Yaqha aru parlir jaqinakaru suma yatiyäwinak yatiyapxañäni
1. Yatiyir sarkasaxa, ¿kuna jan waltʼäwinakas utjaspa?
1 Jichhürunakanxa, yaqha arunak parlir jaqinakaw jachʼa markanakanxa jakasxapxi. Ukat yaqhip comunidadanakansa ukhamarakiwa. Uka jaqinakaruxa, Diosan Apnaqäwipan yatiyäwinakapatxa yatiyapxañasarakiwa (Apo. 14:6). Ukat yatiyir sarkasax yaqha arunak parlir jaqinakampi jikistan ukhaxa, janiw yatiyañjamäkiti, awisax kunayman jan waltʼäwinakanwa uñjasiraksnaxa, ukatakiw aka yanaptʼanakaxa.
2. ¿Kuna amtampis yatiyir sartanxa?
2 Criston arkiripäpxañapatak yanaptʼapxañäni. Amtapxapuniñäni, yatiyir sarkasaxa, jaqinakar Criston arkiripäpxañapatak yanaptʼiriw sartanxa, mä arunxa, chiqa yatichäwinakat yatichiriw sartanxa (Mat. 28:19, 20). Ukhamax kuna arutsa sum amuytʼaspa uka arutwa chiqa yatichäwinakax yatichasiñapa (1 Cor. 14:9). Ukampis awisax janiw ukham lurañjamäkiti. Yaqhip chiqanakanxa, mä tamakiw utji ukat uka chiqanakanxa yaqha aru parlir jaqinakaw jakasipxaraki. ¿Kunjamatsa chiqa yatichäwinak yatxatapxañapatakix uka jaqinakar yanaptʼasispa?
3. Yaqha aru parlirinakaruxa, ¿kunjamsa suma yatiyäwinak yatiysna?
3 Yaqha aru parlir jaqin utapar visittʼäta ukhaxa, Buenas nuevas para gente de todas las naciones sat folletompiw parlxayasma. Ukhamatwa mä jukʼsa yatichtʼasma, ukhamarak chiqa yatichäwinak yatiqañ muniti janicha uksa amuytʼxarakisma. Jukʼampi yatxatañ munatap amuyäta, ukat jupan arupat qillqatanakax utjstam ukhaxa, churañamawa. Ukatxa, tamam jakʼan uka arut parlir tamax utjiti uk yatiñatakixa irpir chuyman jilatanakaruwa jisktʼasma, wakisini ukhax tamanak tumptʼir jilatarusa jisktʼarakismawa. Inas uka tamankir mä jilatas jan ukax mä kullakas yatiqañ yanaptʼchispa. Jan ukham lurañjamäkaspa ukhaxa, inas tamaman uka aru parlir mä jilatas jan ukax mä kullakas utjaskchi, jupaw yatiqañapatakix visittʼarakispa. Amparampi parlir jaqinakaruxa ukham yanaptʼasiñaparakiwa.
4, 5. Yatxatañ munir jaqin arupat jan kuna tamas utjkchi ukhaxa, ¿kunjamsa Criston arkiripäñapatakix yanaptʼsna?
4 Ukampis markasan janipuni uka aru parlir jilatas jan ukax kullakas utjkaspati ukhaxa, ¿kamachsnasa? Yaqhip yatiyir jilat kullakanakaxa, ukhaman uñjasisasa yatiyañatakix chʼamachtʼasisipkakiwa, ¡Wiñayan wiñayapataki kusisita aka Uraqin jakasim! sat folletompiw yatichapxi. Ukat uka qillqatax uka jaqin aruparjam lurat utjxchi ukhaxa uka qillqatampi yatichañax wali askïniwa. Uka qillqatankki uka dibujonak uñxattʼayañäni ukat Bibliat apstʼat jiskʼa tʼaqanakat liytʼayañäni ukhaxa, Biblian qallta yatichäwinakapsa yatiqarakiniwa. Jan ukaxa, inas familiapan khitis arusat parlañ yatchi, jupaw kun sañs muntan uk qhanañchaspa.
5 Diosat yatxatañ munir uka jaqin arupat cristiano tantachäwinakax markaman jan utjkchi ukhaxa, jumax kawkins tantachasta ukaruw irpañama. Jilat kullakanakampi jikisiñawa jupar yanaptʼaspa; ukat jukʼampi yatxatasin Diosar jukʼampi jakʼachasiskakiñatakixa arusat parlañsa yatiqarakispawa (Mat. 18:20). Amtapuniñäni, Criston arkiripäpxañapatakiw yatiyir sartanxa.
6. Kawkja lugaranakantï yaqha yaqha arunaka parlapxi uka chiqanakanxa, ¿kunjamsa sum yatiyañatakix wakiyasipxaspa?
6 Yaqha arunaka parlir jaqinakaru yatiyañatakix kunjamsa irnaqsna. Mä tamax kawki chiqanakansa yatiyañapa uka chiqanakanxa paya, kimsa jan ukax ukats jila tamanakaw uka chiqanak yatiyirix sarapxaraki. Ukhamächi ukaxa, mä tamax kuna aru parlir jaqinakar yanaptʼañataki uttʼayatasa, ukarjamaw irnaqapxañapa, uka ar parlir jaqinakaru yanaptʼañatakiw chʼamachasiñapa. Chiqansa, awisax kikpa utaruwa pä tamat jutir jilat kullakanakax visittʼapxi. Ukampisa, sapa tamankir jilïr chuyman jilatanakawa ukat uka chiqanakankir tamanakawa sum aruskiptʼasin yatiyasipkaraki, ukhamat kuna arutti suma yatiyäwinaka sum amuytʼkaspa ukarjam yatichasa. ¿Kunjamsa lurapxi? Kawkjansa uka jaqix jakasi uka direccionwa uka jaqin arupat parlir tamarux apayapxi (Fili. 2:4). Ukat uka chiqanakan yatiyirinakaxa, kawki chiqsa tamapax yatiyani ukxa sum amuyapxañapa: kuna arsa uka chiqanakan jakasir jaqinakax parlapxi ukarjam yatiyapxañapatakiw mä tamarux territoriox churasi. Ukhamaxa, wali amuytʼampiw uka chiqanakanxa irnaqapxañasa. Kawkïr utanakantï yaqha aru parlapki ukhaxa, uka utanakan direccionapxa uka aru parlir tamaruw apayapxañasa, ukhamat uka aru parlir jilat kullakanakax uka utar visittʼapxañapataki. Ukhamarjam lurasawa, yatiyirinakaxa qillqatanak katuqasirinakaruxa chiqa yatichäwinak sum yatichapxani, ukat kawkïr tamarus sarañapa uksa yanaptʼapxarakini.
7. Yaqha arunak parlir jaqinakaru yatiyañatakixa, ¿kunjamsa uka tamanakankir irpir chuyman jilatanakax wakiyasipxarakispa?
7 Yaqhip tamanakax kuna arsa parlapxi uka jaqinakan direccionapwa mä listar wakichapxi, ukaw jupanakar wal yanaptʼi. Ukat uka lugarankir yaqha tamanakaxa kawkïr utanakarusa jan visitañäxi uka direccionanakwa mä listar wakiyapxaraki. Ukhamat yaqha yaqha tamat jutir yatiyirinakax jan pachpa utar kuttʼapxañapataki. Ukat yaqhip lugaranakanxa, Bibliat yatxatañ munir jaqinakax kawki tamarus sarañapa uk sum lakjañataki ukat taqinir sum yatiyañatakixa uka chiqankir tamanakaw aruskiptʼapxaraki. Sucursalatakix ukham lurañax walikïskiwa, kunattix janiw uka tuqit akhamapunïñapaw sañax utjkiti (1 Cor. 14:33, 40).
8. Yaqha aru parlir jaqimpi jikisiñäni ukhaxa, ¿kunjamsa suma yatiyäwi istʼañapatakix yanaptʼsna?
8 Ukat kunapachatï yatiykasax jan istʼir uqar jaqiru jikxatäta ukhaxa, jan ukax yaqha aru parlir jaqir jikxatäta ukhaxa, Sírvase visitar (S-43) sat formularioruw wali qhana qillqantañama. Bibliat yatxatañ jan munkchi ukhasa uka formulariorux qillqantaskakiñamawa. Sutip jan yatiñjamäkchi ukhasa, kawkjansa utjasi ukhamaraki kuna arsa parli uksa qillqantaskakiñamawa. Uka qillqatxa Tantachasiñ Utan informenak apthapiñ cajaruw apantxarakïta. Secretario sat jilatawa uka qillqatamxa apsxani, ukat suma qillqtʼatati janicha uk uñxattʼasinxa kawkïr jakʼankir tamansa uka aru parlapxi uka tamaruw apayxarakini.
9. Yaqha aru parlir jaqi masisar yatiyañatakixa, ¿kunjam jaqïñas yanaptʼistani?
9 Taqinitix yanaptʼapxañäni, ukat amuytʼirïpxañäni, ukat Tatitun uwijapar yanaptʼañ layku jan kun suyasa jupanakat llakisipxañäni ukhaxa, uka jaqinakar yanaptʼarakiñäniwa (Juan 13:34, 35; Fili. 2:14; Sant. 3:17, 18). Kawkja lugaranakantï yatiyktan uka uwijanakjam suma chuyman jaqinakat llakisipxañäni ukat Cristor arkiripäpxañapataki yanaptʼañ layku sarktan uksa amtapxapuniñäni ukhaxa, taqi markankir ukhamaraki taqi kasta parlasiri walja jaqinakaruw jiwasanakamp chika Jehová Diosar yupaychapxañapatakix yanaptʼapxañäni (Isa. 2:2, 3).