Reino toqet yatiyañjamäki ukhajj yatiyañamapuniwa
1. ¿Kunsa David reyit yateqassna?
1 David reyejj kunanaktï lurañ munkäna uk jan phoqasjjepanjja, janiw aynachtʼkänti. Amtañäni, Jehová Diosar yupaychañatakiw mä uta lurayañ munäna, ukampis janiw lurayapkänti. Ukhamïpansti, Salomón yoqap lurañapatakiw kunatï utachañatak munaskäna taqe ukanak wakichtʼäna (1 Rey. 8:17-19; 1 Cró. 29:3-9). Jupajj kuntï jan lurirjamäkäna ukak amtaskañat sipansa, kuntï lurirjamäki uk lurañaruw uchasïna. ¿Kunjamsa jupat yateqasisajj Reino toqet yatiyapunsna?
2. ¿Kunsa amuykiptʼasiñasa?
2 Kuntï lurirjamäkta ukwa lurañama. Walja jilat kullakanakajja, precursor auxiliarjam jan ukajj regularjam serviñatakejj kunatï wakiski ukampikiw jakasjjapjje (Mat. 6:22). ¿Jumajj ukham lurarakismati? Jehová Diosar maytʼasisa ukat lurirjamätati janicha uk sum amuykiptʼasisajj jumatak ‘mä wakichata jachʼa punku jistʼarasitap’ inas amuychïta. Ukhamänejja, jankʼakiw lurañama (1 Cor. 16:8, 9, MT).
3. Jiwasatï precursorjam jan servirjamäkstan ukhajja, ¿kunjamsa yatiyañatak chʼamachassna?
3 Precursorjam jan servirjamäkstan ukhajja, ¿kuns lursna? Kunanaktï lurirjamäktan ukwa amuytʼasiñasa. Sañäni, Diosar jan loqtirinakampi trabajstan ukhajja, jupanakamp parlañjamäni ukhajj Diosan arunakap ¿yatiysnati? Jumatï usutästa ukhajja, ¿hospitalan irnaqapki ukanakar janit yatiykasma? Wali usutäpki jan ukajj chuymankipstatäjjapjje ukanakajj 15 minutonakaksa informapjjaspawa. Informe papilar phajjspachat qellqtʼaskasajja, kuna qellqatanaksa jaytta, qawqha tratadsa churta, Jesusan jiwäwip amtañatak jan ukajj kimsa uru jachʼa tantachäwitaki qawqha invitacionsa lakirta ukat kawkhankkasas yatiykta ukanak qellqtʼasiñsa janiw armasiñamäkiti. Ukham mä jukʼa chʼamachasitamajja, jakthapitajj waljaptaspawa.
4. ¿Kun lurañsa muntanjja?
4 Kunjamanakansay jikjjataskstanjja, suma yatiyäwinak yatiyañjamäki ukhajj yatiyapuniñäni. Ukhamatwa Reino toqet yatiyañataki taqe chuyma chʼamachasitasat kusisitäñäni (Mar. 14:8; Luc. 21:2-4).