Jesusan jiwäwip amtañatak wakichtʼasipjjañäni

Khä 33 maran nisán phajjsit 13 urunakaw saraqjjäna. Jesusajj Pascua fiesta amtañatakiw qhep qhepa kuti uka arumajj munat amigonakapampi tantachtʼasjjani uk jupajj sum yatïna. Qhepatsti Santa Cenaw uka lantejj amtasjjani. Niyakejjay uka arumajj wali wakiskirïchïnjja, Jesusajj Pedrompir Juanampiruw sum wakichtʼapjjañapatak khitäna (Luc. 22:7-13). Ukhat aksaruw cristianonakajj Jesusan jiwäwip amtañatakejj sum wakichtʼaraktanjja (Luc. 22:19). Kunjamsa abril phajjsit 3 uru saraqatarojj Jesusan jiwäwip amtañatak jayäkipan wakichtʼassna uk uñjañäni.

Irpir chuymaninakajj akanakwa wakichtʼapjjañapa:

Tantachasiñ Utanti jan ukajj yaqhawjancha tantachasipjjani uk amtapjjañapa, yaqhawjankanejja, asientonakajj waljat utji, lusaniti ukat tantachtʼasiñjamati janicha ukanak uñjapjjañapa. Jayäkipanwa qʼomachasiñapatakejj waktʼayapjjañapa.
Mä suma yatjjattʼat arstʼiriru, tantachäw sarayiriru ukat tʼantʼataki vinotaki orapkani ukanakaruw ajllipjjañapa.
Kawkhantï tantachäwejj apaskani ukan yaqha tantachäwimp apasinejja, tantachäwinakajj kuna horarusa qalltasini, tukuyasini ukanakwa amtapjjañapa, ukhamarak auto sayañanakatsa.
Katoqtʼirinakaru ukat tʼantʼa, vino pasayapkani ukanakaruw ajllipjjañapa.
Tʼantʼas vinos suma wakichtʼatäñapataki, platonakas, vasonakas, mesas ukat mesar janjjatañ mantelas suma wakichtʼatäñapatakiw uñjapjjañapa.

Yatiyirinakajj akanakwa lurapjjañapa:

Invitación lakirañatakiw wal chʼamachasipjjañapa.
Bibliat yateqerinakaru, familiaranakaru, yateqeri jan ukajj trabajir masinakaru ukat yaqhanakar invittʼañatakiw mä lista wakichapjjañapa.
Jesusan jiwäwip amtañataki Bibliat liyiñ waktʼayatäki uk liyipjjañapa ukat lupʼipjjañaparakiwa.
Jesusan jiwäwip amtañatak jutapkani ukanakar sum katoqtʼapjjañapa.