Yaqha aru parlchi ukhax kamachsnasa
1. Mä territorion sum yatiyañatakixa, ¿kunatsa maynit maynikam yanaptʼasiñax sapa kutitjam wakisixa?
1 Aka Uraqpachanwa, yatiykasax yaqha aru parlirinakampix sapa kutitjam jukʼamp jikistanxa, ukat jupanakasti Diosan Apnaqäwipat wal yatxattʼañ munapxi. Walja sucursalanakawa, ukham yaqha aru parlirinakar Diosat yatxatañ yanaptʼañatakixa, gruponaka ukat tamanak uttʼayapxi. Kawki lugarantix yaqha arut parlirinakax utjchi ukanxa, inas yaqhip tamanakax pachpa territorior yatiyir mistsupxchi. Ukhamasti, sum yatiyañatakixa, ¿kunjamsa tamanakax maynit maynikam yanaptʼasipxaspa? (1 Cor. 14:33.)
2. Utat uta yatiykasaxa, ¿kunjamatsa pachp territorion yaqha arut parlir gruponakampix jan ukax tamanakampix maynit maynikam yanaptʼassna?
2 Maynit maynikam yanaptʼasipxañäni. Callenakan jan ukax yaqha chiqanakan yatiyktan ukhaxa, yaqha arutsa parlapkchixa, khitirus yatiyaskaksnawa, ukat kuna arut qillqatxay munchini uksa churaraksnawa. Ukampis yaqha arut parlir tamax pachpa territorion yatiychi ukat utat uta yatiyir sararakstan ukhaxa, kuna arut yatiyirïtansa uka utanakarukiw visittʼañasa. Pachpa lugaran walja tamanakax yatiyapxi ukhaxa, kawkïr utanaksa jan ukaxa kawkïr chiqanaksa yatiyapxani ukxa sumwa tamanakax qillqtʼasipxañapa, ukat yatiyañ tuqit irpir chuymaninakax sumwa parlasipxañapa, ukhamat suma amtäwinakar puripxañapataki (Pro. 11:14). Ukampisa, mä yatiyirixa utat uta yatiykasax yaqha aru parlir jaqimp jikischi ukat janirak uka arut uttʼayat tamas uka jakʼan utjkchi ukhaxa, uka jaqir yatiyañatakixa jupaw chʼamachtʼasiñapa, ukat yatiqañ munchi ukhaxa jupaw yatichañapa.
3. Yaqha arut yatiyirinakampi pachp territorion jikisisaxa, ¿kamachañasäspasa?
3 Pachpa yatiyäwiwa. Kunapachatï pä tamaxa uka pachp lugaran yatiyasipkchi ukhaxa, ¿kamachapxañapasa? Chiqpachansa, yaqha arunak parlañasay utjchixa, munasiñaw yanaptʼistani, ukat uka territorion jakasipki uka jaqinakar kunjamatsa sum yanaptʼsna ukwa taqinis muntanxa (Juan 13:34, 35). Ukhamasti, irpsupki uka jilatanakawa munasiñamp sum amuytʼasa kawkïr tamas yaqha chiqar sarxañapa ukxa amtapxani (Sant. 3:17, 18).
4. ¿Kuna profecías jichhürunakan phuqasiski?
4 Kunayman parlani jaqinakaw suma yatiyäwinakxa istʼapxani sasaw Bibliax nayratpach satayna (Apo. 14:6, 7). Ukhamax taqini mayachtʼata irnaqañäni ukhaxa, janiw walja tamanakatxa pachp utar visitkañäniti, ukat yaqha arunaksay parlapxchixa, walja jaqinakarurakiw suma yatiyäwinakxa puriyarakiñäni (Efe. 4:16).