¿Kunjamatsa anqäx markat jutiri yaqha aru parlirinakarux yanaptʼsna?

1. ¿Tamasamp chika yatiykasax khitinakarus jikxataraksna?

¹ “Taqi markanakan yatipxañapataki[w]” suma yatiyäwinakax Uraqpachan yatiyasini sasaw Jesucristox säna. Jichhürunakanxa, arkirinakapax uka arunakapar istʼasaw jaqinakarux yatiyasipki ukat yatichasipkaraki (Mat. 24:14; 28:19, 20). Yatiykasax anqäx markat jutiri yaqha aru parlir jaqinakaruw jikxatsna, jupanakax Jehová Diosan jachʼa urup janïr purinkipan Diosan Apnaqäwipat suma yatiyäwinak istʼapxañapaw wakisi, ukat chiqa yatichäwi tuqit saytʼasipxatapsa uñachtʼayapxañaparaki (Mal. 3:18). Tamasax yatiyki uka chiqanakan anqäx markanakat jutiri, yaqha aru parlirinakaruxa, ¿kunjamatsa yatiysna?

2. Jehová Diosat yatiqasisaw yaqha arut parlirinakar yatiytanxa, ¿kunjamanakatsa uk lursna?

² Diosax kunjamtï jupanakar uñjki ukham uñjapxarakiñäni. Jehová Diosax taqi kasta jaqinakaruw munasi, ukatwa Jupat yatiqasisax kunayman arut parlir jaqinakar Jupar sum uñtʼapxañapatakix taqi chuyma yanaptʼañ muntanxa (Sal. 83:18; Hech. 10:34, 35). Chiqansa, tamasan kuna arutti yatiyktan uka arut parlir jaqinakaruw jukʼamp yanaptʼañ muntanxa, ukampis anqäx markat jutiri yaqha arut parlirinakarux Diosan Apnaqäwipat suma yatiyäwinakxa yatiyañasarakiwa. Yaqha arut parlirinakaru jan yatiyksnaxa, janiw walïkaspati, kunattix taqi kasta jaqinakar yatiyasiñapwa Diosax muni. Ukhamasti, ¿kunjamatsa jupanakar yanaptʼsna?

3. ¿Kawkïr qillqatas yanapistaspa, ukat kunjamsa ukamp yatiyañatakix wakichtʼassna?

³ Buenas nuevas para gente de todas las naciones sat folletow yanapistu. Yatiykasax yaqha arut parlirinakar jikxatsna ukhaxa, uka folletow yatiyañatakix yanapistaspa, kunattix uka amtamp wakichtʼatawa. Apxartʼasiwayañamapuniwa, sum uñtʼañamawa ukat ukamp yatiyañatakis wakichtʼatäñamarakiwa. Yatiyktan uka chiqanakan kuna arunakatsa parltʼasipxi uk jikxatañax jan chʼamäñapatakix uka folletxa chimptʼasiñamawa. Folletot liytʼayxasax Bibliat apstʼat qillqatanakax uka arut utjasp ukhaxa, mä qhawqha qillqatanak aparapiñax wali askipunispawa.

4. ¿Kunjamsa Naciones sat folletompi yatiysna?

⁴ Yatiykasax yaqha arut parlirir jikxatasma ukat kuna arutsa parlxaytʼasktam uk janirak amuykasma ukhaxa, folleto janatattʼasin tapap uñxattʼayañamawa. Ukxarusti, juma pachpa señaltʼasisax kuna markans jakassta uk uñxattʼayäta, ukatxa utanir señaltʼasaxa kuna markatasa kuna aruts parltʼasi uk yatxatañamaraki. Uk yatxatasinxa, índice siski uk thaqtasax kuna janansa uka arut yatiyasiski uk thaqhañamawa, uka janan nayrïr tʼaqapa, chʼiyar letranakampi qillqxattʼatäki uk liytʼañapatakiw uñachtʼayañama. Liytʼañ tukuyxani ukhaxa, arupat qillqtʼat mä tratado churäta, jan ukasti “kusisisawa juman arumat qillqatanaka apanirapiriksma” siski uka chiq uñxattʼayasma. Ukxarusti, “nayan sutij” siski uka chiq uñxattʼayasax sutim yatiyäta. “Juman sutimaxa” siski uk uñxattʼayasax kamsanis uk sum istʼarakïta. Ukat kunapachas wasitat visittʼäta uk amtxañamarakiwa.

5. ¿Yaqha arut parlirinakaru sum yanaptʼañatakixa, ¿kun lurañasas wakisispa?

⁵ Yatiqañ munirinakarux yanaptʼañasawa. Maynix kuna arunikspansaya Diosan Apnaqäwipat yatiqañ munirinakarux wasitat visittʼañatakix chʼamachasiñasawa. Diosatsa Bibliatsa maynix yatiqañ munaspa ukhaw Sírvase visitar (S-43) sat formularior qillqtʼasin jankʼaki tamamankir secretario jilatarux churañama, jupaw sucursalarux apayxani. Ukat sucursalax uka arut parlir gruporuw apayxarakini. Kunapachatï tamax uka formulario katuqxi ukhaxa, jankʼakiw uka jaqir jikxatañatakix amtxaraki. Chiqansa, secretario jilatax yatiyañ tuqit irpir chuymani jilatarux mä copia churañapaw wakisispa, ukhamatwa uka jilatax yaqha arut parlirinakax Bibliat yatiqañ munapxatap yatirakini. Ukampis ak amtañamawa, Bibliat wal yatiqañ maynix munaspa ukhakiw uka formulariorux qillqtʼasiñapa.

6. Yaqha arut parlirinakax Bibliat yatiqañ munapxaspa ukhaxa, ¿kun lurañasas wakisispa?

⁶ Ukampis formulario S-43 apayaski ukkhat uka arut parlir yatiyirix pachpa arut parlir jaqiru visittʼañapkamax mä qhawqha tiempow pasaspa. Ukäñkamax Bibliat yatiqañ munaskakiñapatakix visittʼaskakiñamawa. Bibliat inas yatichañ qalltchisma. Ukampisa, ¿kunjamatsa arupat qillqtʼat qillqatanak aparapisma?

7. ¿Kunjamatsa yaqha arut parlirinakar yanaptʼañatakix qillqatanak jikxatsna?

⁷ Yaqha aru parlirinakataki qillqatanaka. Tamanakanxa yaqha arut qillqatanakax janiw walj utjañapäkiti. Ukampisa, yatiyañ tuqit irpir chuymani jilatatï yaqha arut parlirinakax Bibliat yatiqañ munapxatap amuyaspa ukhaxa, uka arut Bibliat apstʼat qillqatanak mä jukʼa utjañapatakiw amtarakispa. Uka qillqatanakax taman jan utjkaspa ukhaxa, mayisirakispawa. Ukampisa, yaqha arut qillqatanakax janiw jankʼak purinkaspati, ukatwa yaqhip jilat kullakanakax Internetan www.watchtower.org, siski uka chiqat wakiskir yatichäwinak imprimtʼapxaraki, uka chiqanwa yatiyirisa jan ukax Bibliat yatxatañ munirisa walja arunakar qillqat qillqtʼatanak facilak jikxatapxaraki. Chiqpachansa ukaw yaqha arut parlirinakar yanaptʼañatakix yanapistani.

8. ¿Kunjamatsa tamankirinakax yaqha aru parlirinakarux yanaptʼapxarakispa?

⁸ Tamax yanaptʼarakispawa. Awisax anqäx markat jutir yaqha arut parlir jaqinakaw mä chiqanx wal jilxattaspa, ukampis uka jakʼan tantachäwinakax uka arut jan utjkaspa ukhaxa, tamasan tantachäwinakapar jutapxañapatakiw jupanakar jawstʼañasa. Chiqpachansa, jupanakar jakachtʼasisax wali munasiñampi katuqtʼañäni ukhaxa, tantachäwinakar jutañxa munasipkakiniwa. Qalltanxa inas yaqha aru parlirïtapata, mayj saräwinïtapat jupanakamp jan parltʼañjamäkchispa, ukampis Jehová Diosan Qhanañchirinakap taypinxa chiqpach munasiñaw utji, janipuniw uka munasiñarux kunas jarktʼkaspati (Sof. 3:9; Juan 13:35). ¿Jumax yaqha arut sum parltʼañ yattati? ¿Uka arut parltʼirinakar visittʼañ munasmati? Ukhamächi ukhaxa, tamamankir secretario jilatampiw parltʼañama, ukhamat juman yanaptʼañ munatamxa sucursalar yatiyxañapataki. Uk yatiñaw sucursalarux yaqha arut parlirinakar khitis yanaptʼani uk jikxatañ yanaptʼarakini.

9. ¿Kunapachas yaqha aru yatichañataki yatichäwinakax utjaspa, ukat kunjam wakichtʼasiñapasa?

⁹ Yaqha aru yatiqañataki yatichäwinaka. Yaqha arut parlirinakar yanaptʼkasaxa, ‘juman arumat yatichaski uka taman tantachäwinakapar sarañamax wali askipunispawa’ sasaw chʼamañchtʼañasa. Jan sarirjamapunïpkaspa ukhaxa, yaqhip yatiyirinakax yatiqañ munirin arupwa yatiqañ amtapxaraki ukhamat jupanakar yanaptʼaskakiñataki. Janitï uka chiqan uka arut yatiyir tamax utjkaspa ukat anqäx markat jutirinakasa jan ukax pachpa markankir yaqha arut parlirinakasa waljtʼatäxaspa ukhaxa, sucursalaw uka arunakat yatiqapxañapatakix yatichäwinak wakicharakini. Ukatxa uka chiqankir tamanakarux kuna arutsa yatichasiñapax wakisi ukat kunatsa uk yatiyaskani, ukat tamanakan mä yatiyäwi liytʼasiñapatakis apayaskarakini. Yaqha aru yatiqañ munapki ukanakax uka arut yatiyir taman jan ukax grupon tantachäwinakapar sarxañwa amtapxañapa, ukhamat yaqha arut parlirinakaru kunjamsa yatiyasini uk wakichtʼañ yanaptʼapxañapataki.

10. ¿Kunapachas anqäx markat jutiri yaqha arut parlirinakar yanaptʼañatakix mä grupo uttʼayasiñapa, ukat kunanakas ukatakix wakisi?

¹⁰ Mä grupo uttʼayañataki. Yaqha arut parlirinakar yatiyañataki mä grupo uttʼayañatakix akanakaw wakisi: 1) Anqäx markanakat jutiri yaqha arut parlir jaqinakatxa, Bibliat yatiqañ munirinakax waljpachaw utjañapa. 2) Uka arut yatiyirinakasa jan ukax uka arut yatiyañataki yatiqirinakas mä qhawqhas utjañapawa. 3) Uka grupo uñjañapataki ukat semanan may kutsa uka arut mä tantachäw sarayañapatakix irpir chuymani mä jilatasa jan ukax irpir chuymaninakan mä yanapiripas utjañapawa. 4) Mä tamankir irpir chuymani jilatanakaw uka grupor uñjañapatak utjañaparaki. Ukanak phuqasxi ukhaxa, tamankir irpir chuymaninakax sucursalaruw qillqtʼapxi uka grupot jukʼamp yatiyxañataki, ukatxa tamax uka grupor uñjañataki sutiñchtʼatäxañapataki mayipxaraki (Organizados sat libro, 106 ukat 107 jananak uñxattʼäta). Kawkïr irpir chuymanitix jan ukax irpir chuymaninakan yanapiripat uka grupo uñjañapataki uttʼayatäkani ukaxa “grup uñjiri” jan ukax “grup uñjañ yanapiri” ukham uñtʼatäpxarakiniwa, jupanakaw kunanakas uka grupon munasi uk uñjapxani.

11. Tamasax kawkha chiqanakantï yatiyki uka chiqanakan anqäx markat jutiri yaqha arut parlirinakar yatiyañax mä suma churäwipuniwa, ¿kunatsa ukham sistanxa?

¹¹ Tamasax kawkha chiqanakantï yatiyki uka chiqanakan anqäx markat jutir yaqha arut parlir jaqinakar yatiyañax wali wakiskiripuniwa, Jesusaw ukham yatiyañ qalltawayäna jupat yatiqasisax Uraqpachanwa yatiyaskaraktanxa. Jehová Diosaw taqi markanakat suma chuyman jaqinakar ajlliskaraki, ukäñkamax taqiniw suma yatiyäwinak yatiyasiñapatakix taqi chuyma yanaptʼañ muntanxa (Ageo 2:7, NM). ¡Uka luräwir taqi chuyma yanaptʼañaw wal kusisiyistu! Tamasax kawkha chiqanakantï yatiyki, uka chiqanakan anqäx markat jutiri yaqha arut parlir jaqinakar yatiyañataki chʼamachasitasarux Jehová Diosax bendispan. Ak amtapxapuniñäni, maynix yaqha arut parliriskpansa, ¡Diosaw jiltayaskani! (1 Cor. 3:6-9.)