mayninakat sipans mayjätan uk amuyapjje.

²⁸ Kunayman cheqanakanwa jaqenakar prediksna. Walja jilat kullakanakaw trabajonkkasasa, escuelankkasasa, autot sarkasasa jan ukajj mä kun lurkasas predicapjje. Jaya lugaranakar viajkasas suytʼäwisat parlaraksnawa. Ukhamajj taqe horasan predicañatakejj wakichtʼatäñasawa.

²⁹ Ukham lurañatakejja, taqe kun Luriri Diosar jachʼañchatas amtaña ukhamarak sutip jachʼañchatas amtañaw yanaptʼistani. Ukhamarusa inas mä jaqerojj Jehová Diosar uñtʼañapataki, jupan serviripäñapatak yanaptʼsna, ukham luratasatjja Jesusar confiyasajj wiñay jakañwa katoqaspa. Jehová Diosatakejja predicacionajj wali wakiskiriwa, uk lurañatak chʼamachasiñaswa munaraki (Heb. 12:28; Apoc. 7:9, 10).

TERRITORIO

³⁰ Jehová Diosajja, taqe markanakana oraqpachankir taqe cheqanakan Reinopat yatiyasiñapwa muni. Jehová Diosamp irpayasisajja, nayrïr patak maranakan jakir cristianonakajj suma organiztʼataw predicapjjäna (2 Cor. 10:13; Gál. 2:9). Jichhürunakanjja ukhamarakiw sucursalanakajj congregacionanakarusa jaya cheqanakan jakasir publicadoranakarus predicañatak territorionak churapjje (1 Cor. 14:40). Kunjamas congregacionankir mä territoriojj predicasini uk amuytʼañajj wali wakiskiriwa, kuna laykutejj aka qhepa urunakan waljaniw Jehová Diosan markapar mantasinipki, ukat jukʼamp jaqenakar predicañaw wakisiskaki.

³¹ Mä congregacionanjja, superintendente de servicio jilataw territorionakat encargasi. Ukampis mä siervo ministerialaw kawkjansa predicasiñapa uk asignaspa. Pä kasta territorionakaw utji: territorios de grupo ukat territorios personales. Territoriojj jan jachʼäki uka lugaranakanjja, sapa superintendente de grupo jilataw kawkjansa jilat kullakanakajj predicapjjani uka territorionak katupjje. Ukampis territorionakajj jachʼäki uka lugaranakanjja, sapa publicadoraw mä territorio personal mayipjjaspa.

³² Mä territorio mayisipki ukanakajja, congregacionajj jan predikir mistki uka uru, jan ukajj grupomp chik jan predicañjamäki ukhaw uka territorion predicapjjaspa. Ukhamarus walja horanakaw uka territorion predicapjjaspa. Sañäni, trabajkis uka jakʼanjja chika uruw predicapjjaspa. Yaqhep familianakajj utap jakʼan mä territorio mayisipjje, ukhamat yaqhep jaypʼunakajj ukan predicañataki. Maynitï mä territorio personal mayisiñ munchi ukhajja, siervo de territorios jilatatwa mayisispa. Territorio personalanakanjja grupjamas predicasirakispawa.

³³ Khititï mä territorio mayiski ukajja, taqe utanakan jaqenakamp parlañatakiw chʼamachasiñapa, ukjja janïr pusi phajjsinak paskipanwa phoqañapa. Uka territorion predicañatakitï gobiernon leyinakaparjam phoqañajj wakischi ukhajja, ukarjamaw lurasirakiñapa. Kunapachatï territorion predicañajj tukuyasjjani ukhajja, siervo de territorios jilataruw yatiyasjjañapa. Maynitï uka territorio predicañ jan phoqerjamätap amuyaschi ukhajja, uka territorio kuttʼayjjaspawa, jan ukajj wasitamp uka territorion predicañ munchi ukhajj mayampiw jupajj mayispa.

³⁴ Taqenin yanaptʼapampejja, taqpach territoriojj sumaw predicasispa. Ukhamarusa jaqenakar jan colerayañatakejja, janiw may maya gruponakajj mä pachpa territorionak predicapjjañapäkiti. Ukhamatwa jaqenakaru ukhamarak jilat kullakanakar respetasitapajj uñachtʼayasi.

KUNAYMAN ARUNAK PARLIR JAQENAKAR PREDICAÑATAK CHʼAMACHASIPJJAÑÄNI

³⁵ Taqe jaqenakaw Jehová Diosarusa Yoqaparus uñtʼapjjañapa, Jehová Diosan Reinopats yatipjjañaparakiwa (Apoc. 14:6, 7). Kunayman arunak parlir jaqenakajj Jehová Diosar jakʼachasipjjaspa, machaq jaqëñamp isthapisipjjaspa ukwa muntanjja (Rom. 10:12, 13; Col. 3:10, 11). Ukampis kunayman arunak parlir territorion predicañajj janiw faciläkiti. ¿Kunjamsa uka cheqanakan prediksna? Kuna aruttï parlasipki uka arut Reinon suma yatiyäwinakap istʼapjjañapatakejja, ¿kunsa lursna? (Rom. 10:14).

³⁶ Kuna arojjay mä territorion parlaschi ukarjamaw sucursalajj congregacionanakar territorionak asigni. Ukhamajj kawkïr lugaranakantï walja arunakat parlirinakajj utjki uka cheqanakanjja, walja congregacionanakaw uka pachpa territorion predicapjje. Ukhamächi ukhajja, congregacionasajj parlki uka arut parlirinakaruw predicañasa. Maran utjki uka campañanakansa ukhamwa lurañasaraki. Ukampis kunapachatï carritompi jan ukajj sapak predicktan ukhajja, kunayman arunakat qellqatanakwa jaqenakar chursna.

³⁷ Yaqhep congregacionanakajja, janiw jaya cheqankir territorionakan sapa kuti predicañ puedipkiti. Ukatwa uka territorionak sum predicasiñapatakejj congregacionanakankir superintendente de servicio jilatanakajj sum organiztʼapjjañapa, ukhamat walja jaqenakajj Reinon suma yatiyäwinakap istʼapjjañapataki, ukhamarak jan inamay utanakapar kutin kutin kutiskañataki (Prov. 15:22).

³⁸ Yaqha arut parlasir mä jaqetï mä utat mistunini ukhajj ¿kunsa lursna? Arupat parlir mä jilatawa jan ukajj mä kullakaw jupar jikjjataskani sasajj janiw amuyañasäkiti. Antisas arupat utjki uka qellqatanakwa aparapsna, jan ukajj Internetankir jw.org cheqwa uñachtʼaysna, kunjamsa uka cheqat qellqatanak liytʼaspa descargarakispa uksa yatichtʼaraksnawa. Yaqhep jilat kullakanakajja, territoriopan kuna yaqha artï jaqenakajj jilpach parlapki ukarjamaw mä qhawqha arunak yateqapjje, ukhamat jupanakamp mä jukʼa parltʼañataki.

³⁹ Maynitï cheqpachapun Bibliat yateqañ munchi ukhajja, pachpa arupat parlir mä jilataru jan ukajj mä kullakaruw irpsna. Ukatjja utap jakʼan pachpa arupat utjki uka tantachäwinakar sarañapatakiw invittʼaraksna. Ukampis jupatï arupat parlir mä cristianomp Bibliat yateqañ munani ukhajja, kunjamsa Internetankir jw.org sat cheqar mantasajj datonakap qellqantaspa ukwa yatichtʼsna. Ukatjja sucursalaw jupar yanaptʼañatakejj mä publicadoraru, mä gruporu jan ukajj mä congregacionar mayispa.

⁴⁰ Yaqha aru parlir jaqerojja, pachpa arupat parlir mä jilatana jan ukajj mä kullakan Bibliat yatichañapkamaw visittʼaskakiñasa. Awisajja sucursalajj inas uka aru parlir mä jilataru jan ukajj mä kullakar jan jikjjatkchiniti, ukhamäni ukhajja ancianonakaruw uk yatiyani. Ukham pasani ukhajja, yateqañ munki ukar Bibliat yatichañatakejj jiwasaw chʼamachasiskakiñasa, ukatakejj pachpa arupat utjki uka qellqatanakaw yanaptʼistaspa. Fotonakampi dibujonakampi sum qhanañchtʼañäni, Biblia liytʼayarakiñäni ukhajja, mä jukʼanaksa Bibliat yateqaniwa. Ukhamarusa inas familiapat maynejj parlasktan uka aru parlañ yatirakchi, ukhamäni ukhajj jupaw kuntï yatichasktan uk yateqerir sañapatak yanaptʼarakistaspa.

⁴¹ Ukatjja tantachäwinakar jutañapatakiw jupar invitaraksna, inas kuntï tantachäwin yatichaski uk jan taqpach amuykchiniti, ukampis ukham luratasatwa Jehová Diosan markapar mantaniñapatak yanaptʼsna. Pachpa arupat utjki uka Bibliat textonak liytʼañapatakis yanaptʼaraksnawa. Jupatï tantachäwinakar jutani, jilat kullakanakampis ukan jikisirakini ukhajja, Diosar serviñanwa jukʼamp jiltani.

⁴² Pregruponaka. Mä pregruponjja, yaqha arut predikir walja publicadoranakaw utji, ukampis semanan utjki uka tantachäwi sarayañatakejj janiw ukan mä ancianosa, jan ukajj mä siervo ministerialas utjkiti. Sucursalajja, aka mayitanakamp phoqer mä congregacionaruw pregruponïñapatakejj uttʼayaspa:

1. 1) Predicapki uka territorion yaqha aru parlirinakajj waljaw utjañapa.

2. 2) Yaqhep publicadoranakajj uka aru sum yatipjjañapa jan ukajj uka aru yateqañatakejj jankʼakïpjjañapawa. 

3. 3) Congregacionankir ancianonakajja, yaqha arut predicasiñapatak organiztʼañatakejj listokïpjjañapawa.

Ancianonakatï mä pregrupo uttʼayañ munapjjchi ukhajja, superintendente de circuito jilataruw jisktʼapjjañapa. Kuna laykutejj jupaw uka aru parlirinakar predicañatakejj yaqha congregacionan utjatap yatispa, ukhamarus jupaw kawkïr congregacionas mä pregruponïspa uk sum amuytʼañatak ancianonakar yanaptʼaspa. Kawkïr congregacionas pregruponïspa ukajj yatisjjani ukhajja, ancianonakajj mä cartwa sucursalar apayapjjaspa, ukhamat congregacionan mä pregrupo solicitañataki.

⁴³ Gruponaka. Mä congregacionajj yaqha aru parlir mä gruponïspati janicha ukjja, sucursalajj akarjamaw amtaspa:

1. 1) Territorionkir yaqha aru parlir jaqenakajj Diosat wal yatiñ munapjjañapa, grupos jukʼamp jiltirjamäñaparakiwa.

2. 2) Mä qhawqha jilat kullakanakajj territorion parlaski uka arwa yatipjjañapa, jan ukajj uka aru yateqañatakiw chʼamachasisipkañapa.

3. 3) Experienciani mä siervo ministeriala jan ukajj mä ancianow utjañapa, ukhamat grupor organiztʼañapataki jan ukajj semanan may kutis tantachäwi sarayañapataki (jan ukajj tantachäwin mä partepakwa sarayaspa. Sañäni, discursojj arstʼaski uka cheqwa sarayaspa jan ukajj Yatiyañataki revista sarayaspa).

Uka mayitanak niy phoqjjasajja, ancianonakajj sucursalaruw mä carta apayapjjañapa, ukhamat mä grupojj congregacionan utjañapataki. Grupot encargasir ancianojja “superintendente de grupo” satawa, grupot encargasir siervo ministerialasti “siervo de grupo” satarakiwa, jupaw grupot encargasini.

⁴⁴ Mä grupojj uttʼayasjje ukhajja, gruponïki uka congregacionankir ancianonakaw kawkïr tantachäwinaksa apapjjani, phajjsin qhawqha kutis tantachäwinakajj apasini ukanak amtapjjani. Predikir mistuñatak tantachäwinaksa organiztʼapjjarakispawa. Gruponkir jilat kullakanakajja, kawkïr congregacionatï grupot encargaski ukankir ancianonakamp pʼeqtʼatäpjjewa. Jupanakaw grupor sum uñjañatak chʼamachasipjjani, kunanjjay yanaptʼañajj wakischi ukansa yanaptʼapjjarakiniwa. Superintendente de circuito jilatajj gruponi congregacionar visitkani ukhajja, grupompejj predikir misturakiniwa. Ukatjja uka grupon kunanakas munasi, kunjamas jiltaski taqe ukanakwa sucursalar yatiyani. Tiempompejja walja gruponakaw mä congregacionar tukupjje. Kunapachatï Jehová Diosamp irpayasiñatak taqeni chʼamachasipjje ukhajja, Jehová Diosaruw kusisiyasipki (1 Cor. 1:10; 3:5, 6).

JILAT KULLAKANAKAMP PREDICAÑA

⁴⁵ Cristianonakajja Reinon suma yatiyäwinakap predicañatakiw chʼamachasipjjañapa. Taqe ukanak phoqañatakejj kunayman yanaptʼanakaw utji, ukampis yaqha jilat kullakanakamp predicasajj jukʼamp kusisitätanwa (Luc. 10:1). Uka amtampiw congregacionanakajj semanan predicañataki ukhamarak seman tukuyanak predicañatak salidanak organiztʼapjje. Ukatjja feriado urunakan predicasiñapatakiw organiztʼapjjaraki, ukhamat uka urojj jan trabajipki uka jilat kullakanakajj predikir mistupjjañapataki. Alwasa jan ukajj jaypʼus kawkitsa predikirejj mistusini ukat kuna horanakas mistusini ukanakjja, Comité de Servicio taypinkir ancianonakaw amtapjje.

⁴⁶ Grupjam predicañajja, maynit maynikam chʼamañchtʼasiñatakiw yanaptʼistu (Rom. 1:12). Jichhak predikir mistupki uka jilat kullakanakajja, experienciani jilat kullakanakamp predicasajj jupanakatwa yateqasipjjaspa. Inas predikir sapak sarchiñäni, ukampis predikir mistuñatak tantachäwir sarañajj taqeniruw chʼamañchtʼistaspa. Kawkjantï predicktan uka cheqan jilat kullakanakan predicapjjatap yatiñajja, jan ajjsarañatakiw yanaptʼistaspa. Ukhamarus yaqhep lugaranakanjja, panini jan ukajj jukʼamp jilat kullakanakan predikir sarapjjañapaw wakisi, ukhamat jan walin jan uñjasiñataki. Maysa toqetjja, predicañatakitï salidanakajj sapüru utjchi ukhajj janiw precursoranakasa, publicadoranakasa programatäki ukanakarjam sapüru predikir mistuñatak obligatäpkiti. Ukampis semanan mä qhawqha urunakajj predikir mistupjjaspawa.

⁴⁷ Jesusampi apostolonakapampiw predicañ qalltawayapjje, uk phoqañatakejj taqeniw chʼamachasiñasa. Jiwasatï Diosan Reinopat taqe chuyma predicañäni ukhajja, Jehová Diosan bendicionanakapwa katoqañäni (Luc. 9:57-62).