CRISTIANJAM JAKAÑATAKI
Yaqha aru parliri jaqenakar predicasiñapatak yanaptʼapjjañäni
Jaqenakajj jiskʼatpach parlapki uka arut Diosan Reinopat yatiyäwinak istʼapki ukhajja, chuymaparuw uka yatiyäwinak sum katoqasipjje. Ukatwa 33 maran Pentecostés fiestanjja, Jehová Diosajj ‘taqe markanakat jutiri Dios chuyma judionakar’ Jupan arunakap istʼapjjañapatak yanaptʼpachäna, inas jupanakajj hebreo jan ukajj griego aru parlapjjarakchïna (Hch 2:5, 8). Jichhürunakanjja, yaqhep Tantachasiñ Utanakan paya jan ukajj jukʼamp arunak parliri congregacionanakaw tantachasipjje, jupanakajj pachpa territorionwa predicapjjaraki. ¿Kunjamsa uka cheqanakan utaninakar jan colerayasa, tiempsa chʼamsa jan aptʼasis sum yatiysna?
Sum parlakiptʼasiñaw wakisi (Pr 15:22): Yatiyañ toqet jilïr irpir jilatanakajja, kunjamsa uka cheqanakan predicapjjani uk sum parlakiptʼasipjjañapawa, ukarjamaw mä amtar puripjjañaparaki. Awisajj yaqhep congregacionanakajja, janiw arup parlapki uka jaqenakan utanakapar yaqha congregacionanakan sarapjjañap munapkiti. Awisasti, territoriojj wali jachʼätap laykojj taqe utanak predicapjjañapwa munapjjaraki, “nanakajj parlapkta uka arut Bibliat yateqañ muniri jaqenakajj utjani ukhajja, awisapjjetätawa” sasaw sapjjaraki (od-S pág. 93 párr. 37). Arup parlirinakar thaqañatakejja, inas yaqha congregacionar yanaptʼa mayipjjchispa, ukhamat direccionanak qellqtʼasiñataki (km 7/12 pág. 5, recuadro). Ak janiw armañasäkiti, mä pachpa utanjja paya jan ukajj jukʼamp arunakaw parlasispa. Ley de protección de datos ukajj markasan utjchi ukhajja, ukarjamaw uka territorionakan predicasiñapa.
Yanaptʼasiñasawa (Ef 4:16): Kuntï yatiyañ toqet jilïr irpirejj siskani ukarjamaw lurañasa. Jiwasatï yaqha aru parliri mä jaqer Bibliat yatichstan ukhajja, ¿janit arup parliri congregacionar pasayksna? Uka congregacionankir mä jilatampi jan ukajj mä kullakamp yateqasajja, jukʼamp ratukiw Diosar serviñan nayrar sartaspa.
Sum wakichtʼasiñasawa (Pr 15:28; 16:1, NM): Yaqha aru parlir jaqetï mistunini ukhajja, predicañatakiw chʼamachasiñasa. Suma wakichtʼatäñatakejja, kuna arunakas territoriosan parlasi ukarjamaw Biblia, jan ukajj videonak Internetat apaqtʼasiñasa. Pachpa arupat utanir aruntañ yateqañatakejja, JW Language ukampiw yanaptʼayasiraksna.