¿Jukʼampi lurañataki ‘jistʼarata jachʼa punkur’ mantasmati?
1. ¿Kuna ‘jachʼa punkusa jukʼampi lurañataki’ jiwasanakatak jistʼarasi?
1 Kunapachatï apóstol Pablotakix ‘mä jachʼa punkux’ jukʼampi lurañataki jistʼarasirapïna ukhaxa wali kusisitaw Diosan Apnaqäwipat yatiyir saräna, uñisirinaka utjkipansa parlaskakïnwa (1 Cor. 16:9, MT). Jichhürunakanxa, mä 642.000 Diosan Apnaqäwipat qhanañchirinakaw jukʼampi lurañataki jachʼa punkuru mantasipki, precursor regularjam irnaqtʼasa.
2. Diosatak jukʼampi irnaqañatakixa, ¿kunatsa sapa kuti sum amuytʼasipxañasax wakisi?
2 Jakäwisan luräwinakasax mayjtʼaspawa: Inas jumatakixa, jichhax jan jukʼampi Diosatak lurañjamäkchi, ukampisa ukax mayjtʼaspawa. Ukatwa sapa maynix sapa kuti sum amuytʼasipxañasaxa, janiw tiemponïñaki suyañasäkiti (Ecl. 11:4). Waynaskstaxa, ¿niyat colegio tukuyxäta? Awk taykanaka, ¿wawanakamax niyat yatiqañ utar sarxapxani? ¿Niyat irnaqäwimat jubilasxäta? Ukhamäspa ukhaxa, jukʼampi tiemponïsmawa precursor regularjam irnaqtʼañatakixa. Mä kullakax usupat kʼumaraptxasinxa 89 maraniw precursor regularjam irnaqañ qalltäna. ¿Kunatsa? Kunattix waliptxänwa mara jilaw jan hospitalankxänti, ukatwa precursorjam irnaqañatak amtatayna.
3. Yaqhip jilat kullakanakaxa, ¿precursor regularjama irnaqtʼañatakix kamachapxisa?
3 Apóstol Pabloxa, Corinto markankir jilat kullakanakapar tumptʼir sarañatakiw amtäna, ukampisa suma yatiyäwinaka apañ laykuxa tiempo apstʼasïnwa. Ukhamarakiw walja jilat kullakanakax precursor regularjam irnaqtʼañatakix tiemp apstʼasipxi. Yaqhipanakax jakäwinakapan walja luräwinakapwa jaytjxapxi, kunatï jakañatak wakiski ukatakikiw irnaqxapxi. Precursor regularjam irnaqañax jupanakatakix wali kusiskañawa (1 Tim. 6:6-8). Jaqichat yaqhip jilat kullakanakaxa mayniki irnaqañapatakiw amtapxi, ukhamat warmix precursorjam irnaqañapataki.
4. Horanak precursoräsin jan phuqirjam amuyastaxa, ¿kun lurañas wakisispa?
4 Janiw horanak precursoräsin phuqkiristi sasax janiw axsarayasiñamäkiti. Sapür pä hora jila irnaqtʼasax phuqasmawa. Jan phuqirjam amuyasstaxa, 70 hora phuqañ amtasawa precursor auxiliarjam mä phaxsis jan ukax pä phaxsis yantʼasma. Ukhamatwa kunja kusisitas precursoranakax irnaqtʼapxi uk amuytʼäta (Sal. 34:8). Precursoranakampirakiw parltʼasma; inas jupanakax jumjam axsarayasipxarakchïna (Pro. 15:22). Jukʼampi yatiyir sarañataki chʼamachasitama bendiciñapatakix Jehová Diosar mayisiñamapuniwa (1 Juan 5:14).
5. ¿Kunatsa precursoräñax wali suma amtäwiwa sasax sisna?
5 Precursoräñaxa wali suma amtäwiwa: Precursor regularjam irnaqasaxa walja bendicionanakwa katuqtanxa. Ukham churasaxa jukʼampi kusisiñ jikxattanxa (Hech. 20:35). Precursoräsinxa Diosan arunakapa chiqapar apnaqañwa sum yatiqäta (2 Tim. 2:15). Jehová Diosan yanaptʼapxa jukʼampi uñjäta (Hech. 11:21; Fili. 4:11-13). Aguantaskakïñwa yanaptʼätamxa, ukatxa Jehová Diosar jukʼampi jakʼachasirakïta (Sant. 4:8). Ukhamasti, ¿walja lurañataki jistʼaraski uka punkur precursor regulärjam irnaqtʼañataki mantätati?