“Jumax wali suma precursorapunïsmawa”

1. Precursorjam irnaqtʼatapatxa, ¿kunsa mä kullakax säna?

¹ “Janiw kuna irnaqäwis ukham kusisiñ churkitaspänti, ni Diosar yupaychäwijans jukʼamp yanaptʼkitaspänti” sasaw Kathe B. Palm sat taqi chuym walja maranak Chile markan mä thiyat mä thiykam irnaqtʼir mä precursorax säna. Kunja kusisitas Diosatak sapür irnaqtʼirinakax jikxatasipxi uk amuytʼasax inas maynix jumar akham sisstam: “Jumax wali suma precursorapunïsmawa” sasa.

2. Kunatsa Jehová Diosatak irnaqtʼañax wal kusisiyistu, uk qhanañchtʼma.

² Kusiskañ irnaqäwi. Jesusarux Awkipan munañap lurañaw kusisiyäna ukat chʼamañchtʼarakïna (Juan 4:34). Ukatwa Jehová Diosatak taqi chuyma irnaqtʼasakiw chiqpach kusisiñ jikxatsna sasin arkirinakapar yatichäna. Chiqansa, Diosatakix kuna luräwinakatï askïki ukanak lurasaw kusisit jikxatastanxa. Ukat kunapachatï tiempo, chʼama ukat yänakas jaqi masisar yanaptʼañatak churtan ukhaxa, jukʼamp kusisiñwa jikxattanxa (Hech. 20:31, 35).

3. Diosan arunakapat jukʼamp yatiyasaxa, ¿kuna kusiskañanaksa jikxatsna?

³ Diosan arunakapat jukʼamp yatiyasawa, maynix Bibliat waljanir yatichañ qalltaspa ukat qhiparux yatichxarakispa, ukaw maynirux jukʼamp kusisiñ churi. Qalltan inas jaqinakax janis istʼañ munapkaspa ukham amuychïta, ukampis tiempompix jukʼamp yatxattʼatäxäta ukhax kawkjantï yatiykta uka chiqanakan Bibliat yatiqañ munirinakax walj utjaskatap amuyxarakïta. Ukat precursorjam mä mar irnaqxäta ukhaxa, Escuela del Servicio de Precursor satäkis ukanwa jukʼamp sum yatiyañatakix yatiqäta, ukaw Diosat yatiyir sarañamatakix jukʼamp yanaptʼarakïtam (2 Tim. 2:15). Chiqa yatichäwinak yatiyañatak chʼamachasiskakïta ukhaxa, tiempompix suma askinakwa jikxatarakïta (Ecl. 11:6).

4. Yatiqañ utan niy tukuyañampïpki uka wayn tawaqunakaxa, ¿kuns amuytʼasipxañapa?

⁴ Wayn tawaqunaka. Jumatï yatiqañ utan niy tukuyañampïxsta ukhaxa, ¿kunsa tukuyasax luräta, uk amuytʼasxtati? Anchhitkamaxa escuelan kuna tareanakamatï lurañamäki uk tukuyasakiw tiempomax utjtamxa. Escuela tukuyxasaxa, tiempomax utjxätamwa, ukham tiemponïxasax ¿kuns luräta? Mä suma irnaqäwinïñataki jachʼa yatiqañ utanakan yatiqaskañat sipansa, ¿Diosat mayisisax janit precursor regularjam irnaqtʼañ amtkasma? Taqi kast jaqinakar yatiyaña, kunanakas jumar jarkʼtam ukanakar atipjaña, taqi kuns sum amuytʼasis luraña ukat sum yatichañatak chʼamachasiñasa jakäwimanx yanaptʼapunïtamwa.

5. ¿Awk taykanakasa jilat kullakanakas kunjamatsa wayn tawaqunakarux precursorjam irnaqtʼapxañapatakix yanaptʼapxaspa?

⁵ Awk taykanaka, ¿wawanakamax Diosar sapür luqtañ amtapxañapatakix yatichasipktati? Arunakamasa ukat jumatakix Diosan arunakapat yatiyañax nayrankatap amuyasaw wawanakamax uka kikpa lurañ munapxarakini (Mat. 6:33). Ray sat mä jilatax yatiqañ utan tuktʼayasaw precursorjam irnaqtʼañ qalltäna, jupax akham sasaw qhanañchi: “Mamitajax precursorjam irnaqtʼañax wali kusiskañaw sapunirïnwa” sasa. Ukat wayn tawaqunakax precursorjam irnaqtʼapxañapatakix jilat kullakanakaw arunakapampi ukat yaqha tuqinakat yanaptʼapxarakispa. España markankir José jilatax akham siwa: “Tamajankir jilat kullakanakaxa, precursorjam irnaqtʼañax wayn tawaqunakatakix wali suma irnaqäwipuniwa sasaw sapxirïna. Uka suma arunakapasa, precursorjam irnaqtʼañar wali askirjam uñjapxatapasa ukat ukarjam yanaptʼapxatapaw precursorjam irnaqtʼañ qalltañajatakix yanaptʼawayitu” sasa.

6. ¿Precursorjam janïr irnaqtʼañ munksta ukhax kuns lurasma?

⁶ Kunanakas jarktʼistaspa. Inas maynix akham sischispa: “Chuymajanxa precursorjam irnaqtʼañ munañax janiw utjkituti” sasa. Ukham amuysta ukhaxa, kunjamatï jikxataskta ukxa Jehová Diosar akham sas yatiyam: “Precursorjam irnaqtʼañax inas jan nayatakïkchiti uk janiw amuyaskti, ukampis kunatï Jumatak askïki uk lurañ munta” sasa. (Sal. 62:8; Pro. 23:26). Ukxarusti, Diosan Arupampi ukat markapampiw yatichayasiñamaraki. Walja precursor regularanakaw nayraqat precursor auxiliarjam irnaqtʼañ “yantʼapxi”, ukat wali kusisit jikxatasisaxa, precursor regularjam irnaqtʼañatakiw amtawayxapxi (Sal. 34:8).

7. 70 horanak jan phuqirjam amuyasïta ukhaxa, ¿kuns lurasma?

⁷ Yaqhipanakax sapa phaxsi 70 horanak jan phuqirjamäsaw axsarayasipxaraki. ¿Janit jumjam jikxatasipki uka precursoranakamp parltʼkasma? (Pro. 15:22.) Ukxarusti, kunjamatsa sapa phaxsi uka horanak phuqasma uk amuytʼañamawa. Ukat inas yaqha luräwinakat tiempo apstʼasin uka horanak phuqañax jan chʼamätap amuyaschïta (Efe. 5:15, 16).

8. ¿Kunatsa jakäwisan kunanakas mayjtʼaski uk amuykiptʼasiñasax wali askixa?

⁸ Jakäwiman kunanakas mayjtʼi uk amuykiptʼam. Jakäwisanx kunas mayjtʼapuniwa, ukatwa kunanakas mayjtʼaski uk amuykiptʼañasax wali askixa. Amuytʼañataki, ¿akat mä jukʼa tiemporux jubilasiñti amtaskta? Randy sat jilatax jubilasiñat nayrstʼänwa, jupax akham siwa: “Ukham amtatajatwa warmijamp chika precursor regularjam irnaqtʼañ qalltawaytxa, ukat kawki chiqanakantï yatiyirinakax munaski uka chiqaruw sarxapxayäta. Walja bendicionanakwa katuqawaytxa... ukampis suma conciencianïñaw taqi kunat sipans wali jachʼa bendicionaxa” sasa.

9. ¿Chacha warminakax kuns amuykiptʼasipxañapa?

⁹ Yaqhip chacha warminakaxa, sumpach amuykiptʼasisinxa, paninpach irnaqtʼañax jan wakiskirïtap amuytʼasipxi. Chiqasa, ukham lurañatakix familiax kunatï wakiski ukampik jakasiñ amtapxañaparaki, ukampis ukham lurañax wali askipuniwa. Jichhakiw John jilatan warmipax Diosatak jukʼamp irnaqtʼañ laykux irnaqäwip jaytawayi. John jilatax akham siwa: “Warmijan Jehová Diosatak sapür irnaqtʼaskatap yatiñax walpun kusisiyitu” sasa.

10. ¿Kunatsa cristianonakax precursorjam irnaqtʼañ munapxi?

¹⁰ Diosar munasitasat ukat iyawsäwinïtasatwa taqi chuyma irnaqtanxa. Diosan arunakapat yatiyañaw jiwasatakix taqi luräwinakat sipans wali wakiskirixa, kunattix Jehová Diosaw uk amtawayi. Akat mä jukʼa tiemporuxa, aka ñanqha pachax tukjatäniwa ukat khitinakatï Jehová Diosan sutip aytapki ukanakakiw qhispipxani (Rom. 10:13, NM). Jehová Diosarutï taqi chuyma munasiñäni ukat kuntï jiwas layku lurawayki uk yuspärañäni ukhaxa, kuntï Jesusax taqi jaqinakar yatiyanipxam sasin sawaykistu ukarux taqi chuymaw phuqarakiñäni (Mat. 28:19, 20; 1 Juan 5:3). Qhipa urunakankxatas sum amuytanxa, ukatwa akapachan munañaparjamak sarnaqañat sipansa, janïr akapach tukuskipan Diosan arunakapat taqi chuyma yatiyañatak chʼamachastanxa (1 Cor. 7:29-31).

11. Jumax wali suma precursorapunïsmawa sasin sapxiristam ukhaxa, ¿kamachasmasa?

¹¹ Jehová Diosan markapax precursor regularjam irnaqtʼapxañasatakiw chʼamañchtʼistu, ukampis janiw ukar istʼasakix precursorjam irnaqktanti, jan ukasti Diosar taqi chuyma luqtañ munasaw ukham irnaqtanxa. Maynitï: “Jumax wali suma precursorapunïsmawa” sasin siristam ukhaxa, uk istʼasax kusisiñamawa. Jehová Diosar mayisiñamawa ukat kunjamatsa mayni precursoranakamp chika kusisit irnaqtʼasma uk sum amuytʼasiñamarakiwa.

[4 janan qhanañchäwipa]

Awk taykanaka, ¿wawanakamax Diosar sapür luqtañ amtapxañapatakix yatichasipktati?

[5 janan qhanañchäwipa]

Diosan arunakapat yatiyañaw jiwasatakix taqi luräwinakat sipans wali wakiskirixa, kunattix Jehová Diosaw uk amtawayi.